1 WAAWITÁ 8 - Biblía Axweesantá Hhohho' ar Mungú 2004

Sandakmoó alqado kwaa huúw baraá Doó Mungú

¹ Aluuwo waawutmo Solomon bariisér Israeli, nee geeraharuusér xoordu, nee geeraharuusér maraá múk Israeliro gina burumbuúr geeraawós i alé, baraá Yerusalemu as Sandakmoó Alqadór AAKOÓ MUNGÚ nguwa duuxiya' baraá gixsár Daudiwo, tidá' ta bay Siyoni.

² Múk Israeli sleémeero tari burumburiít dír waawutmo Solomon baalaadár deelór ur ar slahhángw faanqw, kudá' ta babay Etanimu.

³ Bariisér Israeli ina hardát, nee kaahamuusér Mungú sandakmooduú alqado guri gagát.

⁴ Naagáy múk tlahhoó Laáwi nee kaahamuuse sandakmoó alqadór AAKOÓ MUNGÚ nguri gagaariyé', nee heémaadár Munguhe, nee xosluudá' hhohho' ar doó Mungú ar baraá heémaadií dirii'.

⁵ Waawutmo Solomon nee dinkwaadár múk Israeli aa burumburit, tana sihhiít geeraá sandakmoó alqado, ilahhooa kari haniís ar awe nee bee/ángw yaariír oo farooro ta aleeslayká.

⁶ Kaahamuuse sandakmooduú alqadór AAKOÓ MUNGÚ guri dahás didá' kuwa hariím, didár baraá guruú do' ar doó Mungú, didá' ak ló'wa hhoohhoo', baraá guruú hhampa'aá slaqsi'iidaá keruúbi.

⁷ Slaqsi'iidaá keruúbi hhampe'eeri'ín ngaa hhafiyé' gawaá daanduú didá' sandakmo kway qaás. Slaqsi'iidá keruúbi tuntukma ngiri tleehhiyé' gawaá daanduú sandakmo nee xaaiidá' kur loohisi.

⁸ Xaaiidá' ki ló'wa tlet, nee ki geehhoo' iimír didá' hhoohhoó' wa alé tidár geeraá kutuwidár baraá guruú do', ala amór tsee/aawo ki geehhooeeká. Tam ay laarí i didií kahhiyá'.

⁹ Gár hatlá' ar baraá sandakmoodá' i káhh aqo tla/eedá' parereehhayen, kudá' Mose aa baraadí qaás amór Horebu wa alé, didá' AAKOÓ MUNGÚ múk Israeli nguwa alqadoorós i oó', qoomár inooín niwa baraá yaamaá Misrír wa ti'iitiyé'.

¹⁰ Qoomár kaahamuusér Mungú iwa ti'ít didá' hhoohhooe, huunki Doó AAKOÓ MUNGÚ guri hatsís.

¹¹ Kaahamuusér Mungú gadiyeé gari harslaaqát as huunkidá', asma xirfuú AAKOÓ MUNGÚ Do'ós kudá' guna hatsiís.

¹² Aluudae Solomon iri oó', «AAKOÓ MUNGÚ gár aa oó' a tí, ‹Án an hoót baraá huunkoó gíwá ale.›

¹³ Ar looeemaawo doó hotaawók ngwaa tleéhh, tawa dír hotaawók ay alhhe'eesay wasle.»

Solomon i mukwí axwees

¹⁴ Kár Solomon iri warqáy amór mukduú Israeli sleémeero aa burumbuuriit, giri tsuúq, inooínaadá' sleémeero taa sihhiít.

¹⁵ Iri oó', «AAKOÓ MUNGÚ, Munguú Israeli i xirfuuti, asma ar dakose al'axweesantadá' afkósuú kilae aa oó' dír baabuúeé' Daudi gaa boo/eés, iwa oó',

¹⁶ ‹Iimír baldá' muk'eé' kwí oo Israeli nguwa duúx baraá yaamaá Misriro, gixsár naa tsawaár baraá yaamaá Israeliro as dooeé' nguwa tleehh i káhh, tidá' daqaní umuueé' kuwa baraadá' wa sluufmiisi, aqo har Daudi una tsawaár muk'eé' oo Israeli nguwa sawaawuti'in.›

¹⁷ «Gawaá adoorihe, baabuúeé' Daudi ina tsabín baraá muunaáwose do' nguwa tleehhi oo AAKOÓ MUNGÚ, Munguú Israeli kuwa sluufmiisi.

¹⁸ Ala AAKOÓ MUNGÚ baabuúeé' Daudi guna báy, ‹Adoosíng tara tsabiín baraá muunaáwoge dooeé' nguwa tleehh i qoón.

