1 SAMUELI 29 - Biblía Axweesantá Hhohho' ar Mungú 2004

Daudi kuwa sií' nee múk Filisti

¹ Múk Filisti slaqwaruuse kana burumbuúr dír ta bay Afeki, nee múk Israeli xafay'ín guna tleéhh afaá xatsoodaá kutloó koomá' awa yaamaá Yesre'eli.

² Geeraharuusér múk Filisti tana waaraáhh ar dír waawitaaín, daqoroó tsiire nee oo kumeero, Daudi nee mukose dinkwa nee Akishi, alaá slaqwaruuseedá' kingina haár.

³ Geeraharuusér Filisti kaangwí guna yaahás, «Mukuú Ebrania mi tleehh diirihe.» Akishi geeraharuuseedár múk Filisti gari mu/aywaáts, «Daudiwí a sagadiyusmoó Saulo, waawutmoó múk Israeli. Inós nee aníng ana alhootaán qoomár tleere, kureeraá hhaawa'aaká, iimír niwa amor'eénií goów dakuúsár ngwi ár i káhh.»

⁴ Ala geeraharuusér múk Filisti Akishi kuri i buúhh, tari oó', «Heesíng ki/isek amór yaamuudá' taa inósi hanís, i amoodá' wa hooti. Tookeél nee atén mitiwa koomaán baraá slaqwara. Barnaxes ugwa huwaán baraá slaqwaraaro, atén ti sakii/, tari wakusmoorén. A ga/eera'aakáhe heesíng loohi gan sláy ar nee aakoowós tir kaahi slaya'?

⁵ Xáy Daudi a kudaeéke kwaynaawós /ameena aa daa'ángw wa ót baraá neetooro, tawa kaahi, ‹Saulo kumeerós gaa tsuú/, ala Daudi kumér mibaangw gaa tsuú/.› »

⁶ Akishi Daudi guri ateét, guri báy, «Kuúng a heé inkihhím dir'eene tam AAKOÓ MUNGÚ kudá' slaáf ga xuu', amór barte'eene gár hhoo' a tin koomaán baraá slaqwara, asma gár tlaakw ar naa ár i káhh, iimír bál kuúng niwa amor'eé' hardát ay laarí. Tam adoorihe geeraharuuse muner'ín aa ya/aandiiká gawaawoge.

⁷ Hám daxta as adoorihe kuúng kií/ amór do'. Tláw ar wayda, geeraharuusér uren ar múk Filisti ma buhhtisar.»

⁸ Daudi, Akishi guri báy, «Ala gár naa tleéhh a milá? Adoodá' kuúng kara ó', adór dakuúsár taa aán ir káhh dir'eene iimír baalaadá' án kuúng iwa sagadiyusmoowók wa qás ay laarí, asma milá mas slaqwarár awaaká amór wakuusér aakooeé', kuduú waawutmo.»

⁹ Akishi iri oó', «Aníng a xuú', adór kuúng tur dakuús wásl dír geeraaeene adór malaykamoó Mungú. Ala tam adoorihe, geeraharuusér múk Filisti tana oó', ‹Tookeél, heesíng nee atén mitiwa koomaán baraá slaqwara.›

¹⁰ Hamí kuúng dinkwa nee sagadiyuusér aakoowók Saulo, kudá' nee kuúng naa alhardate', matlo matlaatleero tseewa tlawé', qoomár iimi bir /awakukuúr.»

¹¹ Looaytleérose, Daudi nee mukose tana tláy matlaatlér boo/e, tari kií/ amór yaamaá Filisti. Ala múk Filisti tana tláy ay yaamaá Yesre'eli.