1 WAAWITÁ 15 - Biblía Axweesantá Hhohho' ar Mungú 2004

Waawutmo Abiya oo Yuda

¹ Abiya waawuti'iima ngiwa iimu/ún baraá Yudawo a kurkú mibaá nee dakaát oo waawuti'iimár Yeroboamu, garmoó Nebati.

² Inós ina waawuti'ín baraá Yerusalemúr wá ale kureeri tám. Aayoorós a Ma'aka dasír Absalomu.

³ Abiya tlakweema gina tleéhh adór baabuúwós wá ale, inós inkihhimu gu konká dír geeraá AAKOÓ MUNGÚ, Munguúwose, adoodár Daudi wa ale, baabuúwós.

⁴ Tam adoorihe, as Daudiwo, AAKOÓ MUNGÚ Abiya ngway garmií haniís oo waawuti'iím kitangós wa ale, as inós iwa gwa/aateema tleehhiti baraá Yerusalemuro nee gixsár Yerusalemu ngiwa gawdeesi.

⁵ AAKOÓ MUNGÚ adoorí gana tleéhh asma Daudi gan'amu guna tleéhh, nee hara'ayár Mungú gaa baloó iiawaslesiiká baraá hotaangós sleémeerowo, aqo har dakuúsadá' aa tleéhh ar Uria heé Hiti.

⁶ Rehoboamu nee Yeroboamu tana slaqwaaqún qooma sleémeero tawa waawitá.

⁷ Tlehhma'aá hatlá' awa Abiya nee tidá' sleémeero aa tleéhh kaa gooín baraá kitaábuú qom'i oo waawituú Yuda. Abiya nee Yeroboamu tana hoót ar slaqwara.

⁸ Aluuwo Abiya iri gwaá' kway foól baraá gixsár Daudi, nee garmawós Asa iri waawuti'ín kitaangós wa ale.

Waawutmo Asa oo Yuda

⁹ Kurkú mibeeri tsár oo waawuti'iimár Yeroboamu waawutmoó Israeli, Asa waawuti'iima gana iimu/ún baraá yaamaá Yuda wá ale.

¹⁰ Asa baraá waawuti'iimaro kureeri ngaa /aáy a mibeeri tsiyáhh nee wak baraá gixsár Yerusalemuro. Aayoorós a Ma'aka dasír Absalomu.

¹¹ Waawutmo Asa tlehhma'aá hho' gina tleéhh dír geeraá AAKOÓ MUNGUHE adoodá' Daudi baabuúwós aa tleéhh.

¹² Inós hhawaateedá' nee hhawaataá hatlá' fuquusá' baraá doó munguaá hatlá' kiwa sluufmamiisi giri diyaá/ baraá ayko, slaqsi'iidá munguaá hatlá' taa tleéhh nee baabi'iiwós giri hingeés.

¹³ Aayoorós Ma'aka inósadár waawuto'o gari hingeés baraá waawuti'iimaro, asma inós slaqsayduú Ashera guna tléhh, munguúduú /ameeni. Gawaá adoorihe slaqsaydá' guri giqáy, guri daá/ baraá xatstá Kidronír wa ale.

¹⁴ Ala kiteeridaá ilahhooa kawa hanmiisi gawaá gongoamaawo gaa hingeesiiká, tam adoorihe Asa baraá slafiingós sleémeerowo ina hoót ar inkihhimu dír geeraá AAKOÓ MUNGÚ wa ale.

¹⁵ Xoosla sleémeero gana ki/ís baraá doó AAKOÓ MUNGÚ, tidá' taa amohhe'eés nee baabuúwós dinkwa nee tósár kilae, xoosladár sahaábu nee peésa nee tookar hatlae.

¹⁶ Waawutmo Asa oo Yuda nee waawutmo Ba'asha oo Israeli tana slaqwaaqún baraá hootaaín sleémeero awa inooín tawa waawitá.

¹⁷ Ba'asha waawutmoó Israeli yaamaá Yuda gina i haraatláy, nee gixsár Rama gari tleéhh as múk amór Asa kakáw nee oo amoorós dahha nguwa ilaa/i.

