1 Tesalonike 5 - Biblía Axweesantá Hhohho' ar Mungú 2004

Ti amohhe'ese' as hardahamuú Aako

¹ Hháe, ala kángw qooma nee siiwa ar muruuwí i tleehharuuti gár ngis kuungá' i gooiim i káhh.

² Asma kuungá' kilá' a xuá' adór deelór Aako nir hardát adoodá' fisusmo nir hardihi xweeraawo.

³ Qoomaadá' tawa kaahi, «Wayda i deer nee amohhooa,» qoomaadá' an tidár hhitiru'uuma nuwa hhaawis, adoodá' /ameenír tsiiháy asltá xwayla ngir i hardaraarat. Ala guway ku aleeslayká.

⁴ Ala kuungá' hháe, kuungá' a baraá giwtirooká. Gawaá adoorihe a hariímaarooká deeloodá' kuungá' nuwa ar sleer adór fisusmór alé.

⁵ Asma kuungá' sleémeero a múk gwa/aateema, nee múk tlaatla/aangw. Atén a múk xweeraawooká, laqaá a múk giwtirooká.

⁶ Gawaá adoorihe atén gár tiwa hariím masók an guanaaká adoodár múk hatlá' sleémeero wa ale, ala masók an dalaa'aán nee múk qoomoó koóm.

⁷ Asma mukdá' guú', i guaain a xweera, nee mukdá' ooniimiít, i oonimaamiti a xweera.

⁸ Ala ateéká' múk tlaatla/aangw, atén masók an múk qoomoó koóm. Atén masók haratlintaao nee sla'aari an da/ewár baqaán adór gaamboórén wa ale. Nee haraxu'utír ba/ama an dahaasaán adór kofiiyár gawít wa ale.

⁹ Asma Mungú atén taa tleehhiiká as sakwasleemaarós kawa slawaan, ala tina tleéhh as ba/ama kawa slawaan ar loohír Aakoorén Yesu Kristo.

¹⁰ Inós atén tina sa gwaá', as atén tawa hootaan dinkwa nee inós, barnaxes a slafaán laqaá barnaxes aga qatlaán.

¹¹ Gawaá adoorihe kuungá' ti kiloohúng gurkwa/amise', nee ti alee/iimisé', adoosíng hamí ta tlehhita'.

Hara'aya nee intsihhiisani

¹² Hháe, atén kuungá' nu firiimaán mukdá' baraá tla/angwhúng wa gadiyuús ilaiwawa/aak, kudá' kuungá' nu sagesihhimiitá' ar baraá Aako nee nu intsaahhatimiisá' hotaá Krishaanu'uumaro.

¹³ Múk adór kwí ilaiwaa/a hhe'eesaak ar sla'aari as gadiyér'ín. Kuungá' wayda ar hootaak.

¹⁴ Hháe, atén kuungá' nu firiimaán, tli/uuse naanaaqaak, múk daqatlakwén gurkwa/amisaak, mukdá' haratlintaao niiná alee/iimiisaak, slám kuungá' masók a múk qitluú aleesláw dír muu sleémeerowo.

¹⁵ Ga/aawaak, umuúqo heewo dirhunge magoót mingiwa buú', ala umuúqo daqto ti hhooeemaá i tlehhite' kuungá' kiloohúng nee dír muu sleémeerowo.

¹⁶ Qwalaala/é' daqisleém.

¹⁷ Firo ma baloó mawaara'.

¹⁸ Mungú sluufmisaak baraá umuúqo gaaro. Asma gaarí an gár Mungú i slai dír kuungaásingá' awa baraá Kristo Yesu i diriia'a.

¹⁹ Qeeru mu xasltisaara' as kuwa siasia'.

²⁰ Axweesanoó aaru'uuma mu baloó waaqaqa'aara'.

²¹ Mura' sleémeero iiaraagáy, oo hhó' ku otá'.

²² Ti paratle' dír umuúqo gár tlaakwe.

²³ Mungú inósuú kilá', kudá' atén ti waydií hanimiís, inós kuungá' nu hhoohhooeesi kángw kilá' wa ale. Nee slám inós munerhúng nee qeeremoohúng nee slaqoohúng ngi xun as gár tlaakw munduwa sleér, ala kuungá' masók a múk xaslxaansli wásl ay bál Aakoorén Yesu Kristo nay hardihi.

²⁴ Inósuudá' kuungá' nu ateetiím i inkihhimuú kón, nee inós adoorí ga tleehh.

²⁵ Hháe, atén ti aleefiriiriinde'.

²⁶ Hhae sleémeero intsihhiisaak ar ma'amisuudá' hhohhó'.

²⁷ Án kuungá' nu hara'ayiím ar umuú Aako, barwaárí ka soomusá' dír hhae sleémeerowo.

²⁸ Aakoorén Yesu Kristo kuungá' nu tsuuqi.