1 SAMUELI 9 - Biblía Axweesantá Hhohho' ar Mungú 2004

Saulo nee Samueli tiwa doogiyé

¹ Heeko wák oo tlahhoó Benyamini i deer, umuuwós a Kishi, garmoó Abieli, Abieluú Serori, Seroruú Bekorati, Bekoratuú Afia, heé tlahhoó Benyamini, inós a daqaarmo.

² Kishi garmoó masoomo gu kón, umuuwós a Saulo, garmoó hhoohhoó', baraá múk Israeliwo heé adór inós ga áw i kaahh hhohh'aariro. Inós a heé tleér muu sleémeero ba/a, asma birta alqoomeesiyé' muu sleémeero dír suumarós gan i qwaqwadín.

³ Looár wake daqwaayér Kishi, baabuú Saulo, ina qwát. Kishi garmaawós Saulo guri báy, «Axáy nee sagadiyusmoó wák ti alkoonde', tlawé' daqwaaye leelehhtuú awaak.»

⁴ Inooín tana waaraáhh ar baraá tla/ángw yaamuudaá tlom'aá Efraimu, tari waaraáhh ar baraá yaamaá Shalisha, ala kaa ariiká. Tari waaraáhh ar baraá tla/ángw yaamaá Sha'alimu, tam amoodae gár taa ár i káhh. Tari waaraáhh ar baraá yaamaá Benyamini ala gár taa ár i káhh.

⁵ Tawa hardáh yaamaá Sufu, Saulo sagadiyusmoodá' nee inós ti koomá' guri báy, «Xaa a watlaán, baabuúeé' iinslawoó daqwaaye munguwa máy, iri atén iinslaslángw áy.»

⁶ Ala sagadiyusmoodá' Saulo guri báy, «Qaytsiít, baraá gixsarihe heé Mungú i deer, inós a heé ta ilaiwawa/i, sleémeero ar i ooi a looeema. Góh amorqá', dooqa inós kángw aairén kuká' ngu oo'.»

⁷ Saulo sagadiyusmoowós kudá' guri báy, «Ala qaytsiít, bar daqawán gár ta huwaan a milá amór heesinge? Asma muruú /ayma aa faák baraá xosluurene, tam ilahhooár ta huwaan dír heé Mungú i kaahh, gár atén ta koomaan a milá?»

⁸ Sagadiyusmoodá' Saulo guri mu/aywaáts iri oó', «Qaytsiít, baraá dabaaeene tlaqtá niiná ar shekeélír peésa a haniís dír heewú Mungú, daqaní loohirén ngi ooi.»

⁹ Bál geera baraá yaamaá Israeliro hee bira kángw yaahasár áy dír Mungú in ooi, «Axáy, góh amór iigu'utusmo.» Asma heé de'emaakae ta bay aarusmo, bál geera kun bay iigu'utusmo.

¹⁰ Naagáy Saulo sagadiyusmoowós guri báy, «Gár taa ó' ka hhoo', axáy góh.» Tari tláy ay baraá gixsadá' heé Mungú i dirii'i.

¹¹ Qoomár tawa waatlatlay amór gixsa, tiri doogiyé' nee dasuú hheék baraá yaae, kuri yaahaás, «Xaysé', dasuuwí, heé iigu'utusmo i deéro baraá ayaawihe?»

¹² Inooín kiri mu/aywaáts kiri báy, «I deer, hanoos i geerahúng, haraquutlé' hamí, asma laarí ilahhooár muruú ta tsu/i ka kón dír kitangwduú ilahhooa oo gawaá gongoamo.

¹³ Bara sadaté' baraá gixsa, aqo un adaá aandá', dír ira amoodár gáwtí tsa/anká iwa /aymár ay. Asma muu i /ayinká ay dír inós i hardihi, asma inós an heé muruudá' taa ilahhooár wa tsuú/ gu tsuúq, daqaní múk aáng taa dahi'ís iri /ayín. Gimsé', tsa/amé' hamí, asma qoomaarí an qoomár kuwa adaá aanda'.»

