1 Tesalonike 4 - Biblía Axweesantá Hhohho' ar Mungú 2004

Slafíngw Mungú gu sla'atamís

¹ Hháe, gár alhhe'eesáy a tí, kuungá' aga dirén wa intsahhé', adór kuungá' tunduwa hariím hotaango as Mungú kuwa sla'atisa'. Adoorí an adoosíng hám tar hota'. Ala hám daxta atén kuungá' nun firiimaán nee nun gurbuaán ar umuú Aako Yesu, slafíngw adór kwisíng ba/a ar hootaak.

² Kuungá' hara'ayaadá' naa haniisaán a xuá', tidár amór Aako Yésú daahh.

³ Mungú gár i slai a kuungá' masók an hotá' ar slafíngw hhohhó', nee tsaatu'uuma sleémeero kari meerá'.

⁴ Umuúqo heewo dirhunge gár kuwa hariím a slaqwtós gan aleesláy ila/aango, slaqwtós ngiwa ilaiwawaa/i, nee ngiwa harmagaahhi iwa hot baraá hhoohhooaarír wa ale.

⁵ Ala kuungá' ma hootara' ar ilatleerír tlakw, adoodár múk xoordu ir hooti, kudá' Mungú gu xua'aaká.

⁶ Umuúqo heewo dirhunge hhiyaawós munguwa al/aáy, laqaá munguwa sadakuús baraá kaangwihe. Asma heé adoorí gaa tleehh ku li/áy buu' nee Mungú, adoodá' ngira qaroó geerií gawdeesaán dirhúng i alé.

⁷ Asma Mungú atén taa ateetiiká as slafíngw tsaatu'uuma kuwa ar hootaan, ala tina ateét as slafíngw hhohhó' kuwa ar hootaan.

⁸ Umuúqo heewo oo intsaahhasarí gaa sii', a kaahaaká hee guna sií', ala a Mungú guna sií', kudá' Qeeruuwós oo hhoohhoó' ngu dirhúngií hanmiís.

⁹ Ala gawaá daanduú hhae kiwa sla'aasla'a'a, aníng kuungá' gar nus kaángwií gooiim i káhh. Asma kuungá' kilá' tunduna intsaahhatimís nee Mungú tiwa sla'aasla'a'.

¹⁰ Nee kuungá' adoorí aga tlehhité' dír hhae sleémeero, kudá' baraá yaamu sleémeero awa Makedonia. Ala hháe, kuungá' nun firiimaán tawa kángw kilá' wa ak kumita' baraá sla'aariro.

¹¹ Slám ilakaaharu tleehhaak baraá tsatsaa'areemaawo. Muruuhúng oo kuungá' nuwa hariím umuúqo deeloro tlehhitaak, nee gadiyeé tleehhaak ar dabaahúng awa kilá', adoodá' nura hara'ayiimaán.

¹² Gawaá adoorihe daqaní kuungá' tundu ilaiwawaa/ nee múk xoordu, nee umuúqo heewo u diitsakwaár ar eera'aaká.

Hardahamuú Aako

¹³ Hháe, atén a sla'aanaaká kángw mukdá' aa qaatl kuungá' kuwa xua'aaká. As kahhó' kuungá' ma gurhaamuutara' tawa adór mukduú hatlá' oo harahhifo wásl.

¹⁴ Asma atén aga haratlintiaán adór Yesu ira gwaá', niri waasleé/. Gawaá adoorihe tí sleeme a haratlintatiaán adór mukdá' aa qaatl oo Yesu gwa haratlintii', Mungú ngur huúw dinkwa nee Yesu.

¹⁵ Atén kaangwí ta kaahaan a kudá' Aako aa oó', ateéká' slafá' bál Aako binda kií/, atén a giirimanaaká dír mukdá' aa qatli.

¹⁶ Asma Aako inósuú kilá' i aweer gawaá doorí wa ale, afór ur ar hara'aya kari axaas, nee afór malaykamoó úr, nee afór tarumbeétár Mungú kari axaas. Mukdá' Kristo gwa haratlintii', kudá' aa qaatl kuri geerií waaslee/atis.

¹⁷ Aluuwo ateédá' slafá', aga meetaan tiri xaampooiis dinkwa nee inooín ar baraá huunkáy, as Aako kuwa al'awaan gáwtí alé. Gawaá adoorihe atén nee Aako a dinkwa ay alhhe'eesay wasle.

¹⁸ Gawaá adoorihe kuungá' ti kiloohúng gurkwa/amise' ar /aymi'iiká'.