1 WAAWITÁ 14 - Biblía Axweesantá Hhohho' ar Mungú 2004

Gwa'arár garmoó Yeroboamu

¹ Qoomaadae Abiya garmoó waawutmo Yeroboamu i tiiq.

² Yeroboamu hareerós gari báy, «Ti adór heé hatlá' ilaaqas, tláw baraá gixsár Shilo didá' aarusmo Ahiya aníng iwa báy, ‹Kuúng a waawutmoó múk Israeli.›

³ Mikaátér mibaangw huweek nee maandaásaywo nee dahhángw niina oo danú huweek, inós gár na/ayrén gu slaw ngi qo oo'.»

⁴ Harér Yeroboamu adoodá' gari tléhh, iri tleér ay Shilo, iri hardát doó Ahiya. Qoomaadae Ahiya xumsór kilá' ga aleeslayká, asma ilaawós na boo/ayé'.

⁵ Ala AAKOÓ MUNGÚ aarusmo Ahiya guna gurbuú' guri báy, «Ga/aaweek harér Yeroboamu i baraá loohírí dirí', i amór do'ók keér, asma kuúng uwa yaahas daanduú garmaawose, asma i tiiq, daqaní aníng gár inós ka beer ngi oó'.» Harér Yeroboamu iwa hardát tina /ameenír hatlá' ilaaqás.

⁶ Ala Ahiya ngiwa axaás iwa darat afkú do'o iri oó', «Do' awangw, amaá Yeroboamu. Ahaá waáy gár tis heé hatlá' ilaaqamiin? Aníng kángw qoomaaká u koóm daanduuwoge.

⁷ Tláw Yeroboamu ku beer, AAKOÓ MUNGÚ, Munguú Israeli, i kaahi, ‹Aníng kuúng una tsawaár baraá tla/ángw múk wa alé, uri qaás tawa waawutmoó muk'eé' oo Israeli.

⁸ Waawuti'iima ngina hayóh dír xwaylár Daudi wa ale, nee ngay kuúng i haniís. Ala kuúng ar taa tléhh a dimbé nee tidá' sagadiyusmooeé' Daudi aa tleéhh, kudá' hara'ayar'eé' gaa oh, tidá' aníng ni slaa' ga eehar ar muunaáwós sleémeero, nee gana tleéhh tidá' hariim geeraeene.

⁹ Ala kuúng muruú tlákw una tléhh oo hee aa baloó tleehhiiká iimír aange. Kuúng aníng iga buhhtís, asma kuúng slaqsa'aá munguaá hatlá' iga tléhh, nee aníng iga áhh, iri alaá xu'ús.

¹⁰ Gawaá adoorihe, ga/aaweek, án doó Yeroboamu u amotlakweérí huúw, hhawaataá do'ós i tsuú/ baraá múk Israeliro tam lawaalmo, laqaá tam lawaalmoowoká. Múk do'ós sleémeero u hhaamiís ar adoodá' muu tsuunkáy ngur da/aa/an iri da/aruut.

¹¹ Heé doó Yeroboamu oo qo gwaa'a baraá gixsárí ale, seeaawe gu /ák, nee heéqo baraá tsee/aá /awaákí gwaa'a tsir/o gu /ák. Anuú AAKOÓ MUNGÚ tí aga oó'.› »

¹² Ahiya harér Yeroboamu gari báy, «Gimáy sihhiít amór do'ók i watleek, qoomár bar darát baraá gixsa, na/aywók i gwaa'.

¹³ Múk Israeli sleémeero i tsuunqus as inós nee kway fool, ala a kwí kilós oo ta fooli doó Yeroboamuwo, asma inós gár AAKOÓ MUNGÚ, Munguú múk Israeli nguwa sla'atís i deer.

¹⁴ Slám laarír kilae, AAKOÓ MUNGÚ waawutmoó hatlá' gu qaas baraá yaamaá Israeliro, waawutmoowí doó Yeroboamu guri hhaamiis.

¹⁵ Eeít, iimír hamí AAKOÓ MUNGÚ múk Israeli gu slaahh, inooín kiri diingiis adór gitsór ta dingimiisi nee ma'aá yaae. Inós múk Israeli guri hingees baraá yaamuuká hhoohhoo' taa baabi'ii'ín i haniís, nee kiri diyaa/ ayaá saáwí alé, gayuú yaaér Eufrate, asma AAKOÓ MUNGÚ ngwaa buhhtisiyé' as slaqsa'aá Ashera kiwa tleéhh, kuduú munguú /ameeni.