¹⁹ Aasla'áy kuúng aníng i dó' i tlehhká, ala a garmaawók oo ta laqwal dooeé' gun tleehh.›

²⁰ «Hám daxta AAKOÓ MUNGÚ al'axweesantós gaa boo/eés, asma aníng taa waawutmoó wa qaás kitángw baabuúeé' Daudiwo, nee kitangwduú waawuti'iima oo Israeli ugwa i iwiít adór AAKOÓ MUNGÚ, Munguú Israeli ngira oó', slám doó kuwa sluufmiisi ugwa tleehh.

²¹ Nee aníng dii aga tsaát ar sandakmoó alqado kwi qaasi, kudá' alqadór AAKOÓ MUNGÚ koóm, kudá' aa oó' dír baabi'iirén qoomár ngiwa baraá yaamaá Misrír wa duúx.»

Firór Solomon

²² Aluuwo Solomon iri sihhiít geeraá kitangwdá' AAKOÓ MUNGÚ kuwa ilahhooárí hanmamisi, dabaawós giri gáwtí tleés geeraá boo/oó múk Israelír wa ale.

²³ Iri oó', «Aá AAKOÓ MUNGÚ, Munguú Israeli, Munguú hatlá' oo adór kuúng i kaahh gawaá dooriwo, laqaá tam baraá yaamu sleémeero. Kuúng alqadoorók an boo/eemís, nee sla'aarír warqawaaká ana laqaán dír sagadiyuseerók tidá' ugwa ilaiwa/ ar muner'ín sleémeero.

²⁴ Al'axweesantá taa ó' dír baabuúeé' Daudi aga boo/eés, tidá' taa ó' sleémeero laarí aga boo/és ar aleesleemuuwók oo kilá'.

²⁵ Gawaá adoorihe AAKOÓ MUNGÚ, Munguú Israeli aníng kuúng u malé firiím, al'axweesantadá' taa ó' dír sagadiyusmoowók Daudi, baabuúeé', tawa ó', ‹Deelo sleémeero garmoó iwiít gawaá kitángw waawuti'iima oo Israeli ngu haniís, barnaxes na/iiwók naa hootiyé' dir'eé' wa ale ar adoodá' kuúng tara hót.›

²⁶ Hám daxta, aá Munguú Israeli, aníng kuúng u firiím, tí kuúng taa al'axwés dír baabuúeé' Daudi, sagadiyusmoowók, boo/eeseek.

²⁷ «Ala looeemaawo, Mungú, kuúng aqo hóta baraakaá yaamuú wa ale? Bar doori, laqaá tam dooraá gáwtí saaw, sleeme u buiaaká, do'owí aníng naa tleéhh adór ir bu'uuti a adoomá!

²⁸ Aá AAKOÓ MUNGÚ, Munguúeé', aníng a sagadiyusmoowók. Firor'eé' iiáií qaseek, afor'eé' tí laarí ya/aameek.

²⁹ Do'owí de'eemeek tlatla/aangw nee xweeraawo diirí kuúng tawa ó', ‹Diirí an dír muu umuueé' nguwa sluufmiisi.› Aníng iiárií qaasáng, bar aga diirí hardáh uwa fiririim.

³⁰ Firór sagadiyusmoowók axaaseek, nee ar mukók oo Israeli uwa firiirin. Firoorí kuúng na axaaseek gawaá doorí wa alé, nee bar aga axás, atén ti gurtleer.

³¹ «Hee bar heé hatlá' gwaa sadakuús, inós kunguri huúw as lo'o ngiwa /ayi baraá do'owí wa alé, inós bar lo'o gaa /aáy,

³² na'ás, kuúng iiárií qaaseek gawaá doorí wa alé, kuúng qaa/oó mukók tsateek. Heé dakuúsár koóm sakwasleemuteek ar harqoomoó dakuúsarós i diri', nee heé dakuúsár koomaaká maweek, ku gurtleér adoodár iialooeesarós i diri'.

³³ «Qoomár mukók oo Israeli burkwa arbaá/ nee wakuuser'ín asma tlakweemaaín kudá' naa tleehhiyé' diroge, inooín barta hhu'uu'ún, kuúng turi haratlintií', bar gurtleemu ngwaa firiné' tiwa dirógé niinawesiyé' baraá do'owí wa alé,

³⁴ na'ás, iiarií qaaseek gawaá doorí wa alé, tlakweemaá mukók Israeli gurtlaweek, daqaní ki ki/ís baraá yaamuudá' taa baabi'ii'ín i hanís.

