1 SAMUELI 26 - Biblía Axweesantá Hhohho' ar Mungú 2004

Daudi Saulo gaasaro nguwa malé máy

¹ Hhawaatekaariya' baraá yaamaá Sifu nina Gibeár kayé' amór Saulo, nguri bayé', «Daudi aa nahhaát baraá tlom'aá Hakila, bihhaá da/aáw awa Yeshimoni.»

² Saulo iri gaanslár tláy, baraá darmuú yaamaá Sifu iwa Daudi leelehhiiti, i mukós oo slaqwaaruuseerós kón ar kume tám ar tinda tsawaár baraá múk Israelír wa ale.

³ Saulo xafay'ín guna tleéhh gawaá tloomaadá' ta bay Hakila, amór bihhaá da/aáw awa loohidár Yeshimoni, ala Daudi ina meét baraá darma. Daudi gari xuú' adór Saulo nira baraá darmuú káy iwa inós leelehhiiti.

⁴ Daudi tsawtsawuuse gari ya/aáw, looeemaá hardahamuú Saulo giri sláy.

⁵ Daudi iri tláy ay didaádá' Saulo xaftós ngi tleéhh gari ár, naxés Saulo a xopiít gu'uteero, nee Abneri garmoó Neri geeraharusmoó slaqwaruusér Saulo aa guú' sleeme. Saulo aa qaát baraá tla/ángw xaftidá' kwaa harweér nee slaqwaruuseerós.

⁶ Daudi Ahimelekiduú Hiti nee Abishai hhiyoó Yoabu garmoó Seruya giri báy, «Heé nee aníng al/eetá' amór xaftá Saulo a heemá?» Abishai iri oó', «Án nee kuúng ti koomaán.»

⁷ Daudi nee Abishai tari tláy xweeraawo amór slaqwaruusér Saulo, tari dáh baraá xaftá Saulo, naxés Saulo aa guú' i baraá tla/ángw xaftidá', nee lawaalarós gaa siíhh yaamií ale dír sagós. Abneri nee slaqwaruuseero Saulo kwaa mak harweér ala taa xopmiít gu'uteero.

⁸ Abishai Daudi guri báy, «Laarí Mungú wakusmoowók ngwaa gawaá dabaawók i qaás. Gím lakiít aníng u muttá wákií hhe'eés ar lawaala nguri huwísh, muttá tsare a ki/aaká.»

⁹ Ala Daudi Abishai guri báy, «Inós mu gaasaar, asma heé taa tsawaár nee AAKOÓ MUNGÚ, guri iimbalaáx ar di/i, heé gu qiítl looloqosaro a heemá iri dakuúsár konká»

¹⁰ Daudi iri oó', «Ar adoodá' AAKOÓ MUNGÚ ir daadeér inós gun slaahh, laqaá deeloorós ar gwa'ara niqo xeér, laqaá in qo slaqwarár áy kuri baraadií suqúy.

¹¹ Ala AAKOÓ MUNGÚ i ya/anká dakw'eé' nguwa looloqoos gawaá heewós kudá' aa tsawaár guri iimbalaáx ar di/i. Ala lawaalarós tiqá' tseew dír sagós nee qumtá ma'aywo na taataahhang, daqaní a tlawaán.»

¹² Daudi lawaaladá' nee qumtá ma'aywo gina taataáhh, tooaáng dír ságw Saulo i tseew, inooín tari tláy. Ala tam heé kaangwí gwaa ar i kaahh, adór ira tleehharuút, tam heé aa daarkiit i kaahh, asma AAKOÓ MUNGÚ gina slar/atamís gu'uteero.

¹³ Daudi iri waaraáhh amór bihhaá tsár awa xatstidá', iri sihhiít gawaá ságw tloomár saaw dír slaqwaruusér Saulowo.