¹⁸ Naagáy waawutmo Asa peésa nee sahaábuwo kudá' aa meet baraá Doó AAKOÓ MUNGÚ nee doó waawutmo, gari haniís dír sagadiyuuseerós, gari ya/aáw Damasko amór Ben-hadadi, garmoó Tabrimoni, nángw nángw Hesioni, waawutmoó múk Aramu, i kaahi,

¹⁹ «Qwaláng aníng nee kuúng al'axweesani a qaasaán adoodár baabi'iirén al'axweesani ngira qaasiyé'. Qaytsiít, aníng kuúng ugwa qeemuú peésa nee sahaábuwií ya/aáw. Gám tláw al'axweesantadá' taa qasé' nee waawutmo Ba'asha oo yaamaá Israeli warqeeseek, as daqaní slaqwarár amor'eé' ga máy.»

²⁰ Waawutmo Ben-hadadi adoorí waawutmo Asa i slai gari ya/án, slaqwaruuseerós gari ya/aáw as gixsadaá yaamaá Israeli kiwa i haraatlay. Inooín gixsadaá Iyoni nee Dani nee Abel-bet-ma'aka nee Kinerotiro nee yaamaá Naftaliwo sleémeero kiri hayóh.

²¹ Waawutmo Ba'asha adoorí ngiwa axaás, gixsár Rama tleehhamooro gari máy, iri hotaá áy baraá gixsár Tirsa.

²² Waawutmo Asa afo gana ilahaniís dír múk Yuda sleémeero, tam heé wák gwa mayká, as tlaa/eedaá gixsár Rama nee peehháydá' Ba'asha ira gadiyuús kiwa hingeesi. Asa xosluudá' gari gixsár Geba nee ar Mispárár tleéhh kudaá baraá Benyamini.

²³ Tlehhma'aá hatlá' awa Asa nee migtose, nee gixsadaá aa tleehhi sleémeero kaa gooín baraá kitaábuú qom'i oo waawituú Yuda. Ala qoomár Asa iwa dín, inós tiqtír ya'a' guri ót.

²⁴ Aluuwo Asa iri gwaá', kuri foól baraá /antaá waawitá, kudaá baraá gixsár Daudi. Garmaawós Yehoshafati iri waawuti'ín kitaangós wa ale.

Waawutmo Nadabu oo Israeli

²⁵ Kurkú tsár oo waawuti'iimár Asa oo Yuda, Nadabu garmoó Yeroboamu waawuti'iima gana iimu/ún baraá Israeli wa aleero. Inós kureeri ngaa /aáy baraá waawuti'iimaro a tsár.

²⁶ Nadabu tlakweema gina tleéhh dír geeraá AAKOÓ MUNGUHE, adoodá' baabuúwós aa tleéhh gana eehár, kudá' múk Israeli gwaa baraá tlakweemií dahaas.

²⁷ Ba'asha garmoó Ahiya, oo tlahhoó Isakari, Nadabu guri gaasár wa slaá'. Ala qoomár Nadabu nee slaqwaruuseerós gixsár Gibetoni ar Filisti kawa harweér, Ba'asha iri haratláy, Nadabu guri gaás.

²⁸ Qoomár Ba'asha Nadabu nguwa gaás, Asa waawutmoó Yuda kureeri ngaa /aáy a tám baraá waawuti'iimaro. Ba'asha iri waawuti'iín kitángw Nadabu wa ale.

²⁹ Ba'asha waawuti'iima ngiwa sangw sláy, múk doó Yeroboamu sleémeero guna tsuú/, tam panmo gwaa geexayká, ar adoodá' AAKOÓ MUNGÚ aa oó' ar loohír sagadiyusmoowós Ahiya kuduú Shilo.

³⁰ Muruuwí sleémeero ina tleehharuút, asma Yeroboamu AAKOÓ MUNGÚ, Munguú múk Israeli guna buhhtís, ar tlakweemaawós, nee múk Israeli guna baraá tlakweemií dahaás.

³¹ Tlehhma'aá hatlá' awa Nadabu sleémeero kaa gooín baraá kitaábuú qom'i oo waawituú múk Israeli.

³² Waawutmo Asa oo Yuda nee waawutmo Ba'asha oo Israeli tana ló'wa slaqwaaqún qooma sleémeero ar inooín tawa waawitá.

Waawutmo Ba'asha oo Israeli

³³ Kurkú tám oo waawuti'iimár Asa waawutmoó Yuda, Ba'asha garmoó Ahiya waawuti'iima gana iimu/ún baraá Israeli wá ale, amoodár Tirsa. Inós kureeri ngaa /aáy baraá waawuti'iimaro a mibeeri tsár nee tsiyáhh.

³⁴ Ba'asha tlakweema gina tleéhh dír geeraá AAKOÓ MUNGUHE, adoodá' Yeroboamu aa tleéhh gana eehár, kudá' múk Israeli gwa baraá tlakweemií dahaas.