1 Timoteo 2 - Biblía Axweesantá Hhohho' ar Mungú 2004

Kángw firo

¹ Gár ni gawdeemiis ta muruú hatlá' sleémeerowo a tí, firo nee saaliingw nee aleefiro nee sluufaay, muruuwí sleémeero i tleehharuuti as muu sleémeero.

² Waawitá aleefiriirimaak nee kudá' aleesleemuú koomá' sleémeero, as atén tawa hootaan ar slafíngw amohhooa nee oo wayda, Mungú kuwa haratlintatiaan nee tawa hootaan ar adoodá' hariim.

³ Adoorí ka hhoo', slám Mungú Ba/amusmoorén gu sla'atimís.

⁴ Inós muu sleémeero gu slaa' iwa ba/an nee looeema ngiwa xuiya'.

⁵ Asma Mungú a wak. Nee har'ohusmo a wak sleeme, kudá' har'ohiím tla/ángw Mungú wa ale nee muu. Inós a hee, Kristo Yesu.

⁶ Inós kilós tina haniís tawa bu'utuú gweermór muu sleémeero. Adoorí ina tleehharút qoomaadá' Mungú aa qaroó qaás iwa bó/.

⁷ Nee aníng tina qaás tawa alki/itusmoó kaangwí nee tawa Ya/abusmo. Tí ni kah ar ló', lamtá ni kah i káhh. Tina qaás múk xoordaá hatlá' nguwa intsaahhatimis daanduú haratlintaao nee looeemaawo.

⁸ Gár án ni slaa' hhawaate masók an múk daba' hhohhó' nee oo buhhabuhhaaká nee múk tlaampa'aamisaaká. Ala umuúqo diiro hhawaataá adoorí masók dabaaín ngin gáwtí tleemisiyá' baraá firooro.

⁹ Tam /ameena sleeme an hara'ayiyiím gídaabá, masók inooín a múk qoóm nee oo tsatsaa'arén as tsitay'ín. Tsitay'ín masók a tsitoó qoóm. Slám mitiwa parootusiyé' ar se'eengw kuwa hhutliiti, laqaá ar kwaslaá tlaxo gawden, nee tlabaá tlaxo gawden.

¹⁰ Ala parootir'ín masók an tlehhema'aá hho'. Asma adoorí an adór hariim dír /ameenár, Munguú ilaiwawa/a.

¹¹ Baraá intsaahhasaro /ameena i intsaahhahhaan ar tsatsaa'areema nee ilaiwa/ame.

¹² Aníng /ameena a ya/aámár i haniisaaká iwa intsaahhatimis laqaá ar hhawaata nguwa bal, ala gár kawa hariím a in xaslít.

¹³ Asma Adam an heé taa geerií tleéhh, nee Hawa kari aluudá' wa tleéhh.

¹⁴ Slám Adam kwa al/ayiiká, ala a /ameeni kana al/aáy, tlakweema giri tléhh.

¹⁵ Ala /ameena ka ba/amis ar xwaylar'ín, barnaxes taa kumiít baraá slafíngw haratlintaaooro nee sla'aari nee hhoohhooeema, dinkwa nee muunuú qoomoó koóm.