1 SAMUELI 4 - Biblía Axweesantá Hhohho' ar Mungú 2004

Sandakmoó alqado kuwa hayóh

¹ Nee axweesantadár Samueli iri tsiyayaaxát baraá yaamaá Israeliro. Qoomaadae múk Filisti iri burumbuurít as tawa slaqwi nee múk Israeli. Xoorór Israeli iri fi'ít as tawa slaqwi nee múk Filisti, xafay'ín kuri tleéhh dír ta bay, Eben-eseri. Múk Filisti xafay'ín guri tleéhh dír ta bay Afeki.

² Múk Filisti, xoorór Israeli gari tsitsiíhh slaqwaraaro, xoorór Israeli kari baál nee múk Filisti, slawtá múk kume tsiyáhh baraá slaqwaraaro kari hhaamiís.

³ Muu iwa hardáh baraá xafay'ín, bariisér Israeli iri ó', «Ahaá waáy AAKOÓ MUNGÚ atén mista adoorír slaáhh geeraá múk Filistír wa alé? Gusé', sandakmoó alqadór AAKOÓ MUNGÚ u leehhaán Shilo, ngway huwaán amoorí, daqaní AAKOÓ MUNGÚ nee atén ti alkoomaán, nee ti ba/amis baraá dabaá wakuuseerene.»

⁴ Naagáy muu kuri ya/aáw ay Shilo, sandakmooduú alqadór AAKOÓ MUNGÚ Aleesleemusmo kunguri huúw, Munguúdá' hotaawós gáwtií diriiá' dír keruúbiro. Daaqaydá' tsár oo Eli, Hofni nee Finehasiwo, ta baraadií dirii' dinkwa nee sandakmoduú alqadór MUNGUHE.

⁵ Sandakmoó alqadór AAKOÓ MUNGÚ iwa sa dáh baraá xafi, xoorór Israeli iri tsimaahhús ar afór ur, yaamu niri ilaoohiyé'.

⁶ Múk Filisti kwaara/idár tsimaahhi kawa axaás, tari oó', «Gár kwaara/irí ur ar baraá xaftá xoorór Ebrania a milá?» Kawa tsaáhh adór sandakmoó AAKOÓ MUNGÚ ira hardáh baraá xafi,

⁷ tari da'ayuút. Tari oó', «Mungui naa hardihiyé' baraá xafoó xoorór Israeli, a tsaxwaarén! Gár adór tí aga baloó araaniiká.

⁸ A tsaxwaarén! Heé atén ti ba/amís baraá dabaá munguaá aleesleemuú kooma'a a heemá? Munguiiqá' an kudá' múk Misri ngwa faakiye' tsu/utaaro baraá xaanxáy ale ar muxtár da'aweemaá dimbadimbé.

⁹ Gimsé', hhawaati'iisé' kuungá' múk Filisti, mutunduwa lawaale tleéhh nee múk Ebrania, adoodá' inooín tar lawaalerhúng, hhawaati'iisé' nee inooín tawa slaqwa'.»

¹⁰ Múk Filisti iri slaáqw nee xoorór Israeli, xoorór Israeli kari baál, umuú heewo iri goów amór do'ós, múk yaariír kuri hhaamiís, baraá xoorór Israeliro slaqwaruusér taa daáhh a kume mibeeri tám ar ya'ár hi'iimiit baraá slaqwaraaro.

¹¹ Sandakmooduú alqadór Mungú kuri ar tláy. Hofni nee Finehasi, daaqaydá' tsár oo Eli, kuri tsuú/.

Gwa'arár Eli

¹² Heeko wák oo tlahhoó Benyamini ina tiaaín baraá tla/ángw slawtadár slaqwarár wa ale, iri ti'iíngwár hardáh ay Shilo baalaadár kilae, inqwaruuwós naa feehhamamiít, nee sagós aa teerumamiít.

¹³ Iwa hardáh naxés, Eli aa iwiít gawaá kitaangós dír afaá loohi, i daamarán, asma muunaáwós ina amooqwaár, daaraxaay gway áy as de'ér sandakmoó alqadór AAKOÓ MUNGÚ. Nee heedaádá' iwa dáh baraá gixsa, kaangw guri oó' muu sleémeero iri tsuunqumiís.

¹⁴ Eli tsimaahhidár tsuunqusmo ngiwa axaás, iri oó', «Gaarí a milá? Tsimaahhirí yaariir ar tsuunqusmo.» Heedaádá' iri gaansluút, Eli guri ádbáy.

¹⁵ Qoomaadae Eli kureeriiwós a mibeeri gwaleél nee dakaát, nee ilaawós naa boo/ayé'.

¹⁶ Heedaádá' Eli guri báy, «Aníng an heedaádá' naa baraá slaqwarár wa /akuut laarír kilá'.» Eli iri oó', «Adór slaqwara i diri' a adoomá, garmaaeé'?»

¹⁷ Heewí kaangwí gwa huuw iri oó', «Múk Israeli aa goów geeraá múk Filistír wa ale, slám múk yaariír kwa tsuú/, tam daaqaywók tsaraawo, Hofni nee Finehasi, kaa tsuú/ sleeme, nee sandakmoó Mungú kwaa hayóh.»

¹⁸ Eli kángw sandakmoó alqadór Mungú nguwa sangw axaás, iri gawaá kitaangós wa alií /aangalaa'aát, dír tliinta, istós iri qét, iri gwaá', asma inós a aakoó aa din, slamí aa wahhaár. Inós múk Israeli guna har'ohín kureeri mibeeri tsiyáhh.

Gwa'arár kwaalo'ór Finehasi

¹⁹ Slám harér garmoó Eli kudá' ta bay Finehasi a tsiiháy, i looár tleemís. Inós kaangwí oo sandakmooduú Mungú nguwa axás, nee oo gwa'arár taatoó hhawaatuuwós, nee ar hhawaatuuwose iri daanda feehhít, iri tumbarara'át, iri xwayluúr, asma asltá xwayla gana adoodí eér.

²⁰ Tam qoomár iwa istá gwa'arárií diri', /ameenadá' gaa aslaeer, gari beér, «Ma da'iimitaar, asma na/oó garma ugwa xwayluúr.» Ala inós axweesantadá' ga tlaxwká, tam gaa gaárí xu'uká.

²¹ Na/aay guri beér, Ikabodi, iri ó', «Asma xirif aa quútl dír múk Israeliro.» Asma sandakmoó alqadór Mungú kwaa hayóh, nee as taatoó hhawaatuuwós nee hhawaatuuwose niwa qatliyé'.

²² Iri ó' «Xirfuuwí aa quútl baraá Israeliro, asma sandakmoó alqadór Mungú kwaa hayóh.»