¹⁴ Daudi iri tseé' amór slaqwaruuseedár Saulo nee Abneri garmoó Neri, iri oó', «Abnéri, kuúng a axmiskáhe?» Abneri guri báy, «Kuúng a heemá tawa waawutmoó ateetiin?»

¹⁵ Daudi iri oó', «Xáy kuúng a hhawaatuwookáhe, oo adór kuúng a heemá baraá múk Israeliro? Ala baré aakoowók kusuú waawutmo u xuundaaká? Asma heeko wák oo bartarén ina dáh baraá xaftahúng as aakoowók nguwa gaasi!

¹⁶ Kuúng adoosíng taa tléhh i qoondaaká, án lo'o aga /aáy ar umuú AAKOÓ MUNGÚ, kuúng gár tuwa hariím a gwa'ara, asma aakoohúng ugwa xuundi'iiká, kudá' AAKOÓ MUNGÚ aa iimbalaáx ar di/i. Hamí qaytsiít, lawaalár waawutmo nee qumtidár ma'aywo kudá' dír sagósií dirii'á', axáy i dáy'a.»

¹⁷ Saulo afór Daudi gari tsaáhh, iri oó', «Afoorí a tóge garmaaeé' Daudi?» Daudi iri oó', «Aakooeé' waawutámo, afoorí a te'eé'.»

¹⁸ Daudi iri kumiít axweesanto, «Asma waáy gár anuú sagadiyusmoowók is leelehhit? Gár naa tleéhh a umós? Gár tlaakw ar naa tleéhh a milá?

¹⁹ Hamí daxta, aakooeé' kuú waawutmo, axweesantá sagadiyusmoowók iiárií qaaseek. Barnaxes AAKOÓ MUNGÚ una amor'eéní tliwií/, ilahhooa ngi oohi tidá' inslawaywós gu warqees. Ala barnaxes a afér muu, múk adór kwí AAKOÓ MUNGÚ ngu lu'usi kwí aníng i gusisiím dír aalir'eé' tidá' AAKOÓ MUNGÚ naa haniís tawa kaahi, ‹Tláw slaqsi'iidaá munguaá hatlá' sagadiyuseek.›

²⁰ Gím daxta mi geexawaar nari gwaá' baraá yaamaá ayaá hee, dír nee AAKOÓ MUNGÚ tiwa harasawén. Asma waáy kuúng waawutmoó múk Israeli mas slafingw'eé' leelehhít, slaqás adór heé xooyángw slakaát gawaá tloomár wa ale.»

²¹ Saulo guri báy, «Aníng dakuús aga tleéhh. Ki/ang garmaaeé' Daudi, án kuúng u gár tlaákwií tleehhaaká, as laarí slafingw'eé' a gár afhhamít dír geeraawoge. Aníng aga daktu'uút nee kángw kilae aga tlakweés.»

²² Daudi Saulo guri báy, «Aá waawutámo, qayteek lawaalarók i diirí, garmaawók oo wák ya/aawang ngi leehhi.

²³ AAKOÓ MUNGÚ heewós oo inkihhím gu amohhe'eemiis ar qoomoó inkihhimuuwós. Laarí AAKOÓ MUNGÚ kuúng una dabaaeé' qaás, ala aníng aga slaiiká dakw'eé' nguwa looloqoos gawaawók, asma kuúng a kudá' taa tsawaár, turi iimbalaáx ar di/i nee AAKOÓ MUNGÚ.

²⁴ Qayteek, adoodá' slafiingók kur afhhamít dír geeraaeene, alók masók slafingw'eé' sleeme kun afhhamít dír geeraá AAKOÓ MUNGUHE, inós aníng i ba/amisi baraá slahh'amaaye sleémeero.»

²⁵ Saulo Daudi guri báy, «Mungú kuúng u tsuuqi garmaaeé' Daudi, kuúng muruú urén un tléhh, baraá muruuwók oo ta tlehhita, gár sii' i káhh.» Daudi iri tláy, Saulo iri kií/ amór do'ós.