1 WAAWITÁ 20 - Biblía Axweesantá Hhohho' ar Mungú 2004

Slaqwarár múk Aramu nee oo Israeli

¹ Ben-hadadi waawutmoó múk Siria, slaqwaruuseerós sleémeero gari burumbuúr. Inós kuri alee/iís nee waawituú hatlá' mibeeri tám nee tsár, dinkwa nee farsuuín nee gaardaá ta uuruxun nee faras. Gixsár Samaria gana haraweél tari slaáqw.

² Ben-hadadi afo gari ya/aáw baraá gixsa, amór waawutmo Ahabu oo múk Israeli, kuri báy, «Waawutmo Ben-hadadi i kaahi,

³ ‹Peésaarók nee sahaábuwoge sleémeero a daqaari'iimar'eé'. Tlaawaywók kudá' hhohhó' nee na/iiwók sleémeerowo a kwe'eé'.› »

⁴ Waawutmoó Israeli iri oó', «A adoosíng kara ó', aá aakooeé' waawutmo, aníng a kók, nee tidá' sleémeero ni koom a tók.»

⁵ Aluuwo múk taa ya/aáw, ina malé kií/ dír Ahabu, ngway bayé', «Waawutmo Ben-hadadi i kaahi, ‹Aníng kuúng una i ya/abiím niwa kah, peésaarók nee sahaábuwo, tlaawaywók nee na/iiwoge haniisang.›

⁶ Hám daxta matlo qoomár adór tihe sagadiyuuser'eé' ngi ya/aáw as do'ók nguwa tsee/aríngw eer, nee maraá sagadiyuuseero, nee umuúqo gár isa slaiia ngiwa ar tlaya'.»

⁷ Ahabu waawutmoó múk Israeli geeraharuusér yaamuuwós gari ateét gari báy, «Ga/aawaak, heewí adór atén tir slahh'eemisuú wa slai. Afo ngina ya/aáw i tlaaway'eé' slaa' nee na/iieene, nee sahaábueene nee peésar'eene, aníng aga si'iiká.»

⁸ Bariise nee muu sleémeero tari oó', «Kuúng ma hhasliitaar, laqaá ma ya/amaar.»

⁹ Naagáy Ahabu múk tinda ya/aáw nee Ben-hadadi guri báy, «Aakooeé' waawutmo ku beera', ‹Tidár geera kuúng ta sla' aga ya/aám, ala tír tsare a baloó ya/aamaaká.› » Múk tinda ya/aáw nee waawutmo Ben-hadadi tari tláy kaangwí kuri oó' dír waawutmo.

¹⁰ Ben-hadadi afo gari ya/aáw amór Ahabu iwa kaahi, «Mungui aníng i gaasiye' nee ar hatlá' ngi doogiye' gawaaeé' ale, barnaxés hhapér yaamaá Samaria taataahha ngaa bú' dír slaqwaruuser'eene.»

¹¹ Waawutmo Ahabu iri oó', «Waawutmo Ben-hadadi ku beera', ‹Heé migusmo i durbaabin a baraá slaqwaraaro birna waátl, a qoomár bir slaqwarár ayká.› »

¹² Ben-hadadi kaangwí nguwa axaás oo Ahabu, inós nee waawitaduú hatlá' gwa alee/iis ta xufiit baraá islángw wa alé, mukós guri báy, «Ti amohhe'ese'.» Muu tiri amohhe'eés as gixsa kawa i haraatlay.

¹³ Qoomaarír kilae aarusmooko wák ina amór waawutmo Ahabu káy oo múk Israeli, guri báy, «AAKOÓ MUNGÚ i kaahi, ‹Boo/oó yaariír kwí oo askaári hám ugwa aándi? Aníng laarí ngi gawaá dabaawók qaás, daqaní kuúng a tsáhh adór aníng tar AAKOÓ MUNGÚ.› »

¹⁴ Ahabu iri oó', «Adoosíng adór ir tleehharut?» Aarusmo iri oó', «AAKOÓ MUNGÚ i kaahi. ‹In tleehharút ar dabér sagadiyuusér múk urén oo baraá ayeemo.› » Waawutmo iri oó', «A heemá heé slaqwara ngi giiriís?» Aarusmo iri oó', «A kuúng.»

¹⁵ Naagáy waawutmo Ahabu slaqwaruusér masoomba tidá' geeraharuusér slaqwara ar ayeemo giri artá áy, inooín a tsiire tsár nee mibeeri tám nee tsár. Nee slaqwaruusér Israeli ngaa sláy kume faanqw.

