1 WAAWITÁ 7 - Biblía Axweesantá Hhohho' ar Mungú 2004

Doó waawuti'iimár Solomon

¹ Solomon do'ós guna tleéhh har kureeraá mibaá nee tame, do' sleémeerowo guri hhe'eés.

² Do' guna tleéhh baraá gartá Lebanoni, tlenaangós a miíta mibeeri tsiyáhh nee tsiyáhh, bihheero a miíta mibeeri tsár nee tsár, tlenaangós oo gawa a miíta mibaá nee tám nee tlaqi. Waqasuú tám oo sahhta guna gáwtá wa hhaáf nee waqasuú sahhta i gawaá uheemi.

³ Umuúqo hhaywo uheemi ngi kon mibaá nee kooán. Uheemidá' kina waqasií qaás oo miberaá tsiyáhh nee kooán, kutuwáy kuna tlehhiít gawaadá', daári gari tleéhh ar peehhoó sahhta.

⁴ Hha'aá tám awa pa/eeri awa ti ga/aawá' i dayá'.

⁵ Afér do' sleémeero tlenaango i alqoón, tam pa/eeraá ti afe ga/aawá' i alqoná' sleeme.

⁶ Matla/ángw kwasleema guna tleéhh ar xaai, tlenaango a miíta mibeeri tsár nee tsár nee bihheero a miíta mibaá nee tám nee tlaqi, geeraá do'o dír iwitanaangw i deer, geeraá didár iwitanaango uheemi i dayá', didae gar/áy i deer nee hhafeetaá urene.

⁷ Matla/ángw kwasleema oo kitángw waawuti'iima guna tleéhh as qaa/oó muu nguwa baraadá' wa tlaaqi. Matla/aanguú kwasleema kuna parootuús ar peehhoó sahhta iimír baráy wa tleemu ay gawaá daári.

⁸ Do'ós oo iwa hooti i dír hatlá' baraá do'o, alaá doó kwasleema. Uraywo aqo adór doó kwasleema, slám doó dasír Farao guna baraadá' i tleéhh, tí a tidá' Solomon aa duúx.

⁹ Marayká' sleémeero gár kira tlehhiít a tlaa/aá tlaxo uren awa taa alqomeemeés ar masmeno baraá gura' nee daanduuwo, iimír iihhafiiri ay tlaa/aá gawa, nee awa tsee/a sleeme tam ay matla/ángw úr oo kwasleema.

¹⁰ Iihhafirír do' sleeme a tlaa/aá tlaxo uren, tlaa/aá diren, tlenángw tlaa/anoó wák a miíta tsiyáhh nee bihheero a miíta tám nee tlaqi.

¹¹ Gawto gár aa qaás a tlaa/aá tlaxo uren, tlaa/aá taa tsiíhh ar adór qoom nee peehhoó sahhta.

¹² Matla/angwdá' úr oo kwasleema bihhe sleémeero gár kura tleéhh a hha'aá tám awa tlaa/aá taa tsiíhh, hhoó wák oo xaa'aá sahhta. Adoorí an adór matla/angwduú Doó AAKOÓ MUNGÚ sleeme kura tleéhh, nee afeenidár alaá do'o.

Gadiyér Hiramu

¹³ Waawutmo Solomon muu guri ya/aáw Hiramu kuwa leehhi Tiro.

¹⁴ Inós an garmoó kwaalo'o ar tlahhoó Naftali, nee baabuúwós a heé Tiro, kareeramoó muqslár da/aten. Hiramu ku ló'wa dahár nee ku sagaloó', a heé gadiyér muqsla ga ló'wa xuú'. Iri hardáh amór Solomon, gadiyeeduuwós sleémeero giri tleéhh.

Uheemaá tsár awa muqslár da/aten

¹⁵ Hiramu uheemaá tsár awa muqsladá' da/aten gina tleéhh, tlenángw gawa har miíta dakaát, nee harweerarós a miíta kooán nee tlaqi.

¹⁶ Slam'aá tsár awa muqslír sirdaa/aat ar aa weeqatís giri qaás gawaá sagér uheemi, tlenángw gawa a miíta tsár nee gár niiná nee slamángw tsár tlenaangós aqo miíta tsár nee gár niiná sleeme.

¹⁷ Hhutleemi gina hhuútl awa tsár i alqoná' nee himtaawe gari tleéhh, gari qaás gawaá slamangwdá', guri qaás gawaá sagér uheemi. Himtaawe a faanqw gawaá slamángw wake, tam oo tsár, aqo adoorí sleeme.

