1 SAMUELI 7 - Biblía Axweesantá Hhohho' ar Mungú 2004

¹ Mukduú Kiriat-yearimu tindiri hardáh, sandakmooduú alqadór AAKOÓ MUNGÚ kuri ar tláy, kuri huúw dír doó Abinadabu gawaá tlooma. Inooín garmaawós kudá' ta bay Eliasari kuri tsawaár, as sandakmoó alqadór AAKOÓ MUNGÚ nguwa amohhe'eemisi.

Samueli múk Israeli nguwa sawaawuti'ín

² Sandakmo iri hotaatín deelór yaariire baraá Kiriat-yearimúr wa ale, ay kureeri mibeeri tsár. Nee múk Israeli AAKOÓ MUNGÚ guri i /aa/amín.

³ Samueli múk Israeli sleémeero guri báy, «Barnaxes aga ki/é' ar munerhúng sleémeero amór AAKOÓ MUNGÚ, gimsé' munguaá dahaaye hingeesaak, nee slaqsi'iidá' ta babay Ashtaroti, dirhunge kwahhaak. Munerhúng amohhe'eesaak dír AAKOÓ MUNGÚ. Inós kilós ku sagadiyusá', daqaní inós kuungá' nu ba/amis baraá dabaá xoorór Filistiro.»

⁴ Xoorór Israeli slaqsi'idaá mungui, awa Ba'ali, nee Ashtaroti giri hingés, AAKOÓ MUNGÚ kilós nguri sagadiyuusiyé'.

⁵ Samueli iri oó', «Múk Israeli sleémeero burumburaak Mispa, daqaní aníng nu alefiriím dír AAKOÓ MUNGÚ.»

⁶ Xoorór Israeli iri burumburít baraá Mispa, ma'aay kiri hheék, kiri ku'umiís dír geeraá AAKOÓ MUNGÚ. Baalaadae tari gwaawín, nina ooiyé', «Tlakweema iga tleehhaán dír AAKOÓ MUNGUHE.» Samueli qaa/oó múk Israeli guri baraadaá Mispár wa tlaáq.

⁷ Aluuwo xoorór Filisti adór múk Israeli ira burumburiít Mispárí ale, ngiwa axaasiyé', geeraharuusér múk Filisti iri haratleér as tawa slaqwi nee múk Israeli. Xoorór Israeli adoorí ngiwa axás, muk Filisti nguri da'ayuutiyé'.

⁸ Xoorór Israeli Samueli guri beér, «Miti mawaar alefirooro dír AAKOÓ MUNGÚ, Munguúrene, as atén tiwa ba/amisi dír dabaá mukuú Filistiro.»

⁹ Samueli deelmoó bee/i oo qaá' guri óh, guri haniís dír AAKOÓ MUNGÚ as ilahhooa, kuri daá/ adoodá' al'alé. Samueli iri /aa/amín dír AAKOÓ MUNGÚ as múk Israeli, AAKOÓ MUNGÚ iri axaás.

¹⁰ Qoomár Samueli iwa ilahhooadár da/tá hanmisi, xoorór Filisti iri tseewuúr dír xoorór Israeli, as kawa tsitsiihhi, ala AAKOÓ MUNGÚ iri slaáqw ar kwarara/ár yaariir amór múk Filistirí ale baldae, giri amoqwaareés. Xoorór Filisti kari tlatlahhaás dír geeraá xoorór Israelír wa ale.

¹¹ Xoorór Israeli iri ti'ít Mispa wa ale, múk Filisti kuri aluúwaá eehár ay baraá Bet-kari, kuri hhaamiís.

¹² Aluuwo Samueli tlaa/ano guri óh, guri sihhtís tla/ángw Mispa nee Sheni, umuuwós guri báy, Eben-eseri, iri oó', «Tam hamí AAKOÓ MUNGÚ taa alee/iís.»

¹³ Gawaá adoorihe múk Filisti kuri arbaá/, tam yaamaá múk Israeli ngaa male kala/ii'iiká, AAKOÓ MUNGÚ múk Filisti guri ilaá/ deelo sleémeero ar Samueli iwa slafi.

¹⁴ Gixsaduudá' múk Filisti aa hayóh dír múk Israeli wa alé, kiri ki/ís dír múk Israeli sleeme, iimír Ekronír wa tleemu ay Gati, nee múk Israeli yaamuuín kiri tuú/ gawaá dabaá xoorór Filistiro, ilaá múk Israeli nee múk Amori nay hhooayé'.

¹⁵ Samueli xoorór Israeli gari har'ohín baraá slafiingós sleémeero.

¹⁶ Inós umuúqo kurko gixsadaá Beteli, nee Gilgali, nee Misparo gin alhi'iimaamiit, qaa/oó múk Israeli gun tlaqaqaat baraá yaamuuká' sleémeero.

¹⁷ Nee in waawaatl ay Rama, asma do'ós i baraadá', nee didá' an kitángw gadiyeérós ar kwasleemadaá múk Israeli ngiwa tlaaqi. Kitángw ilahhooa oo AAKOÓ MUNGÚ guri tleéhh baraadií ale.