¹⁶ Naagáy /ameetleemuuwo Ben-hadadi iwa xufiiti dinkwa nee waawitadá' mibeeri tám nee tsár inós ngwaa alee/iisár aye' slaqwara iri iimu/uún.

¹⁷ Slaqwaruusér masoomba tidár geeraharuusér wilaya slaqwara gari iimu/uún. Qoomaarír kilae Ben-hadadi siitsawuuse gaa qaroó geerií ya/aáw, ala inooín afo ngay huwiyé' amór waawutmo Ben-hadadi tawa kaahi, «Daqtá muu ar Samariár daahh naa hardát.»

¹⁸ Ben-hadadi iri oó', «Inooín slafi ohiimare', gár nisa hardihiyé' tam slaqwara laqaá wayda.»

¹⁹ Naagáy slaqwaruusedár masoomba ar geeraharuusér ayeemo slaqwara kari geerahaár, slaqwararuusér múk Israeli gina alu hát.

²⁰ Umuú heewo dir'ine heé wák oo Aramu guna gaás. Múk Aramu tari goów, kiri eehár nee slaqwaruusér múk Israeli. Ala Ben-hedadi waawutmoó Aramu aa tsa/án gawaá farasirí ale, ina goów nee slaqwaruuse bahh'ale aa farsií tsa/aan.

²¹ Naagáy waawutmoó Israeli slaqwaraaro iri baalín, faras nee gaardaá ta uruuxun awa yaariir giri hayóh, nee múk yaariír oo Aramu guri tsuú/.

²² Naagáy aarusmoodá' iri amór waawutmoó Israeli káy iri oó', «Gimáy ti amohhe'es ló' wa alé, asma qoomár tsaaqwaaro waawutmoó Aramu slaqwaraaro i malé kii/.»

Slaqwarár tsár ar múk Aramu nee múk Israeli

²³ Waawutmo Ben-hadadi sagadiyuuseerós guri beér, «Munguaá múk Israeli a munguaá gawaá tlom'i an gár atén tisa baál. Gusé', nee inooín a baraá xatstá wa slaqwaán.

²⁴ Gimáy daxta adoorí tleehheek, waawitaáduú hatlá' oo mibeeri tám nee tsár hingeeseek, kitangw'ine geeraharuusér slaqwaruuse na qaaseek.

²⁵ Slaqwaruusér adór tidá' taa hhaamiís amohhe'eesang, farasi nee gaardaá ta uuruxun adór kudá' slawang. Daqaní atén nee inooín a slaqwaán dír yaamaá xatstá wa aleeró, baraadae aqo in tsuwa baalaán.» Waawutmo Ben-hadadi kaangwí guri iiárií qaás, nee adoorí gari tleéhh.

²⁶ Ala qoomár tsaaqwa waawutmo Ben-hadadi mukós guna burumbuúr, tari tláy ay gixsár Afeki as tawa slaqwi nee múk Israeli.

²⁷ Nee múk Israeli kuri burumbuúr, kuri xooslár slaqwarárí i haniís, tari tláy tawa slaqwi nee múk Aramu. Múk Israeli xafay'ín nguri tleehhiyé', inooín ki ló'wa niina adór daqoroó tsár oo ninákw oo aara, ala múk Aramu ku ló'wa úr, yaamu ngina alqaatiyé'.

²⁸ Heé Mungú iri tseewúy dír waawutmoó Israeli guri báy, «AAKOÓ MUNGÚ i kaahi, asma múk Aramu i kaahi, ‹AAKOÓ MUNGÚ a munguú gawaá tlom'i, a munguú baraá yaamaá xatstooká.› Gawaá adoorihe aníng kuúng u baalír i haniís dír slaqwaruusér yaariir ar Aramu, nee kuúng kay tsáhh, adór aníng tar AAKOÓ MUNGÚ.»

²⁹ Múk Israeli nee oo Aramu nina hootiyé' baraá xafáy wa ale deelo faanqw tiwa tawo amorqií ga/aya'. Bál faanqwe slaqwara iri iimu/uún. Slám baraá looarí wake slaqwaruusér Aramu ar hi'imiit kana tsuú/ kume tsiiruú wák.

³⁰ Kudá' naa meetiye' niri /akumitiyé' baraá gixsár Afeki. Didár gixsár Afekiro kiri i huuhu'ún nee koo/i, slaqwaruusér kume mibeeri tsár nee faanqw kari tsuú/. Ben-hadadi iri ta'aaín iri nahhaát baraá qul/irka ar baraá gixsadá'.

