1 WAAWITÁ 6 - Biblía Axweesantá Hhohho' ar Mungú 2004

Solomon i doó Mungú tlehhiit

¹ Kurkú tsiire tsiyáhh nee mibeeri dakaát alaá múk Israeli niwa yaamaá Misrír wa ti'iít, kurkú tsiyáhh oo waawuti'iimár Solomonuwo daanduú Israeliwo, slahhángw tsár oo ta babay slahhángw Sifu, Solomon Doó AAKOÓ MUNGÚ guna iimu/ún tlehhmuuwo.

² Do'owí Solomon aa AAKOÓ MUNGÚ i tleéhh, tlenaango a miíta mibeeri tsár nee faanqw, nee uroó bihheero miíta gwaleél nee tlenángw gawto a miíta mibaá nee tám nee tlaqi.

³ Matla/ángw geeraá do' uroó bihheero a miíta tsiyáhh nee tlaqi, uroó bihheero i alqoná' nee do', tlenángw baraywo a miíta gwaleél.

⁴ Doó Mungú guri pe/eeraá urén i tleéhh nee koo/ír guruú tsee/a gay pe/eeraá ninákw i tleéhh.

⁵ Koo/ír do' gana harweér ar kutuwaay, kuká' tina oohiyé' nee koo/ír do' umuúqo diiro ar doó saalingo nee ar do'duú baraá guruú do' i diriia. Kutuwoó bihhér do' guna tleéhh bihhe sleémeerowo.

⁶ Kutuwidár baraay bihheero a har miíta tsár nee tlaqi, nee kutuwír qoroófár geera bihheero a miíta tám ga naká/, nee bihhér kutuwír qoroófár tsár a miíta tám nee gár niiná. Kutuwáywí ti slaslayká uraywo, asma Solomon uroó koo/idár tsee/a guna /aareés as kahhó' uheemidá' taa dó' ar tleéhh mitiwa oohiyé'.

⁷ Qoomár do' kuwa tlehhiiti kuna tleéhh ar tlaa/aá taa qaroó hhaásl, tam afór yundu laqaá ar tsawo, laqaá tam ar muqsli gaala ar ta axas i káhh qoomár tawa tleehhiti.

⁸ Afér kutuwayduú baraay kana tleéhh baraá koo/ír do' bihhaá basa, baraá guruudae tsa/a/amto i deer ar tar tsa/a/an amór qoroófár geera nee ar alhhe'eesáy.

⁹ Naagáy adoorí an adór Solomon do' ngura tleéhh, gway hhe'eés, guri daarírií tleéhh ar peehhoó sahhta.

¹⁰ Kutuwaay guna tlehhahhiít bihhér do' sleémeerowo, umuúqo qoroófaro gawa kemuuwo a miíta tsár nee gár niina. Kutuwaydá' guri haragaás baraá do' ar waqasuú sahhta.

¹¹ Qoomaarihe Solomon axweesantá AAKOÓ MUNGÚ gay axaás ar kah,

¹² «Gawaá daanduú do'owí ta tlehhita, barnaxés kaahir'eé' aga ót, axweesante'eé' kay iialooés nee tari hót baraá daber'eé' wa alé, daqaní aníng muruudá' naa baabuúwók Daudi al'axweés u boo/eés.

¹³ Aníng an hoót tla/ángw múk Israeli wa ale, muk'eé' kwí oo Israeli u baloó geexawaaká.»

¹⁴ Naagáy Solomon do'owí guri tleéhh guri hhe'eés.

Alhhe'eesár gadiyér baraá guruú do'

¹⁵ Koo/ír do' gana baraá guruú dó' wa tleéhh ar peehhoó sahhta iimír matla/ángw wa tleemu ay waqasuú daáriro sleeme, nee matla/aangw guna tleéhh ar peehhoó beroshi.

¹⁶ Kutuwidár baraá guruú do' tidá' ta bay didá' ak ló'wa hhoohhoo', kana tleéhh amór alaá do'. Kutuwidá' kana tleéhh ar peehhoó sahhta iimír baraá matla/ángw wa tleemu ay gawaá daári, tlenaangós a miíta gwaleél.

¹⁷ Didá' hhoohhoo', tidá' geeraá didá' ak hhoohhoo' tlenaango a miíta mibaá nee dakaát.

¹⁸ Baraá guruú do'o peehhoó sahhta kuna qaalín ar slaqsa'aá dahhaaráy nee /ayór aa /ayus. Umuúqo diiro peehhoó sahhta kuna qaás, tam tlaa/e sleeme ki geehhoeeká.

