1 Yohana 4 - Biblía Axweesantá Hhohho' ar Mungú 2004

Qeeruú Mungú nee qeeruú Wakusmoó Kristo

¹ Sla'aaruúse, umuú gár ta kaahi ma haratlintatiaara', ala alqaytsitaak, áx amór i dahh a amór Mungúhe. Asma aaruusér yaariir ar lama naa ti'ít.

² Qeeruú Mungú adór kur tsahha' a adoorí, «Umuúqo heé káh, Yesu Kristo nina hardáh ar baraá slaqwa.» Kwí i Qeeruú Mungú kón.

³ Umuúqo gár ta kaahi ar Yesu kuwa siasi'i i amór Mungú dahhaká. Axweesanaysíng oo mukdá' Kristo gwa sii', kangwdá' taa axasé' tawa kaahi, «Ni hardah, nee hamí naa qaroó baraá yaamií hardáh.»

⁴ Laqwalór ninakw, kuungá' awa Mungú, nee kuungá' aaruuseedár lama aga arba/é', asma Mungú i baraahúng i dirii', nee inós ku úr ta Wakusmoó Kristo oo baraá yaamií diriia.

⁵ Inooín awa baraá yaamu, gawaá adoorihe muruú ta axweesi oo baraá yaamu, nee yaamu tooín ngi axamiisiyá'.

⁶ Atén awa Mungú, umuúqo heé Mungú gu xuú', axweesantarén ga axamiis, múk Munguheeká axweesantarén ga axamiisiiká. Ar adoorihe qeeruú ló' u tsaahhaán nee qeeruú lamto.

Mungú a sla'aari

⁷ Sla'aaruúse, ti sla'asla'aané'. Asma sla'aari amór i dahh a amór Mungú. Heé sla'aarír koóm, kwaa laqwaál nee Mungú, nee inós Mungú gwa tsaáhh.

⁸ Heé sla'aarír koomaaká, Mungú gwa tsaahhiiká, asma Mungú a sla'aari.

⁹ Adoorihe sla'aarír Mungú kinga amoorén i geehhooatís, asma Mungú Garmaawós oo kilós ngwa ya/aáw baraá yaamií ale, as kahhó' inós kuwa slafíngw ar slawaan.

¹⁰ Sla'aari an tí, Mungú atén tina slaá', a kaahaká atén inós una sla'aán. Garmaawós nguna ya/aáw asma atén nee Mungú tiwa haraki/isi, nee wayda nguwa tleehhi as tlakweemaarén.

¹¹ Sla'aaruúse, bar Mungú atén taa adoorír slaá', atén gár tiwa hariím masók tin sla'asla'aán sleeme.

¹² Heé Mungú gwa baloó ar i kaahh. Atén birti sla'asla'aán, Mungú i baraarén wa hoot, sla'aarirós iri ganá' baraarene.

¹³ Adoorihe an xuaán adór atén tar baraawós wa hootaán, asma atén inós taa qáy Qeeruuwose.

¹⁴ Atén aga araán kay lamabu'uumaán adór, Baabá Garma ngura ya/aáw tawa Ba/amusmoó yaamu.

¹⁵ Hee bira ya/án adór Yesu Kristo tar Garmoó Mungú, Mungú i baraawós i dirii'. Nee inós i baraá Mungú.

¹⁶ Atén adór Mungú tira slaá', aga tsaahhaán, nee sla'aarirós kari haratlintiaán. Mungú a sla'aari. Kudá' baraá sla'aarír wa hoót, in baraá Mungú, nee Mungú i baraawós.

¹⁷ Adoorihe sla'aari kana gan'aás baraarene, as kahhó' bál deelór sakwasleemaaro a da'ayumitanaaká. Asma adoodá' inós i dirii'i, an adór atén ti diriiaan baraá yaamuukae.

¹⁸ Baraá sla'aariro dae i káhh. Ala sla'aarír ganaa' dae gan hingés. Asma dae i sakwasleemár koón. Heé da'ayuumiít baraá sla'aariro aa ganaiiká.

¹⁹ Atén Mungú un sla'aán, asma inós atén tina slaá' geerií ale.

²⁰ Hee bir kaahi, «Mungú án u slaá',» ala hhiyaawós gu slaiiká, inós a lamusmo. Asma hee bar hhiyaawós kudá' i ga/ay gwa harslaaqaát sla'atiro, Mungú aa ariiká gu aslayká sla'atiro.

²¹ Inós tina adoorír hara'ayín iwa kaahi, «Heé Mungú gu slaá', gár kuwa hariím a hhiyaawós gun slaa' sleeme.»