1 WAAWITÁ 10 - Biblía Axweesantá Hhohho' ar Mungú 2004

Aa'aá waawuto'ór Sheba

¹ Waawuto'ór yaamaá Sheba xirfuú Solomon as umuú AAKOÓ MUNGÚ nguwa axás, nina hardát amór Solomon as nguwa yaahamis ar /ayma'aá gawden.

² Ina dát Yerusalemúr i aleeró nee eeharuuseerós ar yaariir, nee angamiadaá mooyángw loohisá', nee sahaábuú yaariír, nee tlaa/aá tlaxo gawden. Iwa hardát dír Solomon tana axweés daanduú tidá' sleémeero ar baraá muunaáwós.

³ Solomon axweesanaywós kudá' sleémeero guna waagweér tam /aymuú aa harslaaqaát i kaahh.

⁴ Waawuto'odár Sheba sagalooár Solomon, nee do'odá' aa tleéhh ngiwa aán,

⁵ nee muruú /aymár baraá meésaarós, nee kiteeraá mukdá' urén, nee adór sagadiyuseerós ir gadiyus, nee adór tara tsiitiitín, nee adór ilahhooár da/a/aangw ngir hanmiisi baraá doo AAKOÓ MUNGÚ wa ale, inós iri hasl'amít, iri /araán.

⁶ Waawutmo Solomon guri beér, «Ar ló' kangók kudá' naa axaás ayaaeé' wa alé, nee sagalooarók,

⁷ án geeraawo aga haratlinti'iiká, ay hamí ana sangw haratlintií', asma ugwa ár ar ilaaeé', slám kuúng tu ak ló'wa xiríf, slám sagalooa a ló'wa koón sleeme a har adoodá' án naa axaasiiká.

⁸ Múk amohhoó' a mukók, nee sagadiyuuseerók tí sagalooarók ga axamiis deelo sleémeerowo.

⁹ I xirfuuti AAKOÓ MUNGÚ, Munguúwók kudá' gaa slaa' kuúng uwa qaasi waawutmoó múk Israeli wa alé. Asma AAKOÓ MUNGÚ múk Israeli gwaa ló'wa slaá' ay alhhe'eesay wasle, hám kuúng ugwa waawutmoó wa qaás, as kwasleemár ganaa' kawa tlehhit, nee hotaá ganaa'á' kiwa ar hot.»

¹⁰ Naagáy waawutmo guri talaántár tsiiru nee mibeeraá tsár i hanís, ar sahaábu, nee mooyángw yaariír ló'wa alé, nee tlaa/eedá' tlaxo urene. Iimír baalaadá' mooyángw adór kuduú waawuto'ór Sheba aa hanís, waawutmo Solomon gwaa baloó slayká malé ale.

¹¹ Miringamoó Hiramu, kudá' sahaábuú leehhár daáhh baraá Ofiri, xaa'aá yaariir awa ta bay sandaáli, nee tlaa/aá tlaxo uren ngina huúw.

¹² Waawutmo uheemaá doó Mungú giri tleéhh ar xaaiidá', nee uheemaá do'ós, nee gidaandoori, nee seése ar daauuse. Iimír baldá' ay laarí xaa'aá ta bay sandaáli awa adór kudá' naa baloó ki/ii'iiká.

¹³ Waawutmo Solomon waawuto'oodár Sheba gay qáy muruudá' iqo sla'a, nee oo aa ilatleerusi, dinkwa nee kudá' Solomon aa slaá' haniisaro as ilaiwa/amér waawuti'iimarós, inós iri wátl ayaawós nee sagadiyuuseerose.

Daqaari'iimár waawutmo Solomon

¹⁴ Talaántár sahaábu ar aa hardat dír Solomon kurkú wake a tsiire lahhoó' mibeeri lahhoó' nee lahhoó'.

¹⁵ Tí i dinkwaarooká nee sahaábuú aa sláy baraá weeramisuú wa alé, nee kuduú mukdá' halaanu'uumár tleéhh, nee oo waawituú Arabia, nee amór ga/aawuusér ayeemaá yaamaá Israeli.

¹⁶ Waawutmo Solomon gaambaá tsiire tsár awa sahaábu giri tleéhh, ar wák gár kara tleéhh a kílo faanqw ar sahaábu.

¹⁷ Nee gaambaá nakw tsiire tám giri tleéhh ar sahaábuú, gaambór wák gár kara tleéhh a sahaábuú kilór wák nee tlaqi. Waawutmo giri qaás baraá do'oduú baraá gartá Lebanoni.

¹⁸ Waawutmo kitángw waawuti'iima guri tleéhh sleeme oo xareemi, guri parootuús ar sahaábuú hhohhó'.

¹⁹ Kitangwdá' tsa/a/amto ngi kon lahhoó', nee gawaawose a alií /angengeiít, slám i dabaá kón bartí nee tiqae didár iwtanaango, slám direeraá tsár naa sihhitiyé' bihhaá dabaadaádá'.

²⁰ Slám slaqsa'aá direeraá mibaá nee tsár i dayá', oo wák alhhe'eesoó gawaá daanduú tsa/a/amtoodá' lahhoó'. Slaqsoó kitangwdá' dír hatlá' iwa deér i káhh.

²¹ Xooslár waawutmo ar wahaangw a xooslaá sahaábu, nee ar do'duú baraá gartá Lebanoni sleémeero a sahaábuú hhohhó' xooslár taa tleéhh ar peésa i káhh, peésa ka gár kilá' i harafadiitiiká de'emaá waawutmo Solomonuwo.

²² Asma waawutmo miringér Tarshishír kakaw ngiwa kon baraá tlawto nee ar Hiramu in al'aa'aá kakeér. Baraá kureeraá tame daqeemu ngu hhe'es wak. Gár ni huwahuwiya' a sahaábu nee peésa nee xareemi nee poohám nee tsir/orká ta bay tausi.

²³ Waawutmo Solomon waawitá sleémeero guri baá/ daqaari'iima nee sagalooaro.

²⁴ Múk baraá yaamu sleémeero Solomon kuna artá wa slaá' as sagalooarós tidá' Mungú aa haniís kawa axaasi.

²⁵ Umuú heewo qeemu nguri huúw oo xooslár taa tleéhh ar peésa nee sahaábu nee tlaba' nee manemáne nee mooyaangw nee faras nee wayshama', umuú kurko Solomon qeemuuwí guna ilaaohín.

²⁶ Solomni gaardaá ta uuruxun giri burumbuúr nee mukdá' farsuú i tsa/aa/ama, inós gaardu ngi kon a kumuú wák nee tsiire tsiyáhh, nee múk farsuú i tsa/a/ám a kume mibaá nee tsár, kudá' aa qaás baraá gixsadaá gaardu, nee dír waawutmo baraá Yerusalemuro.

²⁷ Waawutmo peésa gari tleéhh adór tlaa/e baraá Yerusalemuro, nee a sahhta adór /aantsír baraá Shefela yaaremaawo.

²⁸ Waawutmo Solomon faras guri oó' yaamaá Misri nee Kilikia, halanuuseerós nguri tlaxuún dír múk Kilikiár wa ale.

²⁹ Gaárír wák ar ta uuruxun gár kar weermiisi yaamaá Misriro a kílo faanqw ar peésa, nee faraásír wák, kílo tsár ar peésa. Mukdá' halaanuús oo waawutmo gaardu nee farsuuwo kiri weeramiís dír waawituú Hiti nee oo múk Aramu.