1 SAMUELI 30 - Biblía Axweesantá Hhohho' ar Mungú 2004

Slaqwarár nee xoorór Amaleki

¹ Bál tám aluudae, Daudi nee mukós tana kií/ ay Siklagi. Múk Amaleki yaamaá Negebu gaa qaroó i haratláy dinkwa nee gixsadaá Siklagi, kiri daá/ ar asla.

² /Ameena nee muu sleémeero oo baraá gixsadá' oo ninákw nee oo urene kina ar tláy, mukdaádá' gira tlay, ga tsu/iiká,

³ Daudi nee mukós tawa hardáh dír gixsaro, tawa qaytsiít gixsa kaa qaroó daá/, nee tlaaway'ín, nee na/ii'ín awa daaqaay nee dasuuwo, kira tláy.

⁴ Daudi nee mukose /aa/e kina laaláy, tana kumamiít /aa/eewo, /uremooín nay faakiyé'.

⁵ Tlaawayduú Daudi tsaraawo kura tláy, Ahinoamúr Yesre'eli nee Abigaili, too aáng harér Nabali, tidár yaamaá Karmeli.

⁶ Daudi i baraá gurhaamír bo/, as na/ii'ín kiwa ar tláy. Daudi kuna dae tsaát, asma muu i inós tlaqtuú wa slaa' ar tlaa/e. Ala Daudi /uuru guna sláy as AAKOÓ MUNGÚ, Munguúwós.

⁷ Daudi iri oó' dír Abiatari garmoó Ahimeleki kuduú kaahamusmoó Mungú, «Axáy naifeéra huwang.» Abiatari gari huúw.

⁸ Daudi AAKOÓ MUNGÚ guri yaahaás kaangwihe, «Xáy, daqtí a eehára? Nee a oóha?» AAKOÓ MUNGÚ guri mu/aywaáts, «Eehareek, looeemaá kilae i ót slám mukdá' tara tláy ngu tú/.»

⁹ Gawaá adoorihe, Daudi nee mukós kuduú tsiire lahhoó' tari altláy. Tawa hardáh afaá yaaér Besori, baraá mukdá' tara tlayi oo niiná aa didií meét.

¹⁰ Ala Daudi nee múk tsiire tsiyáhh tana kumiít daqtidá' eeharahaduuwo, múk tsiire tsár tana didií meét, as tawa slaaqamiít, tam yaaeedá' warahhamuuwo kana harslaaqaát.

¹¹ Mukdaádá' nee Daudi ti koomá', heeko wák oo yaamaá Misri kuna harati'iít baraá xaanxáy ale, kuri huúw amór Daudi. Heewí kuri muruú /aymaárí haniís nee ma'aay.

¹² Kuri male muruú /aymaárí haniís, /aantsí nee /ar'aá tsár awa sabiíbuú kaaharén. /Aymaro ngiwa hhe'eés, /uuru guri sláy, asma aa /ayniká, ma'aá wahaangw gaa slayká deelo tám, xweera nee tlaatla/aango.

¹³ Daudi heé aáng guri yaahaás, «Kuúng aakoowók a heemá? Nee amór ta dahh a amá?» Inósuudá' iri oó', «Aníng a garmoó Misri, a sagadiyusmoó heé wák oo Amaleki, aakooeé' ina alií geexáy deelo tám aa waaráhh, as aníng niwa tiiq.

¹⁴ Atén a mukdá' aa slaqwarár ay yaamaá Negebúr Kereti, nee yaamuudá' Yuda dinkwa nee Negebúr Kalebu. Gixsár Siklagi kari da/aán ar asla.»

¹⁵ Daudi heé aáng guri yaahaás, «Xáy aníng i laalaqása amór daqtidá'.» Garmaadá' guri báy, «Bar lo'o aga /ák ar umuú Mungú as aníng iwa gaská, sleeme i baraá dabaá aakooeénií qaská, daqaní u huúw.»

¹⁶ Garmaadá' Daudi guna geerahaár ay dír daqtidá' i diri'. Tawa amoodár daqtidií ti'iít, naxés daqtá aáng aa tsiyayaaxát yaamuudaádae, ta /ayín nee ta xufiit, asma haasaánguú tinda huúw yaamaá Filistír wa ale nee yaamaá Yudawo ku yaariír.

¹⁷ Daudi gina harati'iít matlaatleero, gina laaláy muxtaaro ay tsiindaá bál tsár. Tam hhawaatuú aa /úy i kaahh, aqo har daaqayko tsiire tsiyáhh oo aa tsa/a/an gawaá daandemaá angamía, tari goów.

¹⁸ Daudi umuúqo gár múk Amaleki aa qo hayoohi ngina tuú/, tam tlaawaywós kudá' tsaraawo.

¹⁹ Daudi umuúqo gár tooine, ar ur nar niinawe, na/oó garma nee oo dasiiro, nee umuúqo gár taa haasaáng wa huwi ngina tuú/.

²⁰ Daudi daqoroó hikwa nee bee/aango ngiri ki/ís, mukós mura' sleémeero ngway idaáhh geeraawós wa ale. Ta axwees ta kaahi, «Muruuwí sleémeero a haasaánguú Daudi.»

²¹ Daudi niri wayaá' amór múk aáng oo tsiire tsár aa geexáy afaá yaaér Besori as niwa slaaqamitiyé' eehariimaro. Múk aáng Daudi nguwa ár nee mukdá' ti kooma' kuri al'áy. Daudi iwa dír mukwí saáp giri taaqweés.

²² Baraá mukdá' sleémeero nee Daudi taa alkoni'i múk barawasluuse oo tlakuuse i deer, tari oó', «Mukwí u qawanaaká baraá muruurén kwí naa haasaáng wa huwaani, as tiwa alkoomaniiká nee atén.» Tlaaway'ín nee na/ii'ín kiri ar tláy.

²³ Daudi iri oó', «Aasla'áy, hhaee'eé', barqanti a tleehhanaaká ar muruuwí AAKOÓ MUNGÚ naa haniís. Atén tina de'én ar amohhooa, slawtidá' naa amoorénií haratleer ngiri dabaarén i qaás.»

²⁴ Daudi iri oó', «Hee inslawayhúng kwisíng gu ya/aám i kaahh. Heedaádá' aa /eet baraá slaqwara nee kudaádá' aa meet dír xooslarén, umuúqo heewo kun qáy ar qeemuú alqoóm nee kuquú heeqá'.»

²⁵ Iimír baldá' Daudi hara'ayaarí gana dawa tleéhh baraá yaamaá múk Israeliro ay laarí.

²⁶ Daudi iwa kií/ ay Siklagi, bariiseedár Yuda ar mulqeerós gana qeemuú áy, iri oó', «Qeemuuwí naa huúw a kuduú haasaáng oo wakuusér AAKOÓ MUNGÚ.»

²⁷ Qeemuwí oo múk Beteli nee oo múk Ramotír Negebu, nee oo múk Yatiri,

²⁸ nee oo múk Aroeri, nee oo múk Sifmoti, nee oo múk Eshtemoa,

²⁹ nee oo múk Rakali, nee oo múk gixsadaá Yerame'eli, nee oo múk Keni,

³⁰ nee oo múk Horma, nee oo múk Borashani, nee oo múk Ataki,

³¹ nee oo múk Hebroni, Daudi mukdá' sleémeero oo baraá gixsaduudá' inós nee mukós tawa hi'iimiít guna qáy sleémeero.