1 WAAWITÁ 16 - Biblía Axweesantá Hhohho' ar Mungú 2004

¹ Axweesantá AAKOÓ MUNGÚ Yehu garmoó Hanani gari axaás, daanduú Ba'ashawo, iwa kaahi,

² «Kuúng Ba'asha, aníng una uráy haniís, uri waawutmoó muk'eé' oo Israelír wa qaás. Ala kuúng Yeroboamu una aleealús, muk'eé' oo Israeli kway baraá tlakweemí dahás, nee aníng iri buhhtisiyé' ar tlakweemaaín kudá'.

³ Ga/aaweek, aníng kuúng nee múk do'oge nu hhaamiís, do'ók u adór doó Yeroboamu laáq, garmoó Nebati.

⁴ Dír do'oge heéqo gwaa'a baraá gixsa ku /aay nee seeaawe nee oo qo gwaa'a baraá qaymo ku /aay nee tsir/o.»

⁵ Tlehhma'aá hatlá' awa Ba'asha aa tleéhh nee migtose sleémeero kaa gooín baraá kitaábuú qom'i oo waawituú Israeli.

⁶ Aluuwo Ba'asha iri gwaá' kuri foól baraá Tirsa, garmaawós Ela iri waawuti'iín kitaangose.

⁷ Slám axweesantá AAKOÓ MUNGÚ daanduú Ba'asha nee do'ose Yehu gari axaás, garmoó Hanani, asma tlehhma'aá tlakw kudaá Ba'asha aa tleéhh geeraá AAKOÓ MUNGUHE, guri mune duúx ar tlehhmi'iiwós kudá' aa tleéhh, asma inós Yeroboamu guna aleealuús, nee doó Yeroboamu guri qwaareés.

Waawutmo Ela oo Israeli

⁸ Kurkú mibeeri tsár nee lahhoó' oo waawuti'iimár Asa waawutmoó múk Yuda, Ela garmoó Ba'asha waawuti'iima gana iimu/ún ar múk Israeli baraá Tirsár wa ale, kureeri ngaa /aáy tsár baraá waawuti'iimaro.

⁹ Sagadiyusmoowós Simri kuduú gaarduuwós kudaá uruuxuung guri geewaqaát. Looarká wake waawutmo Ela iwa Tirsa i dirii'i, dír doó Arsa kudaádá' doó waawutmoó ga/áw, Ela ina xufiít iri ooniít.

¹⁰ Naagáy Simri iri dáh baraá do', guri gaás. Iri waawuti'ín kitaangós wa aleeró. Kurkwí oo mibeeri tsár nee faanqw oo Asa tawa waawutmoó múk Yuda.

¹¹ Qoomár Simri waawuti'iima ngiwa iimu/ún, múk doó Ba'asha sleémeero guri tsuú/, tam panmo gwaa geexayká oo doó Ba'asha laqaá tumu mulqumowós.

¹² Adoodá' AAKOÓ MUNGÚ aa oó' ar loohír aarusmo Yehu daanduú Ba'ashawo iri bó/.

¹³ Muruuwí sleémeero ina tleehharuút as tlakweemadá' Ba'asha nee garmaawós Ela na tleehhiyé'. Inooín AAKOÓ MUNGÚ, Munguú múk Israeli nguna buhhtisiyé', as inooín tlakweema ngiwa tleehhiyé'. Múk Israeli nguri dahaasiyé' baraá tlakweemií alé ar slaqsi'ii'ín kudá'.

¹⁴ Tlehhma'aá hatlá' awa Ela aa tleéhh sleémeero kaa gooín baraá kitaábuú qom'i oo waawituú múk Israeli.

Waawutmo Simri oo Israeli

¹⁵ Simri deelo ngaa hhe'eés faanqw amoodár Tirsár wá ale. Qoomaarihe Asa waawutmoó yaamaá Yuda kureeri ngaa /aáy baraá waawuti'iimaro a mibeeri tsár nee faanqw. Naagáy múk Israeli qoomaarihe ta burumburiít baraá gixsár Gibetoni ar Filisti,

¹⁶ nee slaqwaruusér Israeli ngiwa axaasiyé' adór Simri waawutmo ngura geewaqaát gway gaás, sleémeero Omri heeín kudá' úr baraá slaqwaraaro nguri waawutmooín wa qaasiyé' baldár kilae.

¹⁷ Omri nee slaqwaruuserós tari tláy Gibetoni, gixsár Tirsa kari harweér.

