1 Timoteo 1 - Biblía Axweesantá Hhohho' ar Mungú 2004

¹ Anuú Paulo barwaárí ngina gooiím. Aníng a ya/abusmoó Kristo Yesu ar hara'ayár Mungú Ba/amusmoorén nee Kristo Yesu kuduú harahhifoorén.

² Barwaárí ngina gooiím amoorók Timoteo, garmaaeé' oo kilá' oo baraá haratlintaao. Mungú Baabá nee Aakoorén Kristo Yesu kuúng u tsuuqi, nee u gurtlay, nee u waydií haniisi.

Gurbu'uungw daanduú intsaahhasár ló' nee ar lama

³ Qoomár án niwa Makedoniár kaw, án kuúng una firiím tawa Efesór wa hot. Hám daxta un malé firiím, as mukko kuwa hara'ayiyiin as intsaahhasár hatlá' mingiwa huúw.

⁴ Slám inooín tiita makawa eeharahaár nee yaeemaá tlet awa tlahhi'i kiwa fadiiti, asma muruuwí gár i huwahuwi a partlito. Slám gár i bui i káhh dír geeraharusmoó gadiyér Munguhe, asma iimu/úngw gadiyér Mungú a haratlintaao.

⁵ Gár hara'ayaarí ngisa oó', masók sla'aari i doogigiín, tidá' baraá muunuú hhoohhoó' daahh, nee afór hho' ar baraá muuná, nee haratlintaaór waaqoodár koomaaká.

⁶ Ala muu bahh'alé baraá loohirí ganaa' gaa geexáy, axweesanoó gaa wásl kuri eehár.

⁷ Inooín ka slaa' tawa intsaahhatuusér hara'ayár Mungú. Ala inooín awa kilá' axweesanaydá' ta axweesi ku xuiiká, nee slám inslawaydá' ta aleekal/an ku tsatsahhanká.

⁸ Atén a xuaán adór hara'aya kar hhoó', hee bir ngir gadiyuus ar loohír ganaa'.

⁹ Gár atén tiwa hariím masók an tsaahhaán adór hara'aya kara qaasiiká as múk hhó'. Ala kana qaás as múk aa dee/aanuut, nee mukdá' hara'aya gaa sii'. Slám kana qaás as múk Mungú gwa haratlinti'iiká nee múk tlakweemaá tlehhahhiít, nee slám mukdá' hhohhoeeká, kudá' slasla/arén. Nee slám hara'aya kana qaás as múk baabi'ii'ín tsuú/ nee amuín, nee tsu/utuusér hatlá'.

¹⁰ Nee kana qaás as fuquuse nee as hhawaateedá' fuquusá' nee hhawaataá hatlá', laqaá /ameenár fuquus nee /ameenár hatlá', nee slám kana qaás as mukdá' muu gu halaanu'uumárár tlehhiít nee lamuuse, nee mukdá' tawó lo'ór huwahuúw. Nee hara'aya kana qaás as daanduú umuúqo /aymuuwo oo nee intsaahhasár ló' ti slaslaawa'aaká.

¹¹ Intsaahhasarí a tidá' tinda aníng i haniís, as ngiwa alki/iit, intsaahhasarí a Ya/abtoodá' hho' daanduú xirfuú Munguúdá' tsuuqaá koóm.

ilahhooár Paulo as gurtleemu

¹² Aníng Kristo Yesu Aakoorén un sluufmiís, kudá' aníng iga /uurií haniis. Slám un sluufmiís asma aníng ina harafaár tawa heé inkihhimuú koóm, iri qaás baraá gadiyeérós i alé,

¹³ anuúdá' aáng geeraawo inós ugwa /ooslaasliim, nee ugwa gusiisiim, nee ugwa slahh'eemiis. Ala Mungú aníng ina gurtláy, asma tí sleémeero ana tleéhh as xuawasler'eé'. Asma qoomaadae aníng Yesu ugwa haratlinti'iiká.

¹⁴ Aníng gurtleemuú Aakoorén una ló'wa sláw, dinkwa nee haratlintaao nee sla'aari tidá' ta koomaan baraá Kristo Yesuwo.

¹⁵ Kaangwí oo ló', oo hariím haratlintaaooro, slám i ló'wa harín ya/aamaro adór Kristo Yesu nira hardáh baraakaá yaamií alé as múk tlakuuse nguwa ba/amisi. Nee aníng a tlakusmoó úr ta tlakuuse sleémeerowo.

¹⁶ Gawaá adoorihe gaarí an gár án gurtleemu ngusa sláw, as Yesu Kristo qiqtliingós nguwa laqán dir'eé' alé, aniíduú tlakusmoó úr, as aníng niwa slaqsaay tleehhiit dír mukduú hatlá' oo aluú wa haratlintiia, nee slafíngw alhhe'eesay wásl kuwa slay.

¹⁷ Waawutmoó alhhe'eesay wásl kudá' baloó gwaa'aaká, kudá' geehhooeeká, inós kilós an Mungú. Ilaiwa/ame a tós nee xirif a kós ay alhhe'eesay wasle. Amin.

¹⁸ Timoteo, garmaaeé', án hara'ayaarí ngi kuúng i oó' asma nee aaru'uumadá' ti slaslayá', tidá' taa daanduuwók i oó' geerií alé. Aaru'uumadá' eehareek, nee slaqwaradá' hho' ka sláqw.

¹⁹ Mungú haratlintatieek, nee afoodá' hho' ar baraá muunaáwók kawa eeharahat. Kumiít baraá haratlintaaooroge nee afoodá' hho' ar baraá muunaáwók na iiárií qamimeek. Asma mukko i deer oo afór hho' ar baraá muner'ín gaa sii', haratlintaaor'ín dukuutse gari sleér, kari qwaareés.

²⁰ Baraá tla/angw'ine Humenayo nee Aleksanda i dayá'. Ala inooín aníng iga paraátl amór Neetlángw i alé, as ngiwa tsaahhiya' Mungú mukuwa /ooslislín.