1 WAAWITÁ 21 - Biblía Axweesantá Hhohho' ar Mungú 2004

Qaymór sabiíbu ar Naboti

¹ Naboti a yaamuloousmoó Yesre'eli, inós qaymór sabiíbu ga kón amoodár Yesre'eliro. Qaymoorós i bihhaá doó Ahabu, waawutmoó Samaria.

² Kár looarka wake Ahabu Naboti guri báy, «Qaymoorók tisíng ar sabiíbu haniisang, aníng a qaymor'eé' ar naanú tleéhh, asma ka tseew bihhaá dooeé' i aleeró. Qaymór hatlá' ar hhoohhoo' tók ngi amór hatlá' wa sláw, laqaá bar peésa an slá' ngi haniís.»

³ Ala Naboti iri oó', «Aalír baabi'iieé' naa haniisiyé' ngiwa kuúngí haniis, AAKOÓ MUNGÚ ngi amór saáwí pa/asi.»

⁴ Ahabu iri waátl ar mune nee gurhaamír yaariir, as Naboti yaamuloousmoó Yesreeli nguwa báy aalirós ga baloó hanisiiká. Ahabu iri qaát gawaá qatanirós, sagós guri tuuntuúk, muruú /aymaaro iri muunuút.

⁵ Hareerós Yesebeli guri i daqeér guri beér, «Ahaá waáy ma gurhaamút, baré sleeme /ayma aga meér?»

⁶ Inós iri oó', «Asma aníng Naboti heé Yesre'eli una báw, ‹Qaymoosíng ar sabiíbu dir'eé' ni weerisang, laqaá qaymór hatlá' ngi haniís kitaangós wa ale.› Ala inós iri báy, ‹Qaymor'eé' ar sabiíbu ngi hanisaaká.› »

⁷ Yesebeli guri beér, «Waawutmoó Israeli a heemá? Ahaá a kuúngeéke? Qwaláng, tlawáng, /ayiím, qwalalaá/ sleeme. Aníngár kilá' qaymór sabiíbu ar Naboti, yaamuloousmoó Yesre'eli, ngi haniís.»

⁸ Naagáy Yesebeli barwadu giri gooiín ar umuú Ahabu nee giri dugunoó waawutmo i qás. Barwadu giri ya/áp amór bariise nee múk iia tleér kudá' nee Naboti hootá' baraá gixsár wa alé.

⁹ Barwiito'oodá' taa gooín adór kara gooín an adoorí, «Afór gwaawito ilahaniisaak, muu burumburaak dinkwaárí ale, nee Naboti iwiitisaak dír ilaiwa/amér koom.

¹⁰ Daqaní múk tsár oo gu lamtí tsaát ku sleerá', oo gu báw, ‹Kuúng waawutmo nee Mungú iga /ooslisliín.› Daqaní ku tsee/í duxá', ku tlaa/ér tlaqutá', i gwaai.»

¹¹ Naagáy yaamuloousér ayaá Naboti nee bariise nee mukdá' xirfuú koóm oo baraá gixsadá' adoodá' Yesebeli aa ó' kana tleéhh. An adoodá' barwito'odá' i kat.

¹² Afo kari ilahaniís ar gwaawito, muu kuri dinkwárí burumbuúr, Naboti kuri qaás dír ilaiwa/amér koom.

¹³ Mukdaádá' tsár oo lamuuse iri iwiít Naboti nguri ilií duxuné', muu nguri bayé', «Naboti Mungú nee waawutmo gaa /ooslislín.» Naboti kuri duúx tsee/aá gixsárí ale, kuri tlaquút ar tlaa/e, kway gaás.

¹⁴ Ya/abto kari ya/aáw amór Yesebeli, kari báy, «Naboti kwaa tlaquút ar tlaa/e. Aa gwaá.»

¹⁵ Yesebeli ngiwa axás adór Naboti kura gaás ar tlaa/e, Ahabu guri beér, «Sihhiitáng, qaymoodár sabiíbu ar Naboti, heé Yerse'eli, tidá' aa /itín aaleek, Naboti i kaahh aa qaroó gwaá'.»

¹⁶ Naagáy Ahabu ngiwa axaás adór Naboti ira qaroó gwaá', iri tláy baraá qaymoodár sabiíbu ar Naboti, heé Yesre'eli as ngiwa aali.

¹⁷ Naagáy aarusmo Eliya, heé Tishbe, axweesantá AAKOÓ MUNGÚ gari axaás, i kat,

¹⁸ «Tláw ti doge' nee waawutmo Ahabu oo múk Israeli, kudá' baraá gixsár Samariár hoót. Ga/aaweek, u baraá qaymór sabiíbu ar Naboti eér, aa baraadá' káy as ngiwa aali.

¹⁹ Inós ku beer, AAKOÓ MUNGÚ i kaahi, ‹An tsu/úta tay aaliín sleeme?› AAKOÓ MUNGÚ i kaahi, ‹Didá' tseerér Naboti kawa naatsín nee seeaawe, tók seeaawe ga didá' wa náts sleeme.› »

²⁰ Ahabu Eliya nguwa ár iri oó', «Aá wakusmooeé', iga harati'íti?» Eliya iri oó', «Án kuúng gár usa harati'iít asma kuúng tina kilók weerís baraá tlakweema dír geeraá AAKOÓ MUNGUHE.

²¹ Gimáy AAKOÓ MUNGÚ i kaahi, ‹Looeemaawo aníng amotlakwe ngi huúw dirógí aleeró. Aníng kuúng nee hhawaataá tlahhaywóge nu hhaamiís amór saáwí alé baraá yaamaá Israeliwo, tam heé lawaalmo laqaá oo lawaalmoowooká.

²² Múk do'ók u adór múk doó Yeroboamu tleéhh, garmoó Nebati, nee adór doó Ba'asha garmoó Ahiya, asma kuúng aníng iga ló'wa buhhtís, nee as múk Israeli kuwa baraá tlakweemáy dahás.›

²³ Slám AAKOÓ MUNGÚ i kaahi daanduú Yesebeliro, ‹Seeaawe Yesebeli ga /ák baraaká gixsár Yesre'élír wa alé.

²⁴ Eeít, heé do'oge gwaá' baraá gixsarí ale, seeaawe gu /ák, nee heé gwaá' baraá yaamaá xatsa, tsir/ór gawaá doori gu /ák.› »

²⁵ Heé adór Ahabu ga áw i kaahh oo taa kilós weeriis tlakweema tlehhtuwo dír geeraá Munguhe, kudá' taa mihaayín nee hareerós Yesebeli.

²⁶ Inós gár ta waki gana tleéhh, munguaá múk Amori ngiwa sluufmiís, mukdá' aáng AAKOÓ MUNGÚ aa guús geeraá múk Israeli wa ale.

²⁷ Alaá Ahabu adoorí ngiwa axaás, tlabaawós gina feehhamiís, guniya gana tsiít, iri gwaawín, iri guniyadúr guú' nee iri hi'iimiít ar gurhaami amorqá' nee tiqae.

²⁸ Naagáy axweesantá AAKOÓ MUNGÚ Eliya heé Tishbe gari axaás i kat,

²⁹ «Aga aándi Ahabu adór tira niinaweés dír geeraaeé'? Asma tiwa niinaweés ló'wa ale, aníng slahh'amaayeedá' a huwaaká qoomár inós bir slaaf, ala a qoomár waawuti'iimár garmaawose aníng doó Ahabu un hhaamiís.»