³⁵ «Tluwaay bira tluwiiká as tlakweemaá naa kuúng i tleehhiyé', bar kuúng ugwa firiné' nee turi haratlintií', nee bar tlakweemaaín ngaa mayé' as kuúng kiwa naanáq,

³⁶ na'ás, iiarií qaaseek gawaá doorí wa ale, tlakweemaá sagadiyuuseerók, mukók oo Israeli gurtlaweek, ki intsaahhatís loohirók ar ganaa' kawa eehari. Tluwaay huweek baraá yaamuuwók kukae, kuká' taa mukók i hanís tawa kooín.

³⁷ Barnaxes giyeé naa tleér baraá yaamuwo, laqaá tiqtír pu/i, laqaá tluwaay bir kaahh, laqaá ingigi, laqaá karkari, laqaá tam bar mukók kuna harweér nee wakuuse umuúqo gixsar'ine, laqaá slahha tam gaalá ngaa slayé', laqaá tam tiqti gaala,

³⁸ na'ás gár mukók Israeli naaqo firini ya/aameek, laqaá tidá' umuúqo heewo naa firín, laqaá mukók oo Israeli sleémeero. Umuú heewo bar slahh'amuú baraá muunaáwós ngwaa xuú' bar ugwa firín dabaawós gaa tleés amoorók, iiárií qaaseek.

³⁹ Iia qaaseek, gawaá dooriwo didár hotaawók gurtleemu haniseek, adór hariim tleehheek, umuú heewo adór kus hariím ti tlehh, (asma kuúng kilók inslawoó baraá munér muu un xú'.)

⁴⁰ Kahhó' kuúng tu ilaiwawaa/ qoomaarí tawa baraakaá yaamu wa hooti, kuká' taa baabi'iirén i hanís.

⁴¹ «Tam hoomo sleeme oo naa xay amór yaamaá saawá' wa alé, oo heé Israeliwooká as umuuwók,

⁴² (asma múk xoordaá hatlá xirfuuwók ngu axaasiyá' nee aleesleemuuwók nee /uuruuwoge,) heewí birna hardáh, kuúng uri firín baraá do'owí wa alé,

⁴³ na'ás, inós iiárií qaaseek iimír gawaá doorí wa ale, heewuú hoomo tidá' uwa firini qaweek, as múk baraá yaamu sleémeero umuuwók nguwa xuiya' nee uwa ilaiwaa/iya', adór mukók oo Israeli wa alé. Inooín ngiwa xuiya' adór do'owí naa tleéhh tar dír kuúng tuwa sluufmiisi.

⁴⁴ «Mukók bira slaqwarár áy amór wakuuser'ín, umuúqo amór ki huba, inooín bar kuúng ugwa firiné' tawa amór gixsarí taa tsawát ga/ay, nee amór do'owí naa tleéhh as umuuwók,

⁴⁵ na'ás, firor'ín nee harhhehhe'eemisuuine axaaseek iimír gawaá doorí wa ale, inooín arba/ati ngi slaye' baraá slaqwaraaro.

⁴⁶ «Bar tlakweema ngaa tleehhiyé', asma heé tlakweemaá tleehhaaká i kaahh, kuúng bar iga i búhh kiri arbaá/ nee wakuuser'ín, kiri haasaáng wa huúw baraá yaamaá wakuuse, baraá yaamaá saawá' laqaá awa tseewá',

⁴⁷ bar qoomár tawa baraá looháy dirii'i baraá muner'ine ugwa i ki/iyé', niri hhu'uu'uné', nee uri gurtleemií firiné', bar taa oó', ‹Atén tlakweema iga tleehhaán, aga poora/amutaán nee aga tlakweesaán.›

⁴⁸ Nee qoomaasinge barta baraá yaamaá wakuuser'ín taa hhu'uu'ún ar muner'ín sleémeero ar kilá', nee ar fuqurangw'ín sleémeero, nee bar taa firín tawa amór ayaaín ga/ay, kudá' taa baabi'ii'ín i hanís, laqaá barta amór gixsarí kuúng taa tsawát ga/áy, nee amór do'owí aníng naa tleéhh as umuuwók,

⁴⁹ bar adoorí ngaa tleehhiyé', na'ás, firor'ín iiárií qaaseek iimír gawaá doorí wa ale, dír hotaawók, gan'amu ti hanis.

⁵⁰ Mukók gurtlaweek tlakweemaá naa tleehhi'i, nee dee/anuuine, gurtlaweek geeraá wakuuser'ine, kahhó' inooín sleeme ngi gurtlayá'.