¹⁹ Baraá kutuwidá' ak hhoohhooe Solomon dii gana amohhe'eés as kahhó' sandakmooduú alqadór AAKOÓ MUNGÚ nguwa baraadií qaasi.

²⁰ Kutuwirí tlenaango a miíta gwaleél, nee bihheero aqo malé miíta gwaleél, nee tlenángw gawa sleeme a miíta gwaleél, kari parootuús ar sahaábuú hhohhó'. Kitángw ilahhooa guri tleéhh ar peehhoó sahhta.

²¹ Naagáy Solomon do' guri parootuús baraá guruuwo ar sahaábuú hhohhó', guri qasiís ar himtaawér sahaábu geeraá kutuwidár baraá do', didá' gari parootuús ar sahaábu.

²² Do' sleémeero guna parootuús ar sahaábu, do' sleémeero iri hhooáy. Kitángw ilahhooa oo didá' ak ló'wa hhoohhoo' guri parootuús as sahaábu.

²³ Slaqsa'aá tsár awa muruú hhaampa'aá koó oo ta bay keruúbi giri tleéhh ar peehhoó seituúni, giri qaás didá' ak ló'wa hhoohhoo'. Umuú slaqsaywo tlenaangós oo gawa a miíta tsiyáhh nee tlaqi.

²⁴ Hhampuú wák oo slaqsayduú keruúbi tlenaangós a miíta tsár nee gár niiná, iimír ságw hhampuú wák ay ságw hhampuú hatlá' a miíta tsiyáhh nee tlaqi.

²⁵ Slaqsayduú tsár oo keruúbi, tlenaango a miíta tsiyáhh nee tlaqi. Slaqsi'iiká' tsaraawo umuúqo adooro ti slaslayá'.

²⁶ Tlenángw gawa oo slaqsoó keruúbi oo wák a har miíta tsiyáhh nee gár niiná, nee oo tsár aqo adoodá'.

²⁷ Slaqsi'iiká' tsaraawo gina qaás didá' ak ló'wa hhoohhoo', nee hhampe'eeri'ín gina bihheérí gana'aás. Umuúqo slaqsoó keruúbiro hhampuuwós oo wák ina hardáh baraá koo/i, hhampe'eeri'ín awa hatlae tiri doogiyé' tla/ángw do'.

²⁸ Slaqsi'iikaá keruúbi sleeme gina parootuús ar sahaábu.

²⁹ Koo/ír do' sleémeero gana qaalín ar slaqsa'aá keruúbi, nee awa slaansla nee awa /ayór naa /ayus ló'wa ale, umuúqo kutuwiro gana adoorír qaalín.

³⁰ Matla/aangw sleeme guna qaalín ar sahaábu, guruú do' nee tsee/aawo.

³¹ Afér dahmuú baraá do' gana tleéhh ar peehhoó seituúni. Duxutmo nee nahhto gina guhhér kooání tleéhh.

³² Adoorihe afér tsár gana tleéhh ar seituúni, gari parootuús ar slaqsa'aá keruúbi, nee slansla nee /ayór naa /ayus. Slaqsi'iidaá keruúbi gina parootuús ar sahaábu nee ar slansla sleeme.

³³ Adoorí an adór nahhtá afkú dahmaá didá' hhoohhoo' baraá doó saaliingw ngira tleéhh ar seituúni bihhe tsiyahhawo.

³⁴ Afér tsár gár kara tleéhh a peehhoó beroshi nee peehhoó afkú do' oo tsár oo dinkwárí waageqawa ga ya/aám, nee peehhoó tsár oo afkú doó tsár a kwí dinkwárí waageqawa ga ya/aám sleeme.

³⁵ Guna qaalín ar slaqsoó keruúbi, nee slansla nee /ayór aa /ayus, gari parootuús ar sahaábu hhohhó'.

³⁶ Afeenidár guruú do' gana tleéhh ar hhai tám ar tlaa/aá taa daákw nee hháw wák guna tleéhh ar peehhoó sahhta.

³⁷ Kurkú tsiyáhh iimír Solomon waawuti'iima ngiwa iimu/ún slahhángw ta bay Sifu, gídaabá slahhángw tsár, doó AAKOÓ MUNGÚ guna iimu/ún tlehhmuuwo.

³⁸ Tam baraá kurkuduú mibaá nee wake iimír Solomon iwa waawuti'ín, slahhángw ta bay Buli gídaabá slahhángw dakaát, do' ina hhooáy nee umuúqo gaarose, ar adoodá' kara oó'. Har qoomoó kureeraá faanqwe Solomon i baraá tlehhma.