¹⁴ Inooín tari waatláy amór gixsa, tawa darahi baraá gixsa, naxés Samueli areengw i tsa/a/án amoodár ilahhooa ar gawaá gongoamo.

¹⁵ Adór /isá'arose Saulo iwa dír Samueli hardihiiká, AAKOÓ MUNGÚ kaangwí guna geerií laqán dír Samueli,

¹⁶ guna báy, «Matlo qoomár adór tihe heé yaamaá Benyaminír daáhh ngu huúw dirók, kuúng ku iimbaláx ar di/i, as kahhó' tawa geeraharusmoó muk'eé' kwí oo Israeli. Inós muk'eé' gu ba/amis baraá dabaá múk Filistiro, aníng slahh'amuú muk'eé' ugwa ár, asma /aa/eeín iga axaás.»

¹⁷ Tam Samueli Saulo nguwa sa ár, AAKOÓ MUNGÚ Samueli guri báy, «Heewí an kudá' kangós naa kuúng báw, kwí an kudá' muk'eé' gu sawaawuti'iím.»

¹⁸ Saulo iri tseewúy dír Samueli didár afkú do', iri oó', «Na'ás doó iigu'utusmo ooang, i diimá?»

¹⁹ Samueli Saulo guri mu/aywaáts, iri oó', «Aníng a iigu'utusmo. Geeraaeé' wa giirimeek, tsa/amé' gawa, asma án nee kuungá' laarí an al/ayimaán, matlaatleero tawa tleera' diirihe muruudá' sleémeero tas dawiimit ngu oó'.

²⁰ Ma gurhamutaar as daqwaayeerók tidá' aa qwat deelo tame, asma kaa sláy. Ala heedaádá' múk Israeli i ló'wa slai a heemá, bar kuúng nee múk doó baabuúwogeeká?»

²¹ Saulo iri oó', «Xáy, aníng oo hhay Benyaminiwóke, tlahhayrén ku iia tleereeká baraá xoorór Israeliro. Slám múk guruú doorén ku niinawekáhe baraá tlahhoó Benyaminiwo? Asma milá ala gár isa adoosíng beér?»

²² Samueli Saulo nee sagadiyusmoowós gina ar tláy giri huúw baraá matla/aangw, giri iwiitiís dír kitángw ilaiwa/ame geeraá mukdá' taa dah'ís, inooín sleémeero a mibeeri tám.

²³ Samueli huurusmo guri báy, «Áx too aáng uwa báw alúr daameek huuwang.»

²⁴ Naagáy huurusmo tluu/uuduú yaaér alu guri óh, nee fu'unaydá' gawaadí diriiá' giri qaás dír geeraá Saulo. Samueli iri oó', «Too aáng taa alúr óh an tí! Kinga dír geeraawók i qaás, /ayeek, asma kana amohhe'eés as kuúng as qoomaarí, asma una báw, ‹Dahaaye aga dahi'ís.› »

²⁵ Naagáy Saulo nee Samueli tari al/ayín baalaadae. Aluuwo tindiwa aweér gáwtá wa ale ay baraá gixsa, qatuú Saulo guri hhaáf gawaá kitaara, niri axweesiyé' gawaadá' wa ale.

²⁶ Inooín nina daarkiitiyé' matlaatlér boo/e. Da/aáw iwa daa/atutuur, Samueli Saulo guri ateét gawaá kitaara guri báy, «Tlawáng, án kuúng u haydoohiís.» Naagáy Saulo iri tláy, inooín tsaraawo tay tláy.

Saulo kuwa iimbalaáx nee Samueli waawutmoó wa ale

²⁷ Qoomár tawa awdiiti dír alhhe'eesoó gixsaro, Samueli Saulo guri báy, «Sagadiyusmo ku beer, ‹Giiriím! Kuúng lakiitáng gár niinawe, inós bira tláy aníng axweesantá Mungú ngi dirók i oó'.› »