⁵¹ Asma inooín a mukók, nee a slaasláwaarók, mukók kwí taa dúx baraá yaamaá Misrír wa ale, baraá asltadár gufteeri, tidá' ta muqslaárár weeqatmaamiisi.

⁵² «Firór sagadiyusmoowók xuuxueek, nee firór mukók oo Israeli iiárií qaaseek, qoomár tuwa qo firini.

⁵³ Xáy AAKOÓ MUNGÚ kuúng ina parátl baraá múk hatlae oo baraá yaamu sleémeero, tawa aalirók, adór kira iia tleerés ar loohír Mose sagadiyusmoowók, qoomaadá' baabi'iirén ngiwa duúx baraá yaamaá Misrír wa ale.»

Firór alhhe'eesáy

⁵⁴ Qoomár Solomon muruuwí sleémeero firooro nguwa hhe'eés dír AAKOÓ MUNGUHE, iri sihhiít didá' aáng ii tumbararaa'ati, dír geeraá kitangwduú ilahhooa geeraá AAKOÓ MUNGÚ, didá' dabaawós ngiwa gawti tleés.

⁵⁵ Inós iri sihhiít, múk Israeli sleémeero guri tsuúq, kudá' aa didií burumburiit, iri tseé' ar afór ur iri oó',

⁵⁶ «AAKOÓ MUNGÚ i xirfuuti, kudá' mukós oo Israeli gwaa amoohhooár i haniis, adór al'axweesantós sleémeero i diri'. Al'axweesantós tidá' hho' aa oó' ar loohír sagadiyusmoowós Mose gaa boo/eés.

⁵⁷ AAKOÓ MUNGÚ, Munguúrén ta dinkwa nee atén, adoodá' ira dinku'umaamiís nee baabi'iirén, atén mitiwa máy, laqaá mitiwa gunqareés.

⁵⁸ Inós muneerén ngi amoorós xu'usi, as loohirós kawa eeharaan, nee hara'ayaarós kawa oohaan, nee kaahirose, nee axweesantose tidá' aa oó' dír baabi'iirén.

⁵⁹ /Aymi'iieé' kukaá firo dír geeraá AAKOÓ MUNGUHE, masók in tseewuyá' dír AAKOÓ MUNGÚ, Mungurén, tlatla/aangw nee xweeraawo, nee inós sagadiyusmoowós ngu aleesleemuú i slay, as mukós oo Israeli diihhooa ngiwa slay baraá hotaaine deelo sleémeero.

⁶⁰ Daqaní múk baraakaá yaamu sleémeero gari tsaahh adór AAKOÓ MUNGÚ tar Mungú, oo hatlá' i kaahh.

⁶¹ Kuungá' inkihhimu koomaak dír AAKOÓ MUNGÚ, Munguúrene, hooté' ar baraá kaahirós nee hara'ayaarós oohaak ar adoosíng laarí taa tlehhé'.»

Aldafimár doó Mungú

⁶² «Aluudae waawutmo nee mukduú Israeli nee inós dinkwár diriiá' AAKOÓ MUNGÚ kuri ilahhooár muruú ta tsú/í haniís.

⁶³ Solomon AAKOÓ MUNGÚ guri ilahhooár waydií haniís ar muruú ta tsu/i, awe kume mibeeri tsár nee tsár, nee bee/ángw kume tsiiru nee mibeeri tsár. Adoorí an adór Solomon nee muu sleémeero oo Israeli Doó Aakoó Mungú kura aldafín.

⁶⁴ Baalaadár kilae waawutmo matla/angwdú tla/ángw i dirií' amór lak geeraá doó AAKOÓ MUNGÚ guna aldafín, asma diirí an didá' ilahhooadá' ta da/aa/an kawa hanmiisi, nee ilahhooár balaangw nee ar di/i nee ilahhooár wayda ar muruú ta tsu/i, asma kitangwduú ilahhooa oo taa tleéhh ar muqslír sirdaa/aat i bu'utiiká ilahhooa sleémeerowo.

⁶⁵ Solomon deelo faanqw nee deelór hatlá' faanqwe, dinkwaaro deelo mibaá nee tsiyáhh, deelór ur kana tleéhh dír geeraá AAKOÓ MUNGÚ wa ale, inós nee múk Israeli sleémeero, a boo/oó yaariír kudá' amór dahmuú Hamati ngiwa tlay ay yaaér Misri.

⁶⁶ Bál dakaate Solomon muu guna deelór báy, inooín waawutmo kuri tsuúq. Tari waátl amór maraay ar bara/, nee qwal/uú úr, asma hhooeemaadá' AAKOÓ MUNGÚ aa tleéhh dír sagadiyusmoowós Daudi, nee dír mukós Israeli.