1 WAAWITÁ 4 - Biblía Axweesantá Hhohho' ar Mungú 2004

Solomon nee geeraharuuse

¹ Waawutmo Solomon yaamaá Israeli sleémeero gina sawaawuti'ín.

² Nee múk urén oo i kon a kwí: Asariya garmoó Sadoki an kaahamusmo.

³ Elihorefu nee Ahiya daaqoó Shausha, a goouuse. Yehoshafati garmoó Ahiludi, an heé muruú inslaslángw wa hariím gun gooii'ín.

⁴ Benaya garmoó Yehoyada a geeraharusmoó slaqwaruuse, Sadoki nee Abiatari an kaahamuusér Mungú.

⁵ Asariya garmoó Natani a heé úr oo geeraharuuse, nee Sabudi garmoó Natani an kaahamusmoó Mungú nee an mulqumoó waawutmo.

⁶ Ahishari a heé úr oo doó waawutmo, nee Adoniramu garmoó Abda an sagesihhtusmoó mukdá' taa /uurutís baraá gadiyeé.

⁷ Solomon múk urén oo geeraharuuse ngu kon a mibaá nee tsár baraá Israeliro. Mukwí a muruú /aymár waawutmo ngun huwahuwiyá' nee oo múk do'ose, umuú heewo har qoomár slahhángw wake muruú /ayma gun huwahuuw baraá kurko.

⁸ Umér geeraharuseedá' uren a tí: Ben-huri yaamaá tlom'aá Efraimu gina óh.

⁹ Ben-dekeri yaamaá Makari, nee Sha'albimu nee Beti-shemeshi, nee Elon-bet-hanani gina óh.

¹⁰ Ben-hesedi a yaamaá Aruboti nee Soko sleeme nee yaamaá Heferi sleémeerowo gina óh.

¹¹ Ben-abinadabu, a yaamaá Nafat-dori sleémeero, gina óh. Kudá' Tafati dasír Solomon gaa duux.

¹² Ba'ana garmoó Ahiludi, yaamaá Tanaki nee Megido, nee Bet-sheani sleémeerowo ar bihhaá Saretani, baraá Yesre'eli, iimír Bet-sheani ay Abil-mehola, tam ay Yokmeamu gina óh.

¹³ Ben-geberi yaamaá Ramot-gileadi gina óh dinkwa nee yaamaá Gileadi kudá' dabaá Yairi diriiá' garmoó Manase ay yaamaá Argobu, kudá' Bashanirí diriiá'. Gixsadaá uren a mibeeri lahhoó' awa taa harweér ar waaydaá muqslár sirda/aten.

¹⁴ Ahinadabu garmoó Ido, yaamaá Mahanaimu gina óh.

¹⁵ Ahima'asi yaamaá Naftali gina óh, inós dasír Solomon ar ta bay Basemati gana duúx.

¹⁶ Ba'ana garmoó Hushai yaamaá Asheri nee Bealoti gina óh.

¹⁷ Yehoshafati garmoó Parua yaamaá Isakari gina óh.

¹⁸ Shimei garmoó Ela yaamaá Benyamini gina óh.

¹⁹ Geberi garmoó Uri yaamaá Gileadi gina óh, nee yaamaá Sihoni waawutmoó Amori nee awa Ogu waawutmoó Bashani. Nee geeraharusmoó wák kuna qaás baraá yaamaá Yuda.

Solomon waawuti'iima gwaa alya/aán

²⁰ Xoorór Yuda nee ar Israeli ki ló'wa yaariir adór hhasángw afaá tlawi, nina /ayné' nay wahané', niri qwalaala/iyé'.

²¹ Solomon xoordu sleémeero gina sawaawuti'ín, iimír yaaér Eufrate wa tleemu ay yaamaá Filisti ay digmuú yaamaá Misri. Inooín nguna koódírí hanmiisiyé', nguri sagadiyuusiyé' baraá slafiingós sleémeero.

²² Muruú /aymár looár wák oo doó Solomon a darami'i mibeeri tám awa puuruú hhohhó' nee puuruú hatlá' darami'i mibeeri lahhoó'.

²³ Hikwaá wahhaará' mibaangw nee hikwaá baraá tleesani a mibeeri tsár nee bee/aangw tsiiru, nee tlaaqata, nee saaraga, nee tsagna, nee koonkár wahhaar.

²⁴ Asma inós ina waawuti'ín daanduú yaamu sleémeero, iimír bihhaá /uwa awa yaaér Eufrate, nee Tifsa wa tleemu ay Gasa, waawitá sleémeero kuduú bihhaá /uwa yaaér Eufrateero guna sawaawuti'ín. Inós nee xoordu sleémeero kudaá inslawaay tana hoót ar wayda.

²⁵ Xoorór Yuda nee ar Israeli tari hoót ar saxareemo umuú heewo dír sabiíbuuwós nee dír /aantsírós, iimír Danír wa oohang ay Be'er-sheba, deelo sleémeero ar Solomon tawa waawutmo.

²⁶ Solomon maraá faras ngi kon a kume mibeeri tsiyáhh nee gaardaá faras i uuruxuna' nee gaarduine, nee múk faras ngwaa i tsa/an a kume mibaá nee tsár.

²⁷ Geeraharuuseedá' mibaá nee tsár an múk muruú /aymár huwahuúw dír waawutmo nee dír mukdá' dír doó waawutmoó wa /ayayiím, umuú heewo baraá slahhaangose gár aa /aaruur i káhh.

²⁸ Umuúqo heewo baalaarós iwa xeér angaánoó shayiíri nee gitsór faras i /ayi gana huúw nee makaydá' tii'íngw baalá'.

²⁹ Mungú Solomon guna sagalooárí haniís nee tsaahha nee xu'utír yaariir adór hhasángw afaá tlawi.

³⁰ Solomon múk yaamaá da/aáw nee oo Misriro gi baa/ sagalooaro.

³¹ Asma sagalooa ngiwa kon a muu sleémeero ba/a, ta Etaniwo heé tlahhoó Esrahi, nee Hemani nee Kalkoli, nee Darda, inooín a daaqoó Maholi, inós iri iiatleerúy baraá xoordaá inslaawaywose.

³² Inós axweesanoó sagalooa oo kume tám guna káh, nee daa'angós a kumuú wák nee kooán.

³³ Kángw xaai guna káh, iimír sahhtír yaamaá Lebanoni nee xa'anoó ta bay hisoópo, kudá' koo/ír do' gaa alti'iit, slám kángw daanduú makaay guna axweés nee oo tsir/ooro nee daa'aweemaá makaá qanhhuumisá' nee kudá' tseerdu tsatsaa'aren nee siyó.

³⁴ Múk xoordu sleémeero guri i daqaaqáy as sagalooarós kawa axamiisi, iimír waawituú yaamu sleémeero kudá' kángw sagalooár Solomon ngwaa axaasiye'.