1 Yohana 5 - Biblía Axweesantá Hhohho' ar Mungú 2004

Haratlintaao yaamu gir bá/

¹ Umuúqo heé adoorí gaa haratlintii' adór Yesu tar Kristo, heewí kwa laqwaál nee Mungú. Heé baabuú na/aay gu slaá', na/aydá' baabá aa laqwaál gu slaa' sleeme.

² Adoorihe a tsaahhaán adór na/aá Mungú kir sla'aan, bar Mungú u sla'aan, nee dabeerós bara eeharaán.

³ Asma dabeerós bar iialooeemisaán, gár i laqaaqaan a atén Mungú u sla'aán. Slám bur sla'aán, dabeerós iialooeesaro ka gawdeeká.

⁴ Heé taa laqwaál nee Mungú, yaamu gir baa/. Mungú bura haratlintiaán, haratlintaaoorén tí an gár yaamu gir baa/.

⁵ Heé yaamu gir baá/ a heemá, aqo har kudá' aa haratlintí'iíke adór Yesu tar Garmoó Mungú.

Lamabu'uungw daanduú Yesu Kristo

⁶ Yesu Kristo an kwí naa hardah ar ma'aay nee tseere. Naa hardihiiká ar ma'aay kilooín, ala nina hardáh ar ma'aay nee tseere. Qeeru an kudá' gu lamabu'uúm, asma Qeeru a looeema.

⁷ Asma awa ngu lamabu'uumá' a tám [gawaá dooriwo, a Baabá, nee Axweesani, nee Qeeruú hhoohhoó', ala kuká' tám a wak.

⁸ Awa tám i dayá' baraá yaamuwo, awa ngu lamabu'uumá']. Qeeru, nee ma'aay, nee tseere. Kuká' tamaawo lamabu'ungw'ín a wák.

⁹ Atén lamabu'úngw muu u ya/aa/amaán, ala lamabu'úngw Mungú ku ak úr. Lamabu'úngw Mungú a kwí oo Garmaawós nguwa lamabu'ún.

¹⁰ Heé Garmoó Mungú gwa haratlintii', lamabu'uungwí gu kón baraawose. Heé Mungú gwa haratlintii'iiká, a Mungú guna lamusmo tleéhh, asma lamabu'uungwí Mungú Garmaawós nguwa lamabu'ún, gwa haratlintii'iiká.

¹¹ Lamabu'uungw an kwí, Mungú slafíngw alhhe'eesay wásl nguna haniís. Slafiingwí naa haniís i baraá Garmaawós i dirii'.

¹² Heé Garmoó Mungú gwa haratlintii', slafingwí gu kón, oo Garmoó Mungú gwa haratlinti'iiká, slafingwí gu konká.

Slafíngw alhhe'eesay wásl

¹³ Kaangwí nguna kuungá' i gooiím, asma kawa xua' adór slafíngw alhhe'eesay wásl kur koonda', kuungaádá' umuú Garmoó Mungú ugwa haratlintie'.

¹⁴ Adoorihe a harahhifór koomaán dirose bar ugwa firiimaán ar adór inós i slai, ti axaas.

¹⁵ Atén bara xuaán adór tir axamiís, daqaní umuúqo gár kuwa firiimana, a xuaán adór kara slawaán.

¹⁶ Hee bar hhiyaawós gwa ár, i tlakweemaá tlehhiit, ala a tlakweemaá gwa'arár kooma'aaká, ngu aleefirin, nee Mungú gu slafíngw i haniis. Ala firoorí a har dír mukdá' tlakweemaá gwa'ara gaa tleehhiiká. Tlakweemaá gwa'arár koomá' i dayá'. Aníng a kaahaaká ngu aleefirin as tlakweemaaká'.

¹⁷ Umuúqo gár ganaa'aaká a tlakweema, ala tlakweemaá gwa'arár kooma'aaká i dayá'.

¹⁸ Atén a xuaán adór heé taa laqwaál nee Mungú ir tlakweemaá tlehhiitiiká, ala inós ku harmagagaahh nee Garmoó Mungú, tam kudá' tlaákw gu kwatiitiiká.

¹⁹ A xuaán adór atén tar múk Mungú, ala yaamu sleémeero kudá' tlaákw gin baliit.

²⁰ Garmoó Mungú adór nira hardáh, atén a xuaán, nee inós fuquraangw ngwa haniís oo inósuuduú Munguú ló' kuwa xuaan. Nee atén a baraá inósuuduú ló' i diriiaán, as tawa baraá Garmaawós Yesu Kristo. Kwí an Munguú ló' nee slafíngw alhhe'eesay wásl.

²¹ Laqwalór ninakw, munguaá lamto ti harmagahhe'.