1 SAMUELI 5 - Biblía Axweesantá Hhohho' ar Mungú 2004

Sandakmoó alqadór Mungú i baraá tla/ángw múk Filisti

¹ Xoorór Filisti sandakmooduú alqadór Mungú guri ar tleér iimír didár Eben-eserír wa ale ay Ashdodi.

² Aluuwo múk Filisti sandakmooduú Mungú kuri gagaár, kuri dahaás baraá doó munguúín kudá' ta bay Dagoni, kuri qaás dír bihhaá Dagoni.

³ Looaytleér matlaatlér boo/e múk Ashdodi tawa hardáh, naxés Dagoni aa gurúr huú' yaamií ale dír geeraá sandakmooduú alqadór AAKOÓ MUNGÚ. Dagoni kuri taataáhh, kuri sihhtís dirós tidií ale.

⁴ Looaytleerose matlaatleero tawa tláy, naxés! Dagoni aa male gurúr huú' yaamií ale, dír geeraá sandakmooduú AAKOÓ MUNGÚ, nee ságw Dagoni nee kunda'aá dabaawós tsaraawo naa tsatimitiyé', i dír duuxutmo. Slaqwtá Dagoni kilós ina mét.

⁵ Gawaá adoorihe, gaarí an gár kaahamuusér Dagoni, nee umuúqo heewo oo aa dah baraá doó Dagoní alé, duuxutmooduú doó Dagoni ngus adaahiiká baloó ale, tam ay laarí baraá Ashdodiro.

⁶ Ala AAKOÓ MUNGÚ múk Ashdodi nee múk yaamaá isaapaydá' giri slaáhh ar xaraasleema, giri daandeemo feehhamiís. Mungú giri tiqtír um'i kwaáhh.

⁷ Mukduú Ashdodi, adoodá' ngiwa ár, tari oó', «Sandakmoowú alqadór Munguú Israeli xaasé' u ayaaréní mawaanaaká, asma Mungú xoorór Israeli ti slahh'eemiis, atén nee munguúrén Dagoniwo.»

⁸ Naagáy muu kuri ya/aáw, geeraharuusér mukduú Filisti kingiri burumbuúr, tari oó', «Xaysé'! Xoóro, sandakmoowuú alqadór Munguú múk Israeli adór ku laqaan?» Inooín tari oó', «Sandakmoowuú Munguú múk Israeli loohatisaak ay yaamaá Gati.» Sandakmoó alqadór Munguú múk Israeli kuri loohatís ay Gati.

⁹ Alaá kuwa loohatís ayaadá', Aakoó Mungú gixsadá' gari slaáhh, giri ló'wa daandeemo feehhamiís, hhawaataá ayaadá' giri tiqtír um'ií kwaáhh, bariise nee masoombaro, um'i ngiri uhaahiné'.

¹⁰ Sandakmoó Mungú kuri huúw ay Ekroni. Aluuwo sandakmooduú Mungú iwa hardáh Ekroni, mukduú Ekroni tsimahhiro yaamu gina gaamiís, tawa kaahi, «Sandakmooduú Munguú múk Israeli kungwa ayaarén i huúw. Atén nee mukrene ti xooro qwaarees.»

¹¹ Gawaá adoorihe muu kuri ya/aáw geeraharuusér múk Filisti sleémeero kari burumbuúr, tari oó', «Sandakmoosuú Munguú xoorór Israeli, hingeesaak, ki/isaak malé ale amoodií dahhi. Asma atén mitiwa tsuú/, tam nee mukrene.» Asma muu wa/aa/ír yaariir guna eér, ar daér gwa'ara baraá gixsa sleémeerowo, asma Mungú ngiwa ló'wa slahh'eemisi.

¹² Mukdá' aa qatliiká kuna tiqtír um'ií kwaáhh. Tsuunquusmoó muu baraá gixsaro ay doori.