2 korinto 1 - Biblía Axweesantá Hhohho' ar Mungú 2004

¹ Anuú Paulo barwaárí ngina gooiím dinkwa nee Timoteo hhiyaarén. Aníng a ya/abusmoó Kristo Yesu ar adoodá' Mungú aa slaá'. Barwaárí ngina amorhúngií gooiimaán, kuungaásingá' kríshaanáy, kuungaásingá' Mungú ugwa haratlintie' awa baraá yaamaá Korintór i diriia'. Barwaárí ngina dirhúngií gooiimaán, nee dír múk hhohhó' oo Mungú, kudá' sleémeero oo baraá yaamaá Akayár i dirií'.

² Mungú Baabuúrén nee Aako Yesu Kristo kuungá' nu tsuuqi nee nu waydií haniisi.

Paulo i Munguú sluufmiis

³ Mungú, Baabuú Aakoorén Yesu Kristo i xirfuuti. Inós an Baabuúdá' gurtleemu sleémeero ngu hanmiís, nee slám an Munguúdá' gurkwa/asa sleémeero ngi hanmiís.

⁴ Inós atén tin gurkwa/amis baraá slahh'amuurén sleémeerowo, as kahhó' atén múk hatlá' nguwa gurkwa/asan baraá slahh'amuuine, ar gurkwa/amisuudaádá' atén tira gurkwa/amís nee Mungú.

⁵ Asma adoodá' slahh'eemisuú Kristo ir buhhabuhhi amoorene, adoorí an adoodá' gurkwa/amis ir tlahhatlahhi sleeme amoorene ar loohír Kristo.

⁶ Atén bar slahh'eemis u slaslaawaán, un slaslaawaán as kahhó' kuungá' gurkwa/asa kawa sleera' nee ba/amaro. Laqaá atén barnaxes gurkwa/amis un slaslaawaán, un slaslaawaán, as kahhó' atén kuungá' gurkwa/amisuuwo nuwa aleeslawaan, as kuungá' /uuru kuwa sleera' oo slahh'eemis kuwa sa qiqtliinda', slahh'eemisuú adór kwí atén ta sa qiqtliimaan.

⁷ Atén harahhifo a ló'wa koomaán daandeemoohunge. Asma atén a xuaán adoodá' kuungá' slahh'amu kur slasleera', an adoodá' kuungá' gurkwa/amis kur sleera' sleeme.

⁸ Hháe, atén adoorí an kaahaán, asma atén a sla'aán kuungá' slahh'amaayeedá' atén taa slawaán baraá yaamaá Asiaro kawa xua'. Asma atén slahh'amaayeedá' taa slawaán ka ló'wa ur, tam atén ana harslaaqataán gagaararo. Tam harahhifór tawa slafaan iri fák.

⁹ Atén tari baraá muneerén i kaahaán daxta sakwasleemár gwa'ara aga slawaán, as atén kawa tsaahhaan adór tar gár hariimaaká atén tiwa kilootén i tlintiiaan, ala masók a Mungú un i tlintiiaán, kudá' múk aa qaatl gu aleesláw waasle/atisaro.

¹⁰ Inós atén taa ba/amís baraá tsaxwaá gwa'arár adór tihe, nee slám ti malé ba/amis. Atén aa harahhifaán inós iwa kumiiti atén tiwa ba/amiimisi.

¹¹ Slám kuungá' sleeme atén ti alee/isá' ar loohír firorhúng. Gawaá adoorihe múk yaariír Mungú gu ló'wa sluufiis as atén, as tsuuqaá Mungú, kudá' atén taa slawaán as firór múk yaariir.

Gár aa'aá Paulo gaa warqes

¹² Gaarí an gár atén tir xirfayeemisaan, muneerén atén ti lamabu'uún adór atén tara hootaán baraá yaamuwo, ak alé dirhunge. Atén ana hootaán ar hhohhoaari nee ar muunuú /awaák. Muruuwí amór i dahhi a amór Mungú, asma atén aga hootaniiká ar sagalooár heeuuma, ala ana hootaán ar tsuuqaá Mungú.

¹³ Baraá barwaduurene atén gár hatlá' aga gooiimaaniiká, ala a tidá' ta aleesleera' soómaro nee ta tsahha'. Aníng a harahhiíf kuungá' aluuwo a tsaahha hhe'esá'.

¹⁴ Asma qoomaarihe kuungá' kaangwí ugwa tsaahha hhe'eesi'iiká, ala a xuaán baalaadár Aako Yesu binda hardát, kuungá' daqaní ti xirfayeemisá' as atén, adoorír atén tir xirfayeemisaan as kuungá'.

¹⁵ Qoomár niwa harahhifoorí koom har geeraawo ana slaá' niwa amorhúng kaw as kuungá' tsuuqa kiwa sagaáwa tsár wa sleera'.

¹⁶ Ana slaá' niwa dirhúng ar waaraahh qoomár bar Makedoniár káw, nee niwa malé dirhúng ar oh binda Makedoniár wa kií/, nee as kuungá' aníng iwa alee/isa' niwa kumiit baraá aaiieene ay yaamaá Yudea.

¹⁷ Ala kuungá' ka ga/eera', aaiieé' kuká' aníng ngiwa adoorír slaá', aníng iga alqaytsitiikáhe? Laqaá a gídaabáhe aníng a adór heé aa haratlintii'iikáhe, kudá' káh «Eeít», ala laatí inós i kaahi, «Aasla'áy».

¹⁸ Ala aníng a adoosingeeká. Ala Mungú bar a Munguú ló', axweesanayrén sleeme dirhunge bar «Eeít» a «Eeít», bar «Aasla'áy» a «Aasla'áy».

¹⁹ Asma Garmoó Mungú, Kristo Yesu, kudá' kangós atén naa dirhúngií alki/itaán, aníng nee Silwano nee Timoteo, a gídaabáheeká inós an «Eeít» nee «Aasla'áy». Ala umuú daqto gár baraawós a «Eeít».

²⁰ Asma al'axweesantá Mungú sleémeero ar baraá inose a «Eeít». Gawaá adoorihe atén sleeme an kaahaan «Amin» ar inós as Mungú kuwa xirfayeemiisaan.

²¹ Ala Mungú an kudá' atén nee kuungae taa gawdees baraá Kristo. Inós an kudá' atén taa paraatl.

²² Nee slám tiri layaarós i qaás, nee Qeeruuwós nguri haniís baraá muneerén i alé as inós tawa arhaánirén.

²³ Mungú an lamabu'usmooeé' aníng gár nisa malé Korintór i ki/iiká, inós ga xuu' asma aga slaiiká kuungá' nuwa slahh'ees.

²⁴ Atén a sla'anaaká kuungá' nuwa hara'ayiimaan, daanduú haratlintaoorhunge. Ala atén nee kuungá' an algadiyuusaán as qwal/uuhúng, asma kuungá' aga kwa/é' baraá haratlintaaorhunge.