¹⁸ Sleeme slaqsoó mamaá komamaánga guna tleéhh ar hha'aá tsár, gina tareereín gawaá slam'iidaá uheemi ngaa harweeriye'.

¹⁹ Slam'iidá' taa qaás sagér uheemaá matla/ángw iwitanaangw, gina parootuús ar /ayór ta bay yungiyungi, tlenaango a miíta tsár ga nakakaa/.

²⁰ Slam'aá tsár i malé gawaá sagér uheemaá tsár, nee slám i bihhaá guhhér bihhér hhutleemiidá', nee slaqsa'aá mamaá komamaánga awa tsiire tsiyáhh gina hhai tsár tleéhh, giri umuúqo uhmór harweér.

²¹ Uheemi giri sihhtís baraá matla/ángw doó Mungú, uhmoó bihhaá basa guri sihhtís umuuwós guri báy «YAKINI,» uhmoó bihhaá /iya guri qaás, umuuwós guri báy «BOASI.»

²² Nee gawaá uheemiwo /ayór ta bay yungiyungi kana qaás. Gawaá adoorihe, gadiyér uheemi iri hhooeér.

Tlahhsár ma'aay ar taa tleéhh ar muqslír sirdaa/aat

²³ Aluuwo tlahhsár ma'aay ar muqslír sirdaa/aat ar ta weeqatís gari tleéhh. Didá' gaa harwet gana tleéhh, saweemaá baraay a miíta tsár, nee gawa tlenaangós a harqoomoó miíta tsiyáhh nee tlaqi, nee harweeramoorós a miíta mibaá nee tám nee gár niina.

²⁴ Kankemoodaá guruú baraywo muruú gaa harweer i deer, oo adór dahharoó muqsla oo tlenaango miíta mibaá nee tám nee tlaqi. Muruuwí tlahhsaadá' gana harweér hhai tsár, dahhaaráywí kwaa tleéhh a qoomár tawa tlahhsár tlehhiiti.

²⁵ Tlahhsaadá' kari qaás gawaá slaqsa'aá awér mibaá nee tsár ar taa tleéhh ar muqslár da/aten, ar tám i /iikú ga/eér, ar tám i /uwaá ga/eér nee ar hatlá' tám i baskú ga/eér, nee ar tám i da/aá ga/eér. Tlahhsadá' kana qaás gawaá daandemooín, aler'ín sleémeero i baraá guruú do'.

²⁶ Kaankirós yangaremaawo a milimiíta mibeeri faanqw, tlehhmuuwós a adór /ayito'o. Tlahhsaarí gár ir hats a liíta kume mibeeri tsiyáhh.

Gaardaá taa tleéhh ar muqslár da/aten

²⁷ Gaardaá faanqw awa muqslaadá' da/aten gina tleéhh, umuú gaáriro tlenaangós a miíta tsár ga nakaa/, bihheerós aqo malé adoodá', tlenaangós oo gawa a miíta wak nee gár niiná.

²⁸ Garduuká' adór kira tleéhh a adoorí. Boh'e gana tleéhh ar sihhteeraá muqsla gi oh, sihhteeriiká' dabe ngiri oohiyé'.

²⁹ Gawaadae slaqsa'aá direeri gina tleéhh, nee awa awe nee oo muruudá' ta bay keruúbi, nee slaqsi'iikaá direeri nee awa aweero kina warqeemaá taa parootuúsí hhaáf.

³⁰ Umuú gaáriro i /angegeamaá tsiyáhh koón awa muqslár da/aten, muqslár kira óh a muqslár da/aten. Bihhe tsiyahhawo kiteeraá taa tleéhh a muqslír daa/aat nee baraá tla/aango muqslár da/aten i deer ar taa weeqatís as iimpe kawa gawaadií iwitisi. Umuú kitaango kwa parootuús ar /ayór taa tleéhh, ar harweeririim umuúqo bihhiiwo.

³¹ Afkú gaári oo aa gáwtí ti'iit a tlaqtá miíta, guruú tsee/aawo afkú do' kwaa qaalín nee qaalirós bihhe sleémeero i alqoón ala a harweermorooká.

³² Nee /angegeamaadá' tsiyáhh i baráy dirii'iyá' awa sihhteeridá' muqslidá' tla/aángwí dirii' tidá' /angeegé' gwaa harwet, kaa haragaás nee gaári. /Angeegeamoó wák tlenaango a sentimiíta mibeeri lahhoó' nee lahhoó'.

³³ /Angeegeuuwí a adór kuduú gaárír faras i uuruxun, nee muqslaadár tla/aango, nee harweermoorose, nee muqslaadár baraá guruú /angeege'e, muqslaarí sleémeero kana weeqatís.

