1 SAMUELI 31 - Biblía Axweesantá Hhohho' ar Mungú 2004

Gwa'arár Saulo nee daaqaywós

¹ Naagáy, múk Filisti tana slaáqw nee múk Israeli, múk Israeli iri goów geeraá múk Filistír wa ale, kiri tsuú/ gawaá tloomár Gilboa.

² Múk Filisti Saulo guna /amatseék nee daaqaywose, Yonatan nee Abinadabu nee Malkishua, daaqaywuú Saulo kuri tsuú/.

³ Slaqwara iri búhh daanduú Saulowo, múk maheeraá tlaquút, Saulo kuri harasliqiít, slám kwaa kángw kilá' wa slahh'eés ar maheeri.

⁴ Saulo heewós kudá' xosluuwós kudaá slaqwarár loohiís guri báy, «Paángarók tisíng taatahheek, aníng mutáng, ni gwaá', mukqá' taa hheehhe'eesiiká ló' aníng miwa gaás ar paánga, iri niqín.» Ala heedaádá' xooslaarós loohiís gwaa qiitliiká, asma ina da'ayuút kángw kilá' wa ale. Saulo paángarós gari taataáhh, gari qoomeés gawaawós, gari harahuú'.

⁵ Heé aáng xoslaá slaqwarár loohiís ngiwa ár, Saulo aa gwaá', inós sleeme paángarós gana qoomeés gawaawós, gari harahuú', tari alqaátl nee Saulowo.

⁶ Adoorí an adór Saulo ira gwaá', nee daaqaywós tamawo, slám nee heedaádá' xoslaá slaqwararós loohamamisa, dinkwa nee mukós sleémeero tana alqaátl baalaarihe.

⁷ Múk Israeli kudá' gayuú bartá tsár ar xatstí dirií', nee kookariya' bihhaá da/aáw duxuú Yordaniro kawa ár múk Israeli aa goów, inooín ka xuu' adór Saulo nee daaqaywose tara qaátl, inooín tari goów, gixsaduín kiri geexáy, múk Filisti iri hotaá áy baraá gixsaduín kudá' taa geexáy.

⁸ Looaytleérose, múk Filisti ina haasaánguú leéhh oo mukdá' ta tsuú/, tuuár Saulo kana ár nee daaqoó Saulo tamaawo i gawaá tloomár Gilboa.

⁹ Istá Saulo kari tsaát, nee xosluudá' naa slaqwarár wa tsiít kina qafín sleeme, ya/abuuse kari ya/aáw yaamu sleémeero awa múk Filisti, kaangwí kuri oó' dír muu, nee dír maraydaá slaqsi'iidaá mungu'ii'ín, tari adór kángw hhó' dir'ine.

¹⁰ Xosluuwós kudaá slaqwara kina qaás baraá doó Munguúín kudá' ta bay Ashtaroti, slaqwtós kari tarereé' gawaá gee/oó gixsár Bet-shani.

¹¹ Ala yaamuloouusér Yabesh-gileadi kawa axaás, adór múk Filisti Saulo ngwa laáq,

¹² hhawaataá miguuse sleémeero nina tlayé', xweera kina hi'iimiít, slaqwtá Saulo kari hingeés, nee awa daaqaywose kingari hingeés, gawaá gee/áyduú Bet-shaniro, kingari huúw ay Yabeshi, nee kiri yaamuudí daá/.

¹³ Aluuwo faduuín kingina ar tláy, ay dír gamuú xa'anoó /aantsí dír yaamaá Yabeshi, kiri didií foól. Inooínaaká tari gwaawín deelo faanqw.