1 Yohana 2 - Biblía Axweesantá Hhohho' ar Mungú 2004

Kristo an haraki/isusmoorén

¹ Laqwalor'eé' ar ninakw, tí ngin kuungá' i gooiím as kahhó' tlakweema mi tleehhara'. Ala hee bar tlakweema gaa tleéhh, heé ti aleefiriiriím dír Baabahe u koomaán, an Yesu Kristo, kudá' gan'amuú koóm.

² Inós an kudá' taa haniís as atén tiwa haraki/isi nee Mungú as tlakweemaarén, ala as tlakweemaarén kilooineeká, nee tlakweemaá muu sleémeero.

³ Hara'ayaarós bara oohaán, daqaní aga tsaahhaán adór kura xuaán.

⁴ Heé káh «Aníng inós ugwa xuú',» ala hara'ayaarós ga ohinká, inós a lamusmo, tam looeema i kahhiyá' baraawose.

⁵ Ala heé axweesantá Mungú gaa oh, baraawose sla'aarír Mungú aa ló'wa tleehharút, adór atén tar hootaán dinkwa nee Mungú, kay tsaahhaán.

⁶ Heé káh, «Aníng nee Mungú a dinkwa», gár kuwa hariím, a adoodár Kristo inós sleeme gan ar hoot.

Hara'ayaadá' /aben

⁷ Sla'aaruuser'eé', hara'ayár ni kuungá' i gooiim ar /abeneeká, ala a hara'ayaadá' ta xua' qaroó alé iimír iimu/uungo. Hara'ayaadá' ta qaroó xua' a axweesantadá' taa axasé'.

⁸ Ala inós ka /aben sleeme, axweesantadár ló' baraawose nee baraahunge, tidá' kah, giwti i waaráhh, nee gwa/aateemaadaá ló' naa qaroó gwa/aatiyé'.

⁹ Heé káh, aníng a baraá gwa/aateema, ala inós hhiyaawós gwa aáhh, inós i baraá giwti tam hamí.

¹⁰ Heé hhiyaawós gu slaá', i baraá gwa/aateema. Baraawose gár gu hariaw i káhh.

¹¹ Ala heé hhiyaawós gwa aahh, i baraá giwti, slám i baraá giwtír wa hoot, ala amór i kay ga xuiiká. Asma giwti ilaawós gaa taampuúr.

¹² Kuungá' laqwalór ninakw, kaangwí nguna dirhúngií gooiím, asma tlakweemaahúng kaa gurtláy ar baraá umuú Yesu.

¹³ Kuungá' ín baabá kaangwí nguna dirhúngií gooiím, asma kudá' daadáw iimír iimu/uungo ugwa xué'. Kuungá' masoómba, kaangwí nguna dirhúngií gooiím asma kudá' tlaákw ugwa ar ba/é'.

¹⁴ Kuungá' laqwalór ninakw, kaangwí nguna dirhúngií gooiím, asma Baabá ugwa xué'. Kuungá' ín baabá, kaangwí nguna dirhúngií gooiím, asma kudá' daadáw iimír iimu/uungo ugwa xué'. Kuungá' masoómba kaangwí nguna dirhúngií gooiím asma a /uuruú koondá', nee axweesantá Mungú i baraahúng wa hót, nee kuungá' kudá' tlaákw ugwa ar ba/é'.

¹⁵ Yaamu mi sla'aara', tam muruú baraá yaamií dirií'. Hee bar yaamu gaa slaá', sla'aarír Baabá baraawose i káhh.

¹⁶ Asma umuúqo gár baraá yaamuwo, adór ilatleerír slaqwa, nee ar ila', nee daqaari'iimár muu gwa daara/ángwár eer, muruuwí i amór Mungú dahhiiká, ala a muruú baraá yaamuuká'.

¹⁷ Ala yaamu i waarahhiyá' dinkwa nee ilatleerir'ine, ala heé adoodá' Mungú i slai ga tlehhiít i hotaatín ay kureér.

Wakusmoó Kristo

¹⁸ Láqwalo, gaarí a qoomár alhhe'eesaay, adoodá' kara axasé' tawa kaahi, wakusmoó Kristo ni hardah. Tam hamí wakuusér Kristo ar yaariir aa qaroó deerút. Ala adoorihe gaarí a qoomár alhhe'eesaay.

¹⁹ Mukwí ina dirén wa tláy, ala asma inooín awa bartareneká. Inooín geera bar awa bartarén, geeraawo nee atén aga alhootaán. Ala tana tláy as kiwa tsaahha hhe'eesaan adór tar awa bartareneká.

²⁰ Ala kuungá' tunda Qeeruú hhoohhoó' i haniís nee kudá' Hhoohhoó', gawaá adoorihe kuungá' mura' sleémeero u xuá'.

²¹ Kaangwí nguna kuungá' i gooiím, ala a kaahaaká kuungá' looeema i xua'aaká, ala looeema i xuá', sleeme a xuá' baraá looeemaawo adór lama tam ar niiná ir káhh.

²² Heé lamusmoó kilá' an kwí káh, Yesu a Kristowooká. Kwí an Wakusmoó Kristo, kudá' Baabá nee Garmaawo gi satlaánk.

²³ Heé Garma gwa tlaank, tam Baabá gwa satlaánk sleeme, oo Garma gwa ya/an, tam Baabá gwa ya/án sleeme.

²⁴ Tidá' kuungá' taa qaroó axasé' iimír iimu/uungo masók i baraahúng wa hót. Tidá' taa qaroó axasé', bir baraahúng wa hót, kuungá' daqaní sleeme a baraá Garmá wa hotá' nee baraá Baabá.

²⁵ Al'axweesantá inós naa dirén i oó' a tí, slafíngw alhhe'eesay wásl kuwa slawaan.

²⁶ Kaangwí nguna dirhúng i gooiím daanduú mukdá' kuungá' nu qwaareemisa.

²⁷ Kuungá' tunda Qeeruú hhoohhoó' oo Mungú i haniís. Nee Qeeruuwí hhoohhoó' tinda kuungá' i haniís, inós bir baraahúng wa hoot, daqaní hee kuungá' gár nus intsaahhatimisi i káhh. Asma Qeeruudá' tinda kuungá' i haniís, inós mura' sleémeero ngu kuungá' i intsaahhatimis. Nee gár ni kuungá' i intsaahhatimisi a looeema, a lamtooká. Tidá' kuungá' nuwa intsaahhatimisi oohaak, ta baraawós wa hotá'.

²⁸ Kuungá' laqwalór ninakw, baraawós wa hootaak, as qoomár Kristo birna hardáh, burkwa geehhooeés, atén mitiwa mureekeés dír geeraawós wa ale.

²⁹ Kuungá' a xuá' adór inós tar kudá' gan'amuú koóm. Gawaá adoorihe xuaak sleeme adór umuúqo heé hota ganaá' kura laqwaál nee inós.