¹⁶ AAKOÓ MUNGÚ múk Israeli gu sii' as tlakweemadá' Yeroboamu aa tleéhh, nee múk Israeli gway baraá tlakweemií dahaás.»

¹⁷ Harér Yeroboamu iri tleér, iri wátl amór do'ós baraá yaamaá Tirsa. Qoomár dír afkú do'o iwa darat, na/aywós iri tsatiít.

¹⁸ Múk Israeli sleémeero guri foól, kuri satsuunqumiís adoodá' AAKOÓ MUNGÚ ngira oó' ar loohír aarusmo Ahiya sagadiyusmoowós.

Gwa'arár Yeroboamu

¹⁹ Tlehhma'aá hatlá' awa waawutmo Yeroboamu, adoodá' tara slaáqw nee ira waawuti'ín sleémeero ka gooín baraá kitaábuú qom'i oo waawutuú Israeli.

²⁰ Yeroboamu waawuti'iima ngaa /aáy a kureeri mibeeri tsár nee tsár, aluuwo iri gwaá', nee Nadabu garmaawós iri waawuti'ín kitangós wa aleeró.

Waawutmo Rehoboamu oo Yuda

²¹ Rehoboamu garmoó Solomon waawuti'iimár yaamaá Yuda ngiwa sláy kureeriiwós a mibeeri tsiyáhh nee wak. Inós kureeri ngaa /aáy a mibaá nee faanqw, baraá waawuti'iimaro, baraá Yerusalemu, gixsadá' AAKOÓ MUNGÚ aa tsawaár baraá gixsadaá hatlae awa tlahh'aá múk Israeli as kuwa baraadá wa sluufmiisi. Aayoorós a Na'ama ar xoorór Amoni.

²² Múk Yuda tlakweema gina tleéhh dír geeraá AAKOÓ MUNGUHE. Inós nguri dá/tár ayé' as tlakweemaaín kudá' yaariir ta awa baabi'ii'ine.

²³ Inooín sleeme kiteeraá ilahhooa kawa hanmiis kina tleéhh gawaá gongoama', nee uheemiwo, nee slaqsa'aá munguaá ta bay Ashera ngina tleehhiyé' gawaá gongoama' nee baraá gam'ér umuúqo xa'anoó loo/o naa/a.

²⁴ Gár ló'wa tlaakw a tí, hhawaate nina fuquusiyé' nee hhawaataá hatlá' baraá Doó Munguhe. Tlehhma'aá hatlá' awa Mungú i waki ngina tleehhiyé', adoodá' xoordaá hatlá' ta tlehhahhiti, kudá' AAKOÓ MUNGÚ aa guús baraá yaamuudá' wa ale, dír geeraá múk Israeli.

²⁵ Kurkú kooán oo waawuti'iimár Rehoboamu Shishaki, waawutmoó yaamaá Misri, ina haraatláy baraá gixsár Yerusalemu.

²⁶ Xooslár doó AAKOÓ MUNGÚ sleémeero gari ar tlay, nee ar doó waawutmowo, umuú gaa gana ar tláy, nee sleeme gaambudá' Solomon aa tleéhh ar sahaábu gina ar sláy.

²⁷ Kitángw gaambukae, waawutmo Rehoboamu gaambudaá muqslár sirdaa/aten gina tleéhh, nee giri haniís kiwa xun nee xuumuusér afkú doó waawutmo.

²⁸ Umuú daqto waawutmo bira baraá Doó AAKOÓ MUNGÚ káy, xuumuuse gaambuudaá gin húp baraá doó Mungú, nee aluuwo kiri ki/is baraá do'odá' kiwa xun.

²⁹ Tlehhma'aá hatlá' awa waawutmo Rehoboamu aa tleéhh nee umuú gár aa tleehhi, kaa gooín baraá kitaábuú qom'i oo waawutuú Yuda.

³⁰ Deelo sleémeero Rehoboamu nee Yeroboamu tana slaqwaaqún.

³¹ Aluuwo Rehoboamu iri gwaá' kway foól baraá /antaá baabi'iiwós kudá' baraá gixsár Daudi. Aayoorós a Na'ama ar xoorór Amoni, nee garmaawós Abiya iri waawuti'ín kitaangós wa alé.