1 SAMUELI 24 - Biblía Axweesantá Hhohho' ar Mungú 2004

Daudi Saulo gaasaro nguwa máy

¹ Qoomár Saulo niwa waátl baraá slaqwarár nee múk Filistiro, kuna báy, «Daudi hanooq i baraá darmuú Engedi.»

² Saulo nee slaqwaruuseerós ar kume tám, ar ta tsawaár baraá yaamaá Israeliro, tari tláy Daudi kuri leelehhtuú áy, nee mukós kwihe baraá tla/uudá' tsagna i hot.

³ Saulo iwa baraá aaií dirii'i, ina hardáh dír mar'irka wák tseew bihhaá slumaá bee/aangw, ina dáh baraá mar'idá' as iwa sla/tá slahhtá ay, Daudi nee mukós taa iwiít baraá guruuduú mar'i oo baraaqií saáw.

⁴ Muu Daudi guri báy, «Laarí an baalaadá' AAKOÓ MUNGÚ iwa oó', ‹Qaytsiít, wakusmoowók ngu qaás gawaá dabaawók.› Adoodá' ta sla' baraá muunaáwoge ti tlehh.» Daudi iri tseegiís ay amór alaá Saulo, pasltá inqwaarír Saulo gari tsaát.

⁵ Daudi iri slahhaá' baraá muunaáwose adoodá' pasltá inqwaarír Saulo ngiwa qawti tsaát.

⁶ Daudi mukós guri báy, «Aasla'áy, AAKOÓ MUNGÚ dakw'eé' ngu pa/asi, gár tlaakw mawa tleéhh gawaá aakooeé' kwí taa iimbalaáx nee AAKOÓ MUNGÚ. Dakw'eé' muwa looloqoós gawaá heé AAKOÓ MUNGÚ aa iimbalaáx ar di/i.»

⁷ Ar axweesantihe, Daudi mukós guri gurbuú' as Saulo mukuwa hariiáy. Aluuwo Saulo iri sihhiít, iri ti'iít baraá mar'iro, iri kumiít aaiiwose.

⁸ Aluuwo Daudi iri sihhiít iri ti'iít baraá mar'iro. Saulo guri aluúwaá al'ateét, «Aakooeé' waawutámo.» Waawutmo Saulo iwa alií qaytsiít, Daudi ina yaamií xupuú', giti gari yaamúr óh as ilaiwa/ame.

⁹ Daudi Saulo guri báy, «Asma milá axweesanoó muu mus iiárií qamiín, oo káh, ‹Daudi kuúng u harieemuú wa slaa'?›

¹⁰ Qayteek laarí hamí, adór kuúnguú kilá' kara aán ilaawoge, qoomár tawa baraá mar'írií diri', AAKOÓ MUNGÚ una gawaá dabaeénií qaás. Muk'eé' bahh'alé aníng iri báy, ‹Gaaseek,› ala una gurtláw, niri oó' ‹dakw'eé' u looloqoosaaká gawaá aakooeé', asma inós a kudá' taa iimbalaáx nee AAKOÓ MUNGÚ.›

¹¹ Baabuúeé' qaytsiít, pasltá inqwaarirók i gawaá dakw'eé', barnaxes pasltá inqwaarirók ana tsaát, kuúng uri gaasiiká, ka xú' nee ka tsáhh adór dabaaeé' kir hhohhó', tam /aymuú kuúng uwa sadakuús i kaahh, ala kuúng án ina slakaamaamít as iwa gaasár wa sla'.

¹² AAKOÓ MUNGÚ har'ohaay ngu ay dír án nee kuunge, nee AAKOÓ MUNGÚ marmár'eé' ngi gawaawók i bui, án kuúng ló' muwa kwatiít dakw'eene.

¹³ Adoodá' múk bál qaro ngira oó', tawa kaahi, ‹Baraá múk tlakwe gár ti'imiit a tlakweema.› Ala aníng dakw'eé' ngu gawaawók i looloqoosaaká.

¹⁴ Hám kuúng waawutmoó Israeli heé ta slakat as kuwa gaasár wa sla' a heemá? Gár ta slakat a seeoó aa gwaái, laqaá kwasimo?

¹⁵ AAKOÓ MUNGÚ ti har'oohi, ti sakwasleemuti án nee kuúng. Inós kaangwí ngu alqaytsiti, nee aníng i alekalaa/i baraá axweesanay'eene, nee i ba/amisi baraá dabaawoge.»

¹⁶ Qoomár Daudi axweesanaywós nguwa hhe'eés alki/ituuwo dír Saulo, Saulo iri oó', «Xáy Daudi, garmaaeé', afoorí a tsuwa tóge?» Saulo iri tseé' /aa/eewo.

¹⁷ Saulo Daudi guri báy, «Kuúng an gan'amuú koón ta aninge. Kuúng aníng ina hhooeemií tléhh, ala aníng kuúng una gár tlaákwí tleéhh.

¹⁸ Laarí ngaa laqama hhe'és adór kuúng tur hhoó' dir'eene. Laatí qoomár AAKOÓ MUNGÚ aníng iwa dabaawók i qaás án kuúng iga gaská.

¹⁹ Asma baraá hotaariro hee bar wakusmoowós ngwaa ár, xáy, guqo tawo máya iwa tlay ar amohhooa dír geeraawós wa ale? AAKOÓ MUNGÚ kuúng u hhooeemáy tleehhi, as tí kuúng naa aníng i tléhh laarí.

²⁰ Nee hamí qayteek aga tsaáhh adór kuúng tar waawutmoó Israeli, nee baraá dabaawoge waawuti'iimár múk Israeli iri gawduwa hhe'és.

²¹ Áx daxta hamí, lo'o /ayeék ar umuú AAKOÓ MUNGÚ, yaeemir'eé' kawa qwaareská baraá guruú doó baabuúeene.»

²² Daudi lo'oodá' gari dír geeraá Saulo wa /aáy, Saulo iri waátl amór do'ós. Ala Daudi nee mukós tari kií/ baraá koo/idá' gawit.