1 WAAWITÁ 9 - Biblía Axweesantá Hhohho' ar Mungú 2004

Mungú tiwa geehhooeés dír Solomoni sagaáwa tsare

¹ Qoomár Solomon Doó AAKOÓ MUNGÚ nee doó waawutmo ngiwa hhe'eés tlehhmuuwo, nee muruú hatlá' aa slaá' tleehhamooro,

² AAKOÓ MUNGÚ tiri geehhooatís dír Solomon malé alé ar adoodá' tira geehhooeés baraá Gibeonír wa ale.

³ AAKOÓ MUNGÚ guri báy, «Aníng firoorók nee saaliingók kudá' iwa firiín iga axaás. Do'owí kuúng taa tléhh aníng ugwa hhoohhooeés as niwa baraaká' wa hoot daqisleém, slám malé alé, aníng un slaá' nee un xuúm qooma sleémeero.

⁴ Nee kuúng bar aga hót dir'eé' wa alé, ar adoodár baabuúwók Daudi, ar muunuú ganaá', nee adór qoom, nee tidá' sleémeero án kuúng ugwa báw kari ót, nee kaahir'eé' kari ót, nee axweesantaeene,

⁵ daqaní án waawuti'iimarók a iiatleereés baraá Israeliro, adoodá' ngira al'axweés dír baabuúwók Daudi, niwa oó', ‹Kuúng hee u dakuská oo iwiít gawaá kitángw waawuti'iima oo Israeli ay alhhe'eesay wasle.›

⁶ Ala bar aga warqeeré', aníng eeharahaduuwo iri meerá', kuúng nee na/iiwoge, hara'ayar'eé' nee kaahir'eene kiri meeré' ooharo, tidá' naa dír geerahúngí qaás, slám tari tleerá' munguaá hatlá' kiri sagadiyusá' nee kiri sluufmisá',

⁷ naagáy nun sií' kuungá' nee do'owí naa hhoohhooeés as umuueé', sleémeero in saweés dír ilaeene. Múk Israeli tari slaqsaay nee /aymuú /ooslisliingw baraá xoordu sleémeerowo.

⁸ Ala do'owí iri taanguut, aluuwo tam umuúqo heé waaraahha iri kwisliit guri niqimis. Inooín tari ooi, ‹Ahaá a milá? Gár AAKOÓ MUNGÚ ayaawí nee do'owí ngisa adoorí laáq?›

⁹ Nee muu iri ooi, ‹Asma adoodá' AAKOÓ MUNGÚ, Munguúín nguwa gunqaaresiyé', kudá' baabi'ii'ín ngaa duux baraá yaamaá Misrír wa alé, inooín tiri dabe oohiyé' nee munguaá hatlá', kiri sluufmiís nee kiri sagadiyuús. Gaarí an gár AAKOÓ MUNGÚ kaangwí ngusa gawaaíní huúw.› »

Solomon gixsadaá mibeeraá tsár ngiwa haniís dír Hiramu

¹⁰ Kureeraá mibeeraá tsár niwa waaraahhiyé', iimír Solomon maraydá' tsár ngiwa tleéhh, Doó AAKOÓ MUNGÚ nee doó waawutmowo,

¹¹ Hiramu waawutmoó Tiro sahhta nee beroshi nee sahaábu ngina huúw amór Solomon ar har afiqoomaadá' inós i slai sleémeero. Waawutmo Solomon gixsadaá mibeeri tsár awa yaamaá Galilaya giri haniís dír Hiramu.

¹² Hiramu niri tláy baraá Tirór wa alé, as gixsaduudá' Solomon aa haniís ngiwa ari, naxés ngwaa sla'atisi'iiká.

¹³ Iri oó', «Hhiyaaeé', gixsadaá naa hanís a gaalá?» Yaamuudá' giri báy Kabuli tam laarí.

¹⁴ Hiramu kilograámu kume tsiyáhh ar sahaábu gana qaroó huúw dír waawutmo.

Gadiyeedaá yaariir awa Solomon

¹⁵ Gaarí an gár waawutmo Solomon muu ngusa /uurutamís baraá gadiyér tlehhnuú doó Mungú, nee do'ós oo kilá', nee koo/ír gawit ar Milo, nee koo/ír Yerusalemu nee gixsár Hasori kawa /abeesi, nee Megido nee Geseriro.

¹⁶ Farao, waawutmoó Misri iri haratláy, Geseri gana hayóh, gana daá/ ar asla, múk Kana'ani kudá' baraadá' hoót guna tsuú/, dasiirós tidá' Solomon aa duúx gana gixsarí haniís.

¹⁷ Solomon gixsár Geseri gari /abeés tleehharo, nee Betoronír baraaywo,

¹⁸ nee Ba'al-ati, nee Tamari tidár baraá xaanxoó yaamaá Yuda,

¹⁹ nee gixsadu sleémeero awa daqaari'iima kudá' Solomon aa tleéhh, nee gixsadaá gaarduuwós kudá' ta uuruxun, nee awa mukós oo farasuú i tsa/aa/ám, nee umuúqo gár Solomon aa slaá' tleehhamooro baraadaá Yerusalemuro, nee baraá Lebanoniro, nee baraá yaamu sleémeero awa waawuti'iimarose.

²⁰ Gawaá daanduú mukdá' aa meeti oo Amori, nee oo Hiti, nee oo Perisi, nee oo Hifi, nee oo Yebusi inooinaadaá múk Israeliwooká,

²¹ na/ii'ín kudá' naa meetiye' aluuine baraá yaamií alé, kudá' taa hhaamisiiká nee múk Israeli, Solomon gina lawaale tleéhh ar gadiyér tawa nongo'otiiká ay laarí.

²² Ala Solomon múk Israeli tam heé wák i kaahh oo aa gadiyér gawítí sláy, ala inooín a slaqwaruuse, geeraharuuse nee geeraharuuseerós ar slaqwaruuse, nee mukdá' urén oo gaarduuwós awa ta uuruxun, nee mukduú farsuuwós i tsa/aa/ám.

²³ Mukwí urén oo geeraharuuse oo Solomon aa qaás gadiyeérós kawa sagesihhimiiti a tsiire kooán nee mibeeri kooán, kudá' hara'ayár gadiyeé ga oiím.

²⁴ Aluudae dasír Farao iri lót amór gixsár Daudi wa ale ay amór do'ós kudá' Solomon aa tleéhh, Solomon koo/ír gawit ar Milo gari tleéhh.

²⁵ Solomon do' tlehhmuuwo nguwa hhe'eés, umuú kurko ilahhooár da/a gan hamaamiis sagaáwa tám, nee ilahhooár wayduuwo, gawaá kitangw ilahhooa, kudá' inós aa tleéhh as AAKOÓ MUNGÚ. Ilahhooa gari daá/ gawaá kitangwdá' dír geeraá AAKOÓ MUNGÚ i dirií'.

²⁶ Waawutmo Solomon miringe gari tleéhh baraá Esion-geberi tidá' tseew amór Eloti afaá tlawtá Shamu, ar baraá yaamaá Edomu.

²⁷ Hiramu sagadiyuseerós tidá' gadiyér baraá tlawi ga xuu', giri ya/aáw ar baraá miringamo dinkwa nee sagadiyuusér Solomon.

²⁸ Tay hardáh Ofiri talaántár tsiire tsiyáhh nee mibeeri tsár ar sahaábu kingiri amoodá' wa huúw, kari huúw amór waawutmo Solomon.