1 SAMUELI 8 - Biblía Axweesantá Hhohho' ar Mungú 2004

Xoorór Israeli i waawutmooín iinús

¹ Qoomár Samueli iwa dín, daaqaywós guna har'ohuusér múk Israelír wa qaás.

² Umuú garmaawós oo baris ku bay Yoeli, nee oo tsár a Abiya. Inooín a har'ohuusér baraá Be'er-sheba.

³ Ala daaqaydá' loohidaá aakoó dooín kaa eehariiká, ala nina warqayé' baraá daqaari'iima leelehhit ar lohdaá slukma, nee kwasleemadaá muu kiri paslmís.

⁴ Bariisér xoorór Israeli sleémeero tari dinkwárí burumburiít, tari Ramár káy amór Samueli.

⁵ Kuri báy, «Qaytsiít, kuúng aga diín, nee daaqaywók loohirók gaa eehariiká, gimáy, waawutmoorén slawang oo ti sawaawuti'iím ar adór xoorduuqaá hatlá' sleémeero.»

⁶ Ala axweesantír xoorór Israeli iwa waawutmoó iinus Samueli guri gurboo/és, Samueli AAKOÓ MUNGÚ guri firór áy.

⁷ AAKOÓ MUNGÚ Samueli guri báy, «Afór mukwí iiárií qaaseek baraá /aymuú niqo kuúng bay'a, asma inooín kuúng ugwa si'ii'iiká, ala a aníng ina si'iyé', tawa waawutmooín.

⁸ Tlehhmi'ii'ín sleémeero iimír ngiwa baraá yaamaá Misrír wa duúx tam ay laarí aqo aníng in siaainá', nee munguaá hatlá' ngin sagadiyumaamisiyá', adoorí an adoodá' tindi kuúngí tlehhiiti hamí.

⁹ Daxta hamí afor'ín iiárií qaaseek, ala gár wake gurbua hhe'eeseek, nee adór dabér waawutmoowí gi sawaawuti'iím i diri', dir'íní alki/iteek.»

¹⁰ Samueli axweesantadaádá' sleémeero amór AAKOÓ MUNGÚ daahh gari alki/iít dír mukdaádá' waawutmoó iinuús.

¹¹ Iri oó', «Waawutmoó kuungá' nu sawaawuti'iím daharuú i kon a kwí, daaqayhúng gun ar tláy, guri qaás baraá gadiyér gaarduwós kudá' ta uuruxun, nee farasuwós kuri i tsa/án, inooín tari ti'ii'ín geeraá gaarduuwós wa ale.

¹² Inós bartaka gari qaas daanduuwós wa ale tawa geeraharuusér slaqwaruusér múk kume, nee tawa geeraharuusér slaqwaruusér múk mibeeri kooán, nee barakarka gan qaas qaymoorós ngiwa doosliya', nee balaangós nguwa bu'una' nee xoslaá slaqwara ngiwa tlehhiitiya', nee xooslaá gaarduuwose.

¹³ Nee dasuuhúng gunar tláy, tawa múk mooyángw tlehhiít, nee barakarka tari huuruuse, tooka ar mikaáte tlehhit.

¹⁴ Yaamuuhúng awa wahhaará' gin hayoh, nee qamuuhúng awa sabiíbuwo, nee seituúnirhúng tidá' hhoe, gari haniis dír sagadiyuuseerós.

¹⁵ Inós balangwhúng guri koódír wa tlaaq, nee sabiíbuuhunge sleeme, baraá qwaree/amaá mibaango oo wák gun tsaat, guri haniis dír geraharuuseerós nee sagadiyuuseerós.

¹⁶ Inós lawaalerhúng ar hhawaate nee ar /ameenaaro ginar tláy, nee hikwaahúng awa hho' ló'wa alé, nee daqwaayerhúng, inós giri gadiyeérós ar tleehh.

¹⁷ Baraá daqoorayhúng oo hikwawo ar wák baraá hikwaá mibaango a tós, nee kuungá' tari lawaaleerós.

¹⁸ Baalaadae kuungá' tari /aa/amiindá' as waawutmoohúng kudá' taa tsawadé'. Ala AAKOÓ MUNGÚ nu mu/aywatsiiká.»

¹⁹ Ala mukdá' afór Samueli kawa iiarií qaasi kana sií', tari oó', «Xáw xeer, atén gár ta sla'aan a waawutmoó atén ti sawaawuti'iím,

²⁰ as kahhó' atén a slaqmís nee xoordaá hatlá' sleémeero, waawutmo kwasleemadurén ngin tlaaq, slám masók ti geeraharahaar, nee ti aleeslaaqw baraá slaqwaraaro.»

²¹ Samueli axweesantadá' sleémeero ar muu gana iiárií qaás, gari alki/iít dír AAKOÓ MUNGÚ.

²² AAKOÓ MUNGÚ Samueli guri báy, «Afor'ín iiárií qaaseek, waawutmooín slaweek.» Samueli múk Israeli guri báy, «Tlawé' watlé' amór marayhúng.»