1 SAMUELI 3 - Biblía Axweesantá Hhohho' ar Mungú 2004

Ateetamór Samueli

¹ Aluuwo garmaadá' ta bay Samueli AAKOÓ MUNGÚ guna sagadiyuús dír Eli wa ale. Deeloodae axweesantá amór AAKOÓ MUNGÚ daahh ina ilatlakuúr, tam iigu'utu sleeme ina ló'wa /aarúy.

² Qoomaadae ilaá Eli na boo/ayé' xumsi ga aslayká. Baalarka wake iwa qatuú áy baraá kutuwirós.

³ Qoomaadae tsaa'astá Doó AAKOÓ MUNGÚ kaa gaasiiká, Samueli ina qaát baraá Doó AAKOÓ MUNGÚ, didá' sandakmoó alqadór Mungú i dirii'i.

⁴ AAKOÓ MUNGÚ Samueli guri ateét, iri oó', «Samuéli, Samuéli» Samueli iri ooín, «Án areeng.»

⁵ Iri tláy amór Eli ar gaanslaay, iri oó', «Án areeng, asma kuúng ina atét.» Eli iri oó' «Ugwa ateetiiká, qati ki/eek.» Samueli iri tláy, iri qatií kií/.

⁶ AAKOÓ MUNGÚ guri sagaáwa tsár wa ateét, «Samuéli!» Samueli iri tláy amór Eli, iri oó', «Aníng areeng, asma ina atét.» Guri mu/aywaáts, «Ugwa ateetiiká, garmaaeé', qati ki/eek male ale.»

⁷ Samueli qoomaarihe AAKOÓ MUNGÚ gwaa xuiiká, nee axweesantá AAKOÓ MUNGÚ kaa baraawósí geehhoeesiiká.

⁸ AAKOÓ MUNGÚ Samueli guri ateét sagaáwa tame. Inós iri tláy amór Eli iri oó', «Aníng areeng, asma kuúng nina atét.» Eli gari tsaáhh adór AAKOÓ MUNGÚ garmaadá' ngura ateét.

⁹ Gawaá adoorihe Eli Samueli guri báy, «Tláw malé qaát, bar ugwa male ateét, ta o', ‹Ilawaatsáng, AAKOÓ MUNGÚ, asma sagadiyusmoowók i axmiis.› » Naagáy Samueli iri tláy, iri qatií kií/.

¹⁰ Aluuwo Aakoó Mungú nay hardáh, iri sihhiít, iri ateét adór geeraá wa alé «Samuéli! Samuéli!» Samueli iri oó', «Ilawatsáng Aáko, asma sagadiyusmoowók i axmiis.»

¹¹ AAKOÓ MUNGÚ Samueli guri báy, «Ga/aaweek gár muu gu dae tsaat an tleéhh baraá Israeliro, tam umuúqo heé ga axaasa iaawós gay oh.

¹² Baldae axweesantadá' sleémeero naa oó' daanduú doó Eliwo a boo/eés, iimír iimu/uúngw wa ale ay alhhe'eesaay.

¹³ Asma una ádbaabáw adór do'ós ngur sakwasleemuút kureerisleém, as tlakweemaadaá do'ós i xui, ar daaqaywós iwa aníng /oosliislin, ala inós gwaa har'oohiiká.

¹⁴ Gawaá adoorihe án doó Eli ugwa lu'ús, asma iringeédár doó Eli ka baloó hamaatliiká ar ilahhooa, laqaá ar mura' tsu/uta.»

¹⁵ Samueli iri guaaín ay matlaatle, aluuwo afkú doó AAKOÓ MUNGÚ guri gweér. Samueli iri da'ayuút kángw iigu'utuudá' nguwa ooi dír Eli.

¹⁶ Naagáy Eli Samueli guri ateét, iri oó', «Samuéli, garmaaeé'.» Samueli iri oó', «Án areeng.»

¹⁷ Guri yaahaás, «Mungú /aymuú naa kuúngí oó' a milá? Mu duquumaar, gám tidá' sleémeero naa dirógí oó' bara qo tsuwa duquún, Mungú adoosíng ngi kuúngí tleehhi, nee ngi harwaarahhaasi.»

¹⁸ Naagáy Samueli umuúqo /aymuuwo guna oó', oo aa duqún i kaahh. Eli iri oó', «Inós a AAKOÓ MUNGÚ. Inós adór i slai ngi tleehhi.»

¹⁹ Samueli iri uráy, AAKOÓ MUNGÚ nee inós a dinkwa, tam /aymuú wák oo Mungú gwa paahhasiiká.

²⁰ Xoorór Israeli sleémeero, iimír yaamaá Danír wa tleemu ay Be'er-sheba, kari tsaáhh, adór heewí ta bay Samueli tar aarusmoó AAKOÓ MUNGÚ.

²¹ AAKOÓ MUNGÚ tiri malé geehhooeés baraá Shilór wa alé, asma AAKOÓ MUNGÚ tina geehhooeemiís dír Samueli baraá Shilór wa alé ar loohír axweesantós.