³⁴ Umuú bihhaá baraay awa gaáriro, muqslír ga gáwtí koom kana qaás, muqslirí kaa haragaás nee gaári.

³⁵ Dír sagér gaarduukae hima i deer tlenaangós a sentimiíta mibaá nee dakaát gawa keemuuwo, nee wa/aamér ohiingós tidá' gáwtá haar nee dabeero tina oohiyé nee gaári.

³⁶ Slaqsa'aá keruúbi nee diraangw nee slansla giri gooín gawaá pa/eeraá naa meetiye' tla/ángw wa/ameedár ohiingw nee gawaá dabeero, gari harweér ar qaali.

³⁷ Naagáy gaarduuká' mibaangw gina tleéhh ar adór wák.

³⁸ Darama'aá mibaangw gina tleéhh ar muqslár da/aten, umuú gaáriro nee daraámuuwós. Baraá daraámuú wake ma'aá har liíta tsiire dakaát in faakiya'. Daraámu bihheero miíta tsár ga nakaa/.

³⁹ Gaardaá kooán gina qaás bihhaá basa awa do', nee awa kooán bihhaá /iya awa do'. Tlahhsaadá' gari qaás bihhaá baskú alda/aáw awa do'.

xooslaá doó Mungú

⁴⁰ Hiramu hutli'i gina tleéhh sleeme, nee kureemaá hhasaangw kwakwahh, nee búklaywo. Hiramu gadiyeédár waawutmo Solomon ar doó AAKOÓ MUNGÚ sleémeero gari adoorír faák.

⁴¹ Uheemaá tsár, nee búklaydá' urén ta slam'ií qamin gawaá uheemiiwo nee himtaawér tsár ar ta búklár tuuntukun kuduú gawaá sagér uheemi.

⁴² Slaqsa'aá mamaá komamaánga a tsiire tsiyáhh as himtaaweedá' tsár, hha'aá tsár awa komamaánga ar umuúqo hhutlmoowo, kina parootuús ar slam'iidaá gawaá sagér uheemi.

⁴³ Sleeme gaardaá mibaangw gina tleéhh, nee iimpu mibaangw i gawaá gaarduudá'.

⁴⁴ Tlahhsár wák gana tleéhh nee awér mibaá nee tsár gari baráy wa qaás.

⁴⁵ Nee hutli'i nee kureemi nee búklaay. Xosluudá' sleémeero Hiramu aa tleéhh as waawutmo Solomon baraá doó AAKOÓ MUNGÚ sleémeero ar muqslár taa weeqatís.

⁴⁶ Waawutmo dír muqslaadá' ngiwa weeqatís a baraá xatstá Yordani, dír hhapeedár tleei ar tla/ángw Sukoti nee Saretani.

⁴⁷ Solomon xosluudá' sleémeero gina máy sleeme gaa qoomeesiiká, asma ki ló'wa ur. Tam sleeme iilooeemaá muqslár da/aten ki xuiiká.

⁴⁸ Solomon xosluudá' sleémeero dáw baraá doó AAKOÓ MUNGUHE gana tleéhh, kitangwduú ilahhooa oo sahaábu nee meésár sahaábu as kawa mikaátér Mungú i qamin.

⁴⁹ Kiteeraá tsaa'aso ki qamin gár kira tleéhh a sahaábuú hhohhó', ar kooán bihhaá basa nee ar kooán bihhaá /iya. Baraá kutuwidár baraá do' kiteeraá tsaa'aso gár kira tleéhh a sahaábuú hhohhó', nee /ayo nee tsaa'aso nee oohamaayi, sleémeero awa sahaábu.

⁵⁰ Slooqi'i nee makasoó taámbay tlaqa nee búklayduú mooyango nee hhaansa'aá asla taatahhaango, sleémeero gár kira tleéhh a sahaábuú hhohhó', nee nahhtá taa tleéhh ar sahaábu ar afér maandár baraá guruú do', didá' ak hhoohhoo', nee afkú dahmuú baraá matla/ángw Doó AAKOÓ MUNGÚ, nahha sleémeero ar sahaábu.

⁵¹ Gadiyér waawutmo Solomon aa tleéhh as doó AAKOÓ MUNGÚ iri hhooeér. Naagáy Solomon muruudá' baabuúwós Daudi aa hhoohhooeés guri dahaás baraá do'. Muruudá' an peésa, nee sahaábu, nee xoosluuwo sleémeero giri baáts baraá qaasír Doó AAKOÓ MUNGÚ.