1 SAMUELI 21 - Biblía Axweesantá Hhohho' ar Mungú 2004

Daudi Saulo nguwa ilagoów

¹ Daudi iri hardáh dír Ahimeleki kahaamusmoó Mungú oo baraá yaamaá Nobu. Ahimeleki Daudi guri al'áy ar daaraxaay guri yaahaás, guri báy, «Kuúng misinda kilók hardát?»

² Daudi Ahimeleki kaahamusmoó Mungú, guri báy «Gár nis diirí a waawutmo ina ádbáy, ina báy, ‹Kángw aníng kuúng uwa ya/aáw ló' heé hatlá' munguwa xuú'. Nee masoombar'eé' aga al'axweesaán tiwa doogaan dirkaárí ale.›

³ Xáy gár ta koon i deéro dakoge? Na'ás án qawáng mikaátér kooane, laqaá umuúqo gár ta koonda.»

⁴ Kaahamusmoó Mungú iri oó', «Aasla'áy gán, mikaáteedár /iisí ar /ayma, a koomaaká diirihe, mikaátér ni koom a tidá' taa hhoohhooeés. Ala mikaáteerí hhohho' i ya/aán kawa /aga' barnaxes deeloorí tseewe masoombasíng aa fuquská.»

⁵ Daudi iri oó', «Ar ló' hariimaro bar tláw baraá muruú slahhaá' tlehhmuuwo, aqo tin paraatlaán nee /ameena! Adoorí an adór slaqwaá masoombar'eé' kir hhohhoeemisi bar baraá gadiyeduurén kudaá /iisí diriaán. Xáy i ak hariíndaáke bar baraá gadiyeérí slahhaá' í diriiaán?»

⁶ Kaahamusmoó Mungú, Ahimeleki mikaáteedá' hhohho' gari haniís, asma mikaátér hatlá' i káhh, aqo har tidá' taa leéhh dír geeraá AAKOÓ MUNGÚ, kari warqeés ar mikaátedá' tinda sangw hhaákw baraá asltá wa ale.

⁷ Baalaarihe heeko wák oo sagadiyusmoó Saulo i deer, kudá' taa qaroó ilaá/ dír geeraá AAKOÓ MUNGÚ. Sagadiyusmoowí umuuwós a Doegi, oo xoorór Edomu, heé úr oo de'eemuusér Saulo ga sagesihhmiít.

⁸ Daudi Ahimeleki guri báy, «Xáy, paánga laqaá lawaala a koónda diirihe? Aníng niwa tláw paángar'eé' ngaa huwiiká tam xooslmoó hatlá' oo slaqwara, asma kangwduú waawutmo oo slahhaá' i gaanslár sla'amuut.»

⁹ Ahimeleki guri báy, «Paángár ni koom a tidár heedaáduú Filisti ta bay Goliati, kudá' taa gás baraá xatstá Ela, hanoos diisír alu, kaa tseék baraá naifeéra. Tisíng bar slá', ar tlaweek, asma paángár hatlá' i káhh diirihe.» Daudi iri oó', «Paángár adór tisíng in qo káhh, áx kuúng haniisang.»

¹⁰ Baalaadae Daudi ina goów as Saulo. Iri tláy amór waawutmoó ta bay Akishi, kuduú yaamaá Gati.

¹¹ Sagadiyuusér waawutmoó Akishi, waawutmo guri beér, «Heewí a Daudiwookáhe, waawutmoó Israeli? Xáy, a kudá' tar durbaabinkáhe baraá ni/imaro, tawa kaahi, ‹Saulo kumeerós gaa tsuú/, nee Daudi kumeerós ar mibaangw gaa tsuú/.› »

¹² Daudi axweesanaywí guri baraá muunaáwós i qaás. Waawutmo Akishi, kuduú yaamaá Gati, guri da'ayuumiít.

¹³ Daudi tina slarhhamuú ilaqaás dír geeraaine, in harweerirín, afér maraydaá gixsa gin gweehhín, hinqareeri gawaá daamoó ngay tsataatiyé'.

¹⁴ Waawutmo Akishi sagadiyuuseerós gari báy, «Kuungá' a xuá'a adór heewí tar slarhhamá, asma milá gár ngusa amor'eé' hubé'.

¹⁵ Xáy, gár án slarhhamaaye ngiwa slaa' i deéro? Asma milá slarhhamaáwí musungwa amor'eé' hubé'? Xáy, heé adór kwí in tsuwa dáhi baraá dooeé' oo kilá'?»