1 SAMUELI 28 - Biblía Axweesantá Hhohho' ar Mungú 2004

¹ Afiqooma ina waaráhh, múk Filisti ina burumburiít ta amohhe'eesiyé' as slaqwara, nee múk Israeli. Akishi Daudi guri báy, «Adoorí xu'uti hhe'eeseek kuúng nee mukók dinkwa nee aníng i hariín tawa tlawaan baraá slaqwara.»

² Daudi Akishi guri mu/aywaáts, iri oó', «Kuúng aqo aán tidá' sagadiyusmoowók i tleehhi.» Akishi iri oó', «Aníng kuúng u xuumusmooeé' wa qaás.»

Saulo iwa giaá yaahasár áy

³ Qoomaarihe, Samueli aa qaroó gwaá', dír kway fool a dír do'ós baraá Rama. Múk Israeli sleémeero guri satsuunquumiís. Saulo qwaslaarér giaá duxuum nee da/aluuseero baraá ayko gaa tlatlahhaás.

⁴ Múk Filisti tari burumburiít, xafay'ín kuri tleéhh baraá Shunemu, Saulo múk Israeli sleémeero guri burumbuúr, xafay'ín kuri tleéhh gawaá tloomár Gilboa.

⁵ Saulo slaqwaruuseedár Filisti ngiwa ár gura' ma'aay ngway dalaa/iyé', iri kitlkitlaáy guri áy.

⁶ Saulo AAKOÓ MUNGÚ guna firín gawaá daanduú tihe, AAKOÓ MUNGÚ gwaa mu/aywatsiiká ar loohír tlata laqaá ar iso nee ar aaruuse.

⁷ Saulo sagadiyuuseerós gari báy, «/Ameenír giaá duxuum leeleehhare', as aníng kangw'eé' kwí nguwa dirósií yaahasár aw.» Sagadiyuuseerós guri beér, «/Ameenír wák i deer ar tsaahhasíng koom baraá yaamaá Endoriro.»

⁸ Saulo tlabaawós giri warqeés, tiri ilaqaás tawa adór múk hatlá', iri tláy nee mukós oo tsár tiri koné'. Tari xweeraá hardáh dír doó /ameenír aáng, iri oó', «Na'ás isooeé' kuká' arang baraá miislaywoge. Heedaádá' aníng ni uma oo' watleesáng baraá gi'ií wa alé.»

⁹ /Ameenidá' inós guri beér, «Kuúng a xú' adór Saulo múk giaá duxaaxiím nee da/aluuse ngira hhaamiís sleémeero baraá yaamaá Israeliro. Asma milá hamí misa tsaaxwelírí qás ar aníng i oh, iri gás.»

¹⁰ Saulo lo'o gari /aáy, ar umuú AAKOÓ MUNGÚ, iri oó', «Ar adór AAKOÓ MUNGÚ ir daadeér, kiíng slahhtá ta sleer as daanduú kaangwí i káhh.»

¹¹ /Ameenidá' Saulo guri yaahás, «Xáy heé ni waatlees baraá gi'ií wa ale a heemá?» Saulo gari báy, «Samueli na duuxang.»

¹² /Ameenír aáng Samueli nguwa sa aán ina /á/ ar afór ur, Saulo guri beér, «Asma waáy misa al/ák, kuúng baré a Saulo.»

¹³ Waawutmo gari báy, «Ma da'ayumiitaar, maga aán?» /Ameenidá' guri beér, «Gár naa ár a mungú nin baraá yaamuú wa ti'imiit.»

¹⁴ Saulo /ameenidá' gari báy, «A slaqamís nee heemá?» /Ameenidá' iri ó' «A aakoó aa din nin waatlatláy gawa, inós taa untsuús ar hiyaay.» Adoorihe Saulo guri tsaáhh adór tar Samueli. Saulo iri xupuú' ay yaamu, giti nee gura' giri yaamúr óh.

¹⁵ Samueli iri oó' dír Saulo, «Ahaá waáy misa gononoár eér as iwa amoorír gáwtí tsa/ás?» Saulo guri báy, «Aníng a baraá slahh'amú úr, as múk Filisti niwa slaqwarár áy amor'eé', nee Mungú iga alaá xu'ús i mu/aywatsinká ar loohír tlata tam aaruseero. An gár án kuúng usa ateét as kahhó' iwa xu'utis gár aníng wa hariim tleehhamooro.»

¹⁶ Samueli iri oó', «Ahaá waáy gár aníng is fiririin gawaá daanduú axweesantá AAKOÓ MUNGÚ, kuúng uwa alaá xu'ús, nee iri wakusmoowók tleehhiít?

¹⁷ AAKOÓ MUNGÚ tidá' aa oó' ar afkueé' daanduuwoge gaa tleéhh. AAKOÓ MUNGÚ waawuti'iima gaa dakók wa /asliís gari haniís dír inslaawmoowók Daudi.

¹⁸ As kuúng afór AAKOÓ MUNGÚ kawa ilaiwa/ká, tam buhhtaawós iga boo/eská gawaá daanduú múk Amalekiro. An gár AAKOÓ MUNGÚ laarí usa kangwsí tleéhh.

¹⁹ Daanduú tisinge slamí AAKOÓ MUNGÚ kuúng nee múk Israeli nu haniis baraá dabaá múk Filisti. Matlo kuúng nee na/iiwoge ni hargwa'á' amor'eé', slaqwaruusér Israeli AAKOÓ MUNGÚ ga dabaá múk Filistirí qaas.»

²⁰ Saulo axweesantá Samueli ngiwa axaás, iri dae feehhiít, iri huú' ar gura' yaamií ale, iri nus'umiít, asma baalaarihe muruú /ayma gwaa slayká, xweera nee tlaatla/ango.

²¹ Ala /ameenidá' ina amór Saulo keér, Saulo nguwa aán aa gwaá' de'eero, guri beér, «Ga/aaweek anír sagadiyuso'oorók kuúng una iiárií qaás, slafingw'eé' una baraá tsaxwií dahás, as adoodá' aníng kuúng iwa beér adoosíng tleehhang.

²² Gimáy hamí daxta sagadiyuso'oorók iiárií qaaseek, muruú /ayma ngu amohhe'eés, /ayiím, daqaní /uuruú tar kumit baraá aaiiwoge u sleér.»

²³ Ala Saulo ina sií' iri oó', «A /ayimaaká.» Ala /ameenidá' nee sagadiyuusero kuri harhhehhe'eés as iwa /ayin, inós giri iiárií qaás, niri yaamuú wa sihhiít iri iwiít gawaá qatani.

²⁴ /Ameenidá' damarós tooka wák ar aa wahhat ga koón dír do'o, gana adaá gás ar gaanslaay, puuruú angaáno guri taatáhh, guri lufú/, mikaátér taa sluuftisiiká gari tléhh.

²⁵ Naagáy muruú /aymár Saulo guri hanís, oo sagadiyuuseerós sleeme guri hanís, inooín tari /ayín, aluuwo xweeradaá kilae tari tláy.