³¹ Sagadiyuuseerós guri beér, «Atén aga axaasaán adór waawituú múk Israeli ir gurtleemuú kón. Gimáy atén ti pa/aángwí hanis oo guniyadu kiwa siinootaan, nee hhutleemi kiwa tseegaan gawaá isoorén, daqaní atén waawutmoó Israeli un i daqawán, doóqa daqaní kuúng a tu/út.»

³² Naagáy guniyadu ngiri tsiitiyé', nee hhutleemi ngiri tseegiyé' baraá isooín i ale, niri tlayé' ay dír waawutmoó múk Israeli, nguri bayé', «Sagadiyusmoowók Ben-hadadi u firiirín i kaahi, ‹Gám na'ás mi gaasaar.› » Ahabu iri oó', «Hé', laatí i slaaf xáy? Inós a hhiyaaeé'.»

³³ Sagadiyuusér Ben-hadadi gár hhoo' birnga axás laya laqaamaro ta amohhe'esiyé'. Ahabu ooaro adoodá' ngiwa hhe'eés, inooín tari adaá oó'. «Eeít Ben-hadadi a hhiyaawók.» Ahabu iri oó', «Tlawsé', huwaare' dir'eé' ni alé.» Naagáy Ben-hadadi niwa hardáh, Ahabu gana slaá' tawa iwiiti gawaá gaárirós tidá' ta uuruxun.

³⁴ Aluuwo Ben-hadadi iri oó', «Gixsadu sleémeero kudá' baabuúeé' aa dír baabuúwók wa hayóh, aníng ngi ki/ís. Kuúng dír halaanu'uuma kawa tlehh iimu/umeek baraá Damaskoro adoodá' baabuúeé' ngira tleéhh baraá yaamaá Samariaro.» Ahabu iri oó', «Gimáy aníng kuúng u geemáw as adoosíng taa ó'.» Al'axweesani kari qaás, inós kuri geemáy.

Aarusmo i Ahabu lu'umis

³⁵ Heé wák baraá eeharusér aaruuseero hhiyaawós guna báy, «Aníng slahháng na'ás,» Asma kuna adoorír hara'ayín nee AAKOÓ MUNGÚ. Ala heedaádá' iri sií' slahhto.

³⁶ Inós guri báy, «Asma kuúng afór AAKOÓ MUNGÚ iialooeesaro kawa sí', hám daxta, bara diirí wa tleér, kuúng diraangw un oh.» Nee hamtidár kilae iwa didá' wa tláy, nee diraangw tari doogiyé', kuri óh.

³⁷ Naagáy eeharusmoowí wák oo aaruuse heé hatlá' guri báy, «Na'ás, aníng slahháng.» Heedaádá' guri slaáhh, guri tser'uús.

³⁸ Naagáy aarusmoodá' iri tláy, iri iwiít bihhaá loohi as waawutmoó Israeli nguwa dan, inós gitse/aawós gaa tseék warqamoowo, as munguwa tsaáhh.

³⁹ Waawutmo qoomár iwa waaraahhi aarusmoodá' iri oó', «Aáko, aníng a sagadiyusmoowók, qoomár slaqwaraaro a baraá hhoó geera, slaqwarusmooko wák heé naa óh, nguri dir'eénií huúw iri báy, ‹Heesíng xuumeek. Bira kotsqoót slafiingós u kók ar bú', laqaá ar peésár kume tám.›

⁴⁰ Ala aníng niwa gadiyuus heedaádá' iri /akuút.» Waawutmoó Israeli iri oó', «Adoosír kilá' an adór hariim sakwasleemaroge, kwasleemarók aga kilók tsát.»

⁴¹ Aluuwo aarusmoodá' warqamoodá' aa tseék gawaá gitsee/aawós guri gaanslár hingeés, inós kuri tsaáhh nee waawutmo inós tawa aarusmo.

⁴² Naagáy aarusmo waawutmo guri báy, «AAKOÓ MUNGÚ i kaahi, ‹Asma kuúng heé aníng niwa oó' ku gás, ugwa slafingwí meér, ala gawaá adoorihe slafiingós un bú' ar kók nee slafíngw mukós, un bú' ar slafíngw mukók.› »

⁴³ Naagáy waawutmoó Israeli iri waátl amór do'ós Samaria, muuna gwa gaás, slám ina ló'wa gurhamuút.