¹⁸ Simri adoorí ngiwa ár adór gixsa kara harweér, iri dáh baraá doó waawutmo, do' guri asltí qaás, inós iri baraadí gwaá'.

¹⁹ Adoorí ina tleehharút asma tlakweemadá' aa tleéhh geeraá AAKOÓ Munguhe, inós Yeroboamu guna aleealuús, nee múk Israeli guri baraá tlakweemáy dahaás.

²⁰ Tlehhma'aá hatlá' awa Simri nee geewaqatudá' aa tleehhi kaa gooín baraá kitaábuú qom'i oo waawituú Israeli.

Waawutmo Omri oo Israeli

²¹ Múk Israeli iri qasiít baraá daqooráy tsár, tlaqtá wák Tibni garmoó Ginat, guna eehát guri waawutmooín wa qás, nee tlaqtá tsár Omri guri eehát.

²² Aluuwo múk bartá Omri slaqwaraaro múk Tibni garmoó Ginat guna arbaá/, Tibni iri gwaá' nee Omri kuri waawutmoó wa qaás.

²³ Omri waawuti'iima ngiwa iimu/ún a kurkú mibeeraá tám nee wak awa waawuti'iimár Asa waawutmoó múk Yuda. Inós kureeri ngaa /aáy baraá waawuti'iimaro a mibaá nee tsár kureeraá lahhoó' awa waawuti'iimaro, amór gixsár Tirsa gana hoót.

²⁴ Tloomár Samaria gari tlaáxw ar peésár kume lahhoó' dír heé ta bay Shemerí wa ale, koo/ír gawit gari tleéhh nee gixsa gari gawaadí tleéhh. Gixsadá' gari báy Samaria, as umuú heedá' ta bay Shemeri, kudá' ngiwa tlaáxw.

²⁵ Omri tlehhma'aá tlakw gina tleéhh dír geeraá AAKOÓ MUNGUHE, tlehhma'aá tlakw gina tleéhh waawituú hatlá' sleémeero kudá' aa giirin ba/a.

²⁶ Inós Yeroboamu garmoó Nebati guna aleealuús, AAKOÓ MUNGÚ, Munguú múk Israeli, guri buhhtís, nee múk Israeli guri baraá tlakweemií dahaás as munguidaá hatlá' ngiwa sluufmisiyé'.

²⁷ Tlehhma'aá hatlá' awa Omri aa tleéhh, nee migtose sleémeero kaa gooín baraá kitaábuú qom'i oo waawituú Israeli.

²⁸ Aluuwo Omri iri gwaá', kuri foól baraá Samaria, garmaawós Ahabu iri waawuti'iín kitaangós wa ale.

Waawutmo Ahabu oo Israeli

²⁹ Kurkú mibeeri tám nee dakaát oo waawuti'iimár Asawo waawutmoó Yuda, Ahabu garmoó Omri, waawuti'iimár múk Israeli gana iimu/ún. Ina yaamaá Samariár wa waawuti'ín kureeri mibeeri tsár nee tsár.

³⁰ Ahabu garmoó Omri tlehhma'aá tlakw gina tleéhh geeraá AAKOÓ Munguhe ta waawitá sleémeero kudá' aa giirini.

³¹ Slám tam tlehhma'aá Yeroboamu garmoó Nebati gaa eehari, Ahabu Yesebeli gari duúx, dasír Etba'ali, waawutmoó Sidoni. Ahabu Ba'ali guri sagadiyuús, nee gway sluufmiís.

³² Ba'ali guri dó' i tleéhh baraá gixsár Samaria, nee baraá guruuwo kitángw i ilahhooárií hanmiisi guri tleéhh.

³³ Mungú /ameeni kudá' ta bay Ashera guna tleéhh. Ahabu tlehhma'aá tlakw awa yaariir gina tleéhh, AAKOÓ MUNGÚ, Munguú múk Israeli guri buhhtís waawituú hatlá' sleémeero aa girin ba/a.

³⁴ Qoomár waawuti'iimarose Hieli kuduú Beteli gixsár Yeriko gana /abeés tleehharo. Qoomár iwa iihhafiirír qamin ar gixsár Yeriko, Abiramu garmaawós oo baris ina gwaá'. Qoomár iwa afér gixsár tlehhiiti Segubu garmaawós kudá' niiná iri malé gwaá'. Adoorí ina tleehharút ar adoodá' AAKOÓ MUNGÚ ngira oó' ar afkú Yoshua, garmoó Nuni.