1 SAMUELI 23 - Biblía Axweesantá Hhohho' ar Mungú 2004

Daudi gixsár Keila ngiwa tuú/

¹ Daudi kuri báy, «Qaytsiít, múk Filisti i slaaqw baraá gixsár Keilár wa alé, nee balaangw ngun fisiisiná' kuduú dír afeenadá' balaangw kuwa slahhaahhan.»

² Naagáy Daudi AAKOÓ MUNGÚ guri yaahaás, guri báy, «Xáy, a haratláwa tawa slaqwaan nee múk Filisti?» AAKOÓ MUNGÚ Daudi guri báy, «Tláw, múk Filisti tsitsihheek, nee gixsár Keila tu/ang.»

³ Mukdaáduú Daudi, Daudi guri báy, «Atén hám bar an baraakaá Yuda wa da'ayumiitaán, xáy aqo qiitlána tawa slaqwarár awaan Keila, amór slaqwaruusér múk Filisti?»

⁴ Daudi AAKOÓ MUNGÚ guri male firín, Aakoó Mungú Daudi guri mu/aywaáts, iri oó', «Tláw ay Keila, múk Filisti ngu dabaawok i qaás.»

⁵ Daudi nee mukós tari tláy ay Keila, baraá slaqwarár nee múk Filisti. Múk Filisti oo yaariír kuri hhaamiís, hikwaaín kingiri hayóh. Daudi múk Keila guri tuú/.

⁶ Abiatari garmoó Ahimeleki, qoomár iwa goów Keila amór Daudi, naifeérár kaahamuusér Mungú gana dákwár huúw.

⁷ Saulo kuri ádbáy, adór Daudi nira Keilárií hardáh. Saulo iri oó', «Mungú ngwa dabaaeéní qaás, asma ina dáh baraá gixsár afeerós tseegamór koom.»

⁸ Naagáy Saulo muu sleémeero guna ateét iwa tlay baraá Keila as Daudi nee mukose kiwa baraadií /amatseegi.

⁹ Daudi ga xuu' adór Saulo ngur kángw tlaákwí slai, Abiatari guri báy, «Xáda xáy inqwarusuú kaahamuusér Mungú haniisang, kuduú naifeéra.»

¹⁰ Daudi iri oó', «Aá AAKOÓ MUNGÚ, Munguú múk Israeli, anínguú lawaalmoowók aga axaás ar loe Saulo adór ir baraakaá Keilár káy, as gixsa ngiwa hhitin as aníng.

¹¹ Xáy, múk Keila aníng i qaási baraá dabaá Saulo? Xáy, Saulo nin hardíhi adoodá' anuú sagadiyusmoowók ngira axaás? Aá AAKOÓ MUNGÚ, Munguú múk Israeli, na'amaamís, án kuúng u firiím kángw sagadiyusmoowók mu/aywatseek.» AAKOÓ MUNGÚ iri oó', «Saulo ni hardah.»

¹² Daudi iri oó', «Xáy, múk Keila aníng nee muk'eene in qaasiía baraá dabaá Saulo?» AAKOÓ MUNGÚ iri oó', «Tu qaas baraá dabaá Saulo.»

¹³ Naagáy Daudi nee mukós oo afiqoomoó tsiire lahhoó' Keila kari geexáy, tari tawoó quútl amór ta slay sagér'ine, aluuwo Saulo kuri báy, «Daudi aa goów baraá Keilaro.» Saulo iri daba tsatiít, kangós kudá' guri máy.

Daudi iwa baraá yaamaá tlom'i

¹⁴ Daudi ina baraá xaanxáy meét, baraá koo/ír gawit, iri baraá yaamaá tlom'ií wa hoót, baraá xaanxayduú Sifu. Saulo i Daudi leelehhahhiit daqisleém, ala Mungú Daudi gwaa haniisiiká baraá dabaá Saulo.

¹⁵ Daudi ina da'ayuút, asma Saulo inós nguwa gaasár wa slai, Daudi i baraá xaanxayduú Sifu, amór Horeshi.

¹⁶ Yonatan garmoó Saulo ina tláy ay Horeshi amór Daudi, guri /uurií qaás, adór kur de'én nee Mungú.

¹⁷ Yonatan Daudi guri báy, «Ma da'ayumiitaar, baabuúeé' kuúng gár u /iisi i káhh. Kuúng múk Israeli u sawaawuti'iín, nee aníng tari waawutmoó tsár aluuwoge. Tam Saulo baabuúeé' adoorí ga xuu'.»

¹⁸ Nee kukaaká' tsaraawo nari al'axweesiyé' geeraá AAKOÓ MUNGÚ wa ale. Daudi iri hoót Horeshír wa ale, nee Yonatan iri waátl amór do'ós.

¹⁹ Múk Sifu iri Gibeár káy amór Saulo, tari oó', «Daudi aa nahhaát baraá koo/idá' gawit ar ayaarén baraá Horeshi, amór tloomadá' ta bay Hakila, tidár bihhidaá basa awa Yeshimoni.

²⁰ Aá waawutámo, hamí kuúng /eetáng, adoodá' ta sla' baraá muunaáwoge tleehheek. Atén Daudi ngun dabaawógí i qaasaán.»

²¹ Saulo iri oó', «Kuungaásingá' aníng iga gurtleere' AAKOÓ MUNGÚ nu tsuuqi.

²² Tlawsé' looeemaá diisíng aa i nahhaát slawaare', nee heé ngwaa ar disinge, asma kinga oó' adór inós tar heé ádtlákw.

²³ Umuú dír iqo nahhmamiti tsawtsawusaak, kawa xua', kangwsíng ngu ooár eerá' dir'eé', ma dakuusara'. Án nee kuungá' ti koomaán, slám bir baraá ayaawí kaahh, aníng u leelehhahhiít baraá tla/ángw múk kumér yaariir ar Yudawo.»

²⁴ Inooín tana tláy tawa Sifúr kay, tana geeraá Saulo wa hi'iít, ala Daudi nee mukós ta baraá xaanxoó Maoni, baraá xatstá Araba bihhaá basa awa Yeshimoni.

²⁵ Naagáy Saulo nee mukós Daudi kuri leelehhtuú áy, ala muu Daudi guri adoorí báy. Daudi iri tláy iri nahhaát baraá mar'ír tlaa/a tidár baraá xatsaá Maoni, iri amoodá' wa hoót. Saulo kaangwí nguwa axaás, Daudi guna eehár baraá xaanxayduú xatsaá Maoni.

²⁶ Saulo nee mukós ta bihhaá bartí awa tlooma, nee Daudi nee mukós ta bihhaá bartaqá' awa tlooma. Daudi ina gaanslár tláy, asma Saulo ngwaa da'ayuút, Saulo nee mukós Daudi kuna haratseewúy nee mukose as kiwa uhin.

²⁷ Ala heé wák nina hardáh amór Saulo, Saulo guri báy, «Qwaláng ar gaanslaay, múk Filisti yaamu gaa i haratláy.»

²⁸ Saulo Daudi guri máy slaktuwo, iri tláy amór slaqwarár nee múk Filisti. An gár didá' kasa báy, «Tlaa/ár Guwaay.»

²⁹ Daudi didá' gari geexáy, iri nahhaatár áy amór koo/ír gawit ar gixsár Engedi, iri amoodá' wa hoót.