1 WAAWITÁ 19 - Biblía Axweesantá Hhohho' ar Mungú 2004

Eliya i baraá tloomár Horebu

¹ Waawutmo Ahabu do'o iwa hardáh kangwdaádá' Eliya a tleéhh, nee adoodá' aaruusedár Ba'ali ngira tsuú/, gari alki/iít dír hareerós Yesebeli.

² Naagáy Yesebeli harér Ahabu afo gari ya/áb amór Eliya, guri beér, «Mungui aníng i gaasiye' barnaxes slafiingók bura qo adór kuduú aaruuse tleehhiiká matlo siiwár adór tihe.»

³ Eliya iri da'ayuút, iri goów as slafiingós nguwa /iisi. Sagadiyusmoowós nee inose tari tláy ay Be'er-sheba baraá yaamaá Yuda, sagadiyusmoowós guri didaádá' i geexáy.

⁴ Eliya iri kumiít aaiiwo looa gari dahaás. Inós iri hardáh dír xa'anoó ta bay retemu, iri iwiít dír gamuú xa'anoodá', inós gwa'ara gari fitlín, iri oó', «A ido daxta aá AAKOÓ MUNGÚ, slafingw'eé' hingeeseek, asma án gár baabi'iieé' ngir baa/ i káhh.»

⁵ Inós iri qaát dír gamuú xa'anoó retemu, gu'ute guri ót. Naxés malaykamoó AAKOÓ MUNGÚ guri kwatiít guri báy, «Tlawáng, qwaláng /ayiím.»

⁶ Inós iri qaytsiít, mukaatmo guri ár i gawaá gil'o, nee dahhángw ma'aay i dír sagós i dirii'. Inós ina /ayín nee ma'aay giri wáh, iri qatií kií/.

⁷ Malaykamoó AAKOÓ MUNGÚ guri male tleés, guri báy, «Tlawáng, qwaláng /ayiím, asma aaiiká' ki male tleer diroge.»

⁸ Eliya iri tláy iri /ayín, nee ma'aay giri wáh, iri tláy ar /uuruú muruú /aymaadá' deelo mibeeri tsiyáhh tlatla/aangw nee xweeraawo iri hardáh tloomár Mungú.

⁹ Iri dáh baraá mar'i, iri qaát baraadá'. Naxés axweesantá AAKOÓ MUNGÚ, gana axaás iwa kat, «Eliya, kuúng gár ta tlehh a milá diirihe?»

¹⁰ Eliya iri oó', «AAKOÓ MUNGÚ, Munguú Aleesleemusmo, aníng da/i ina ló'wa ót as kuúng, nee as múk Israeli kudá' alqadoorók gaa sii', kiteeriwók kudaá ilahhooa ngaa fee/iyé' nee aaruuserók sleémeero ngaa tsu/iyé'. Aníng kilooeé' ana meét, slám hamí i gaasár wa slaiyá'.»

¹¹ AAKOÓ MUNGÚ iri oó', «Tláw, gawaá tlooma i sihhiiteek dír geeraaeé'.» Naagáy AAKOÓ MUNGÚ iri waaraáhh, nee fur'ár bambaao ar tlom'i gaa diya/, nee tla/u gaa porxomis ina fukuukú'. Ala AAKOÓ MUNGÚ i kaahh baraá fur'aarihe. Alaá bambaaooro kunseeli nay hardát. Ala AAKOÓ MUNGÚ i kaahh baraá kunseelidae.

¹² Alaá kunseelidae asla nay hardát. Ala AAKOÓ MUNGÚ i kaahh baraá asltadae. Aluudae afór niina tsatsa'aren iri hardát.

¹³ Naagáy Eliya afoorí ngiwa axaás gitsee/aawós giri tuuntuúk ar hiyaywós, iri ti'iít dír afkú mar'idá'. Afo gari axaás i kat, «Eliya, kuúng ma tléhh diirihe?»

¹⁴ Inós iri oó', «AAKOÓ MUNGÚ, Munguú Aleesleemusmo aníng da/i iga ló'wa ót as kuúng, nee as múk Israeli, kudá' alqadoorók ngaa si'iye', kiteeriiwók kudaá ilahhooa ngay fee/iyé'. Aníng kiloeé' ana meét, slám hám i gaasár wa slaiyá'.»

¹⁵ AAKOÓ MUNGÚ guri báy, «Kií/ ar loohirók tidár xaanxoó Damasko. Bara hardát Hasaeli di/i tir iimbalax as tawa waawutmoó Aramu.

¹⁶ Nee Yehu garmoó Nimshi di/i tir iimbalax as tawa waawutmoó Israeli. Elisha garmoó Shafati kuduú Abel-mehola di/ito ku iimbaláx as tawa aarusmoó kitaangók gu óh.

¹⁷ Naagáy heedaádaá /uy paángár Hasaeliwo, ar Yehu gu dakuská, nee kudaádaá /uy paángár Yehuwo Elisha gu gaas.

¹⁸ Ala múk kume faanqw baraá yaamaá Israeliwo kudá' Ba'ali gaa haratlintantiaaká laqaá gwa ma'aasiiká u tsu/aaká.»

Ateetamór Elisha

¹⁹ Eliya iri tláy didae, Elisha garmoó Shafati guna baraá dooslárí áy. Didaádae daqooroó awe mibaá nee tsár ar doosla i deer, nee awér Elisha ir doosli i alaá saawá' i dirí'. Naagáy, qoomár Eliya iwa waaraahhi hiyaywós guri duúx, guri kwaáhh gawaá Elisha.

²⁰ Qoomaadár kilae Elisha aweerós gari geexáy, Eliya guri alta'aaín, gway báy, «Gám daa deelo ngi oó' dír baabá nee aayihe, daqaní kuúng u eehár.» Eliya iri oó', «Tláw, ala tidá' uy tleéhh ka insleér.»

²¹ Naagáy Elisha iri kií/ amór Eliya wa ale, aweerós gari tsuú/, fu'unaay giri humín ar taaqwanayduú awe. Inós fu'unaydá' giri múkwí haniís, nee inooín ngiri /ayiyé'. Naagáy inós iri tláy, Eliya guri eehár, guri sagadiyuús.