1 SAMUELI 22 - Biblía Axweesantá Hhohho' ar Mungú 2004

Tsu/utár kaahamuusér Mungú

¹ Daudi iri tláy ar gaanslaay ay amór mar'idár Adulamu. Hhaeewós nee múk tlahhoó baabuúwós kaangwí kuwa axaás tari amoodí aweér, ay didá' inós i dirii'i.

² Umuúqo heé baraá slahh'amií dirií', nee umuúqo heé iinár kooma, nee mukdá' sleémeero baraá muner'ine slahhahhaá' tana burumburiít dirós i ale, inós tari geeraharusmooín. Mukdá' aa burumburiit dirós tsiire tsiyáhh ga áy.

³ Daudi iri didá' wa tláy ay gixsár Mispa ar yaamaá Moabu. Waawutmoó Moabu guri báy, «Na'ás, baabuúeé' nee aayír'eene ya/aameek niwa amoorí hotaá aya' ay dír adoodá' Mungú ni aníngí tleehhi ngi ar.»

⁴ Daudi xwayliiteérós gari geexáy dír waawutmoó Moabu, tari dirós wa hoót afi qoomaadá' sleémeero Daudi iwa baraá koo/ír gawít wa hooti.

⁵ Aarusmo Gadi Daudi guri báy, «Ma baraá koo/irí gawít wa hootaar, tláw ay baraá yaamaá Yuda.» Daudi iri didá' wa tláy, iri dáh baraá darmuú Hereti.

⁶ Saulo lama gari sláy ar adór Daudi nee mukdá' ti alkoomá' kira ár nee muu. Looarka wake Saulo i Gibeár i dirii' dír kitángw ilahhooa ki hanmamisi oo gawaá dindirmo. Aa iwiít dír gamuú ta/eewi. I lawaalár kón dakose, nee sagadiyuuseerós sleémeero ta sihhimiit, inós kwaa harweér.

⁷ Saulo sagadiyuuseerós tidá' gwaa harwet gari báy, «Iia qaasaak hamí, kuungaásingá' awa múk Benyamini, kuungá' ka xua' garmoó Yese umuúqo heewo dirhunge gu qaymoórií haniísi, laqaá nu geeraharuusér múk kumér wa qaási, laqaá qamaá sabiíbu, laqaá tawa geeraharuusér múk tsiiru?

⁸ Asma milá kuungá' sleémeero aníng misa geewaaqaté', tam heé wák oo ngi oó' mis kaahh adór garmaaeé' nee garmoó Yese tara al'axweés. Ahaá heé aníng wá gurhamuút mis kaahh, adór garmaaeé' aníng ira safoól dír sagadiyusmooeé' iwa giiri laarí?»

⁹ Aluuwo Doegi, heé Edomu, oo sihhimiít bihhaá sagadiyuusér Saulo wa ale, iri oó', «Garmoó Yese una ár iwa Nobúr káy amór Ahimeleki, garmoó Ahitubu, kaahamusmoó Mungú.

¹⁰ Ahimeleki Daudi guri aleefirín dír geeraá AAKOÓ MUNGÚ, guri muruú /aymárí sláy, nee paángadár Goliati, heé Filisti gari haniís.»

¹¹ Waawutmo muu guri ya/aáw, kaahamusmoó Mungú Ahimeleki, garmoó Ahitubu nguwa ateeti, nee múk guruú doó baabuúwose, kudaá kaahamuusér Mungú kudá' baraá Nobúr hootá', inooín sleémeero tari daqáy amór waawutmo.

¹² Saulo iri oó', «Garmoó Ahitubu iia qaaseek hamí.» Inós iri oó', «A axamiís aakooeé'.»

¹³ Saulo guri yaahaás, guri báy, «Kuúng nee garmoó Yese aníng misa geewaaqaté'? Una mikaáteérí hanís, nee paánga, kuri alefirín dír Munguhe. Daxta aníng hamí iga aáhh, in gigidín.»

¹⁴ Ahimeleki waawutmo guri báy, «Baraá sagadiyuuseeroge heé adór Daudi a heemá oo inkihhimuú koóm, oo dasír waawutmoó koóm, kudá' sufuuwók gu xuú', kudá' ilaiwa/amér koóm dír do'oge.

¹⁵ Ahaá laarí an wa'aá geeraawo án Mungú nguwa firiím as inós? Aasla'áy waawutámo kangwsíng mungu anír ditsaar, anuú sagadiyusmoowók tam múk guruú doó baabuúrén sleémeero, asma anuú sagadiyusmoowók kangwsíng sleémeero gár ni xuu' tam ar niiná i káhh.»

¹⁶ Waawutmo iri oó', «Gám kuúng Ahimeleki nee múk doó baabuúwoge adór tawa pa/a' qatlooro iqo káhh.»

¹⁷ Waawutmo xuumuuseedá' aa bihhaawós i sihhit gari báy, «Kaahamuuseesír AAKOÓ MUNGÚ harawarqawaak, tsu/aak, asma inooín axweesanti'ín a wak nee Daudi, slám adór Daudi ira goów, inooín ngi xuiyá', ngiri duqné'.» Ala sagadiyuusér waawutmo tana sií', kaahamuusér AAKOÓ MUNGÚ kawa tsu/i.

¹⁸ Waawutmo Doegi heé Edomu guri báy, «Kaahamuuseesír Mungú harawarqaweek, tsu/eek.» Doegi heé Edomu, kaahamuuseedá' gana i warqáy tsu/taro. Baalaadae kaahamuuseedár naifeéra ngaa dahas ar taa tleéhh ar kitaáni a mibeeri dakaát nee kooán, sleémeero giri tsuú/.

¹⁹ Gixsadár Nobu ar kaahamuusér Mungú, gana i warqáy, muu guna i warqáy tsu/taro ar paánga hhawaate nee /ameenaaro, nee na/ii nee kudaá qaweero nee hikwaawo, nee daqwayeero, nee bee/aango, sleémeero gina tsuú/.

²⁰ Nee baraá tla/ángw daaqoó Ahimelekiwo, garmoó Ahitubu heé wák kilós ina meét, umuuwós ku bay Abiatari, ina /akuút amór Daudi.

²¹ Abiatari kaangwí guri alki/iít dír Daudi, adór Saulo kaahamuusér AAKOÓ MUNGÚ ngira tsuú/.

²² Daudi Abiatari guri báy, «Bál án Doegi heé Edomu nguwa ár, ana tsaáhh adór kaangw ngur ooi dír Saulo, gawaá adoorihe múk doó baabuúwók heé kusa tsuú/ a aníng.

²³ Kuúng dir'eé' wa hootang, ma da'ayumiitaar, asma heé slafingw'eé' leelehiít an kudá' slafiingók leelehhiít, kuúng dir'eé' nawa hooteek ar amohhooa.»