1 SAMUELI 6 - Biblía Axweesantá Hhohho' ar Mungú 2004

Sandakmoó alqado kuwa ki/ís

¹ Sandakmooduú alqadór AAKOÓ MUNGÚ ina hoót baraá yaamaá Filistír wa ale, afi qoomár slahheeraá faanqw.

² Inooínadaá múk Filisti kaahamuuse nee iigu'utuseero, kina ateét, ta kaahi, «Adór sandakmoó alqadór Aakoó Mungú ku laqaan? Ado ooare', gár kur alki/isan dirós tidií alé.»

³ Inooín tari oó', «Sandakmoosuú Munguú Israeli bur ki/isá', mu kaahareema ki/isara', ala ma dakuusara', muruú ilahhooár dakuús hingeesa ti alhube', daqaní a /uurá', slám gár slahh'amaayér dakós kasa hingeesiiká dirhunge kingi laqaán.»

⁴ Tari yaahaás, «Muruuwí ta hanisaan as dakuús hingeesa a muruú adoomá?» Inooín kari mu/aywaáts, «Slaqsoó um'i awa kooán awa taa tleéhh ar sahaábu, nee slaqsa'aá gareeraá kooán awa taa tleéhh ar sahaábu. Masók faaror'ín i alqoná', nee ar geeraharuusér múk Filisti, asma kuungá' sleémeero nee geeraharuuserhunge pu/i nuna al'ohiín.

⁵ Gawaá adoorihe slaqsa'aá um'iidá' naa ohine' tleehhaak nee slaqsa'aá gareeraá hhituuse baraá yaamuwo, kuungá' Munguú múk Israeli kuri xirfayesá', dooqa Mungú dakós gu har'oh gawaahunge, nee gawaá munguiihunge, nee baraá ayaahunge.

⁶ Ala waáy munerhúng mas gawdemisá', adór mukduú Misri nee Farao muner'ín kara gawdeés? Alaá Mungú múk Misri nguwa slahh'eemiís, xáy mukduú Israeli kwa geemaykáhe?

⁷ Hám daxta gaárír /aben tleehhaak, nee hikwaá tsár awa ta lootin amohhe'eesaak, awa taa baloó iso taaqwántí tseegiiká. Hikwaadá' ki tsegá' gawaá taaqwani, nee damay'ín ki amaslá', ki dahasá' baraá matla/aangw.

⁸ Sandakmoó alqadór AAKOÓ MUNGÚ ku qasá' gawaá gaári, nee muruudá' taa tleéhh ar sahaábu, tawa muruú ta huba', kuwa hanisa' as dakuús hingeesa, ku qasá' baraá lakwaanti dír bihhiwós, sandakmoó Mungú daqaní kur tláy nee hikwa amór ngur slaiya'.

⁹ Kuungá' xumiisé', barnaxes nguna huwiyé' ay baraá ayaaín oo Bet-shemeshi, daqaní ka xuá' adór heé atén taa um'ií kwaahh tar Munguú Israeli. Ala barnaxes ngwa ayaaíní huwi'iiká, a xu'aán adór inós tira slahhiiká, daqaní gaarí aqo tiqtír na tawo /et.»

¹⁰ Naagáy mukdá' adoorí gari tleéhh, hikwaá tsár awa du'umiisá' kiri gaárírí tseék, nee damay'ín kiri ilaá/ baraá matla/aangw.

¹¹ Sandakmooduú alqadór AAKOÓ MUNGÚ kuri tsa/aás gawaá gaári, dinkwa nee lakwantír gareeridá' taa tleéhh ar sahaábu nee slaqsayduú adór um'i.

¹² Nee hikwaadá' loohi ngina oohiyé' naa bihhaá xui'iiká ay Bet-shemeshi, loohír iintlaaxw ngina oohiyé', iwa hi'itiya' i hara aahhaminá'. Ala naa inooín naa bihhií pasli'iiká, nee geeraharuusér Filisti ina aluúwaá eehariín ay digmuú Bet-shemeshi.

¹³ Baalaadae múk Bet-shemeshi ta angaánooín bu'ún baraá qamú waá alé, naxes tawa qaytsiít, sandakmo nguna ariyé', tari kángw kilá' wa qwalaá/.

¹⁴ Gaáridá' ina hardát baraá xatstá Yoshua, heé yaamaá Bet-shemeshi, iri sihhít baraadaá kilá'. Didae tlaa/ár yangaariir i deer. Xaa'aá gaáridá' kina feehhamiís migír wa ale, hikwadá' kiri ilahhooár da/tá wa haniís dír AAKOÓ MUNGÚ.

¹⁵ Múk tlahhoó Laáwi sandakmoó alqadór AAKOÓ MUNGÚ kuri aweeriís, nee lakwantidá' slaqsi'iidaá sahaábu kooma, kiri qaás gawaá tlaa/adá' ur. Múk Bet-shemeshi ilahhooár da/a kari haniís, nee baalaadae ilahhooár muruú ta tsu/i kari haniís dír AAKOÓ MUNGÚ.

¹⁶ Geeraharuuseedá' kooán ar múk Filisti, adoorí kawa ár, tari kií/ Ekroni baalaadár kilae.

¹⁷ Um'iidaá sahaábu kudá' múk Filisti aa haniís dír AAKOÓ MUNGÚ, as dakuús hingeesa, slaqsoo wák as Ashdodi, oo wak as Gasa, oo wák as Ashkeloni, oo hatlá' as Gati, nee kooko as Ekroni.

¹⁸ Nee slaqsi'iidaá gareeraá taa tleéhh ar sahaábu, faaror'ín aqo adór gixsadaá múk Filisti. Kudá' taa sawaawuti'ín nee geeraharuuse kooán, gixsadaá koo/i gawden nee gixsadaá ninakw awa qamu sleeme. Nee tlaa/adá' ur tidá' taa sandakmooduú alqadór AAKOÓ MUNGÚ i qaás, a layár kaangwí, tam laarí baraá xatstá Yoshua yaamuloousmoó Bet-shemeshi.

¹⁹ AAKOÓ MUNGÚ múk mibeeraá faanqw oo Bet-shemeshi guri tsuú/, asma nina harqaytsitiyé' baraá guruú sandakmooduú alqadór AAKOÓ MUNGÚ, muu sleémeero iri gurhaamuút, asma AAKOÓ MUNGÚ múk yaariír guna tsuú/.

Sandakmoó Mungú i baraá Kiriat-yearimu

²⁰ Múk Bet-shemeshi tari oó', «Heé sihhtanór dír geeraá AAKOÓ MUNGÚ, Munguúwí hhoohhoó', ga aleesláw a heemá? Sandakmoowí amorqaá amá i xui, as kahhó' ayaarén nguwa geexay?»

²¹ Mukwí iri ya/abín amór múk Kiriat-yearimu, tari oó', «Xoorór Filisti sandakmooduú AAKOÓ MUNGÚ ngwa ki/isiyé', qwalaasaré' aweeraré', leehhare', kuungá' ar tlawaak.»