1 SAMUELI 27 - Biblía Axweesantá Hhohho' ar Mungú 2004

Daudi i baraá tla/ángw múk Filisti

¹ Daudi iri baraá muunaáwós i oó', «Ís baalarkaaro Saulo án i gaas. Gár tsiní dir'eene an goów amór yaamaá múk Filisti. Saulo bira leelehhahhiít baraá guruú yaamuukaá Israeliro iqo mune sii', adoorihe daqaní aníng a /úw Saulowo.»

² Gawaá adorihe, Daudi nee mukós kuduú tsiire lahhoó' tana tláy ar gaanslaay, tari hardáh amór Akishi garmoó Maoki, waawutmoó yaamaá Gati.

³ Daudi nee múk do'ose tana alhoót nee Akishi amoodár Gatír wa ale. Daudi tlaawaay ngu kon a tsár, Ahinoamu tidár Yesre'eli nee Abigaili kwaalo'oodár Nabali ar yaamaá Karmeli.

⁴ Saulo ngiwa axaás adór Daudi ira goów ay Gati, Saulo aa sangw leelehhtuú Daudi ki/iiká.

⁵ Baalarka wake, Daudi Akishi guri báy, «Aníng bira ya/aán, qawáng gixsár wake baraá yaamuuwoge as kahhó' dír hotaangw ngiwa slaw. Gár án nee kuúng tas alhootaan i káhh baraá gixsár waawutmoó wa ale.»

⁶ Baalaarihe, waawutmo Akishi Daudi guri qáy ar gixsár ta bay Siklagi. Gawaá adoorihe iimír baalaadá' gixsár Siklagi waawutmoó Yuda gari sláy.

⁷ Daudi afiqooma ngaa hoót baraá yaamaá múk Filistiro a kuru wak nee slahheeraá tsiyáhh.

⁸ Baraá afiqoomaadae Daudi nee mukós tana slaqwarár áy amór múk Geshuri, nee múk Girisi nee múk Amaleki. Inooín an yaamuloouusér yaamuudá' iimír aange. Giri haraadáh baraá yaamuuínií ale, ay yaamaá múk Shuri, kudaá digma nee yaamaá Misri.

⁹ Daudi ayeemoodá' gina haraadáh ar slaqwara, tam heé aa geexáy i kaahh, hhawaate nee /ameenaaro, hikwa nee daqwaaye, nee angamía, bee/aangw nee tlabaawo, iri kií/ amór Akishi.

¹⁰ Akishi Daudi guri báy, «Laarí nee múk bartá amá aga slaqwe'?» Daudi iri oó', «A yaamaá Negebúr Yuda,» laqaá «Negebúr Yerame'eli,» laqaá «Negebúr múk Keni.»

¹¹ Daudi tam hee gwa slafiíngwí geexayká hhawaate nee /ameenaaro, as ngiwa huwi ay Gati, ina baraá muunaáwósi oó', «Kangwíng aluuwo kungu daandemoorén i oo', tawa ooi, ‹Daudi kángw aa /imiís a kwí nee kuqá'.› » Gawaá adoorihe, adoorí tay dawa dír Daudiwo qoomár yaamaá múk Filisti ngiwa hoót.

¹² Akishi, Daudi guri gurií baá/, inós ngiwa xui Daudi kwaa sií' nee múk Israeli, iri baraá muunaáwós i oó', «Daxta án in sagadiyuus baraá hotangw'eé' sleémeero.»