1 Timoteo 3 - Biblía Axweesantá Hhohho' ar Mungú 2004

Geeraharuusér Kaniísa

¹ Axweesantí i looeemaá koón, tí kah, «Hee bar gadiyér muu nguwa geeraharahari ga leelehhiit, a gadiyér ló'wa hhoo' gan slaa'.»

² Geeraharusmo gár kuwa hariím masók a heé ta muruú tlákw i kaahiiká, inós masók hareerós a wak. Masók a heé qoóm nee oo sagaloó', heé muruú qoomeemeés, heé dahi'iimis, oo intsaahhatisa ga baál.

³ Inós masók a heé ooniitusmoowooká, heé xaraslaaká, masók a heé tsá', masók a heé kaanganusmowooká, slám masók a heé peésár ilatleerusaaká.

⁴ Inós masók a heé do'ós gu ló'wa sageesihhimiít, oo na/iiwós gi adór hariímár hara'ayiyiím baraá umuúqo gaaro.

⁵ Asma heé do'ós geeraharto gu aleeslaslawaaká, adór múk Mungú geeraharto ngur aleeslay a adoomá?

⁶ Slám inós masók a heé aa ba/aniiká deeloorí /abene, as miwa daar/uút, iri huu', kuri sakwasleemuut adór Neetlángw wa ale.

⁷ Slám inós gár kuwa hariím masók kun lamabu'úngw hhoó' i kah nee múk hatlá', as mukuwa daanda axweés muruú tlákw i alé, nee kuri oh nee tsaaxweelír Neetlaangw.

Alee/isuusér Kaniísa

⁸ Alee/isuusér múk kríshaanáy sleeme masók a múk daharuú koóm. Inooín masók a múk axweesanay'ín warqaqawaaká, nee slám masók a múk xuufiitaaká. Slám inooín peésár loohír ganaa'aaká masók ka slaiiká.

⁹ Inooín masók intsaahhasadár ló' ar haratlintaaoorén, tidá' taa geehhooeés ngaa oohiyé' ar munér hho'.

¹⁰ Alee/isuuseerí sleeme ka ala iiari, ala gár daanduuine taa ár bir káhh, gadiyeé ngi tleehhiye'.

¹¹ Tlaaway'ín sleeme masók a /ameenár daharuú koom, masók a takaahuuseerooká. Inooín masók a múk qoóm, nee masók ta inkihhimuú kón baraá mura' sleémeerowo.

¹² Alee/isuusér múk kríshaanáy masók a múk tlaaway wakét, múk na/ii'ín gi hara'ayiyiím gan'amúr alé, nee múk maray'ín gi aleesláw geeraharahaduuwo.

¹³ Asma Múk gadiyér hho' ga tlehhiít dír múk kríshaanayhe, ilaiwa/ame ga sláy, nee haratlintaaor'ín tidár baraá Kristo Yesu ka aleesláy kawa alki/iiti.

Naaqór ur

¹⁴ Aníng hamí barwaárí ngina amoorógií gooiím, nee a harahhiíf deeloorí tseewe niwa amoorógií hardah.

¹⁵ Ala tam adoorihe aníng binda tliík hardahamuwo, kuúng masók adór umuúqo heewo kuwa hariím hotaango baraá dinkwár múk Munguhe a xú'. Dinkwaarí an múk kríshaanáy, inooín an uhmo nee iihhafiirír looeema.

¹⁶ Ar ló', naaqór haratlintaaoorén ka ló'wa ur. Mungú kuna geehhooatís ar slaqsoó hee. Gan'amuuwós kuna laqán nee Qeeru. Inós kuri ár nee malayke. Kaangós kuri alki/iít dír xoorduuwo, inós kuri haratlintií' baraá yaamuwo, kurir tláy gawaá doori.