1 SAMUELI 20 - Biblía Axweesantá Hhohho' ar Mungú 2004

Yonatan i Daudi alee/iimiis

¹ Daudi nina goów Nayotír wa ale ay baraá yaamaá Rama, iri tlaatláy ay amór Yonatan, guri báy, «Gár naa dakuús a milá? Tlakweemaeé' a milá? Gár tlaakw ar naa tleéhh dír baabuúwoge a milá, tam slafingw'eé' nguwa qwaareesár wa slai?»

² Yonatan guri báy, «Gár adoosíng i pa/ diroge. A baloó gwa'aká. Ga/aaweek baabuúeé' gár i tleehhi i káhh, tam ka úr laqaá tam ka niiná, ar dir'eene i duqun, ala adór baabuúeé' tisíng ngir lu/i dir'eene a adoomá. Kangwsíng a loeeká.»

³ Daudi iri oó', «Baabuúwók ga xuu', adór kuúng aníng ir slá', iri baraá muunaáwósí oó', ‹Kaangwí Yonatan munguwa xuú', miwa gurhamuút.› Looeemaawo adoodá' AAKOÓ MUNGÚ ir daadeér, nee adoodá' kuúng tar slaf, gwa'ara naa tseewuúr dir'eene.»

⁴ Yonatan Daudi guri báy, «Umuúqo gár ta sla'a ooang án ngi kuúngií tleéhh.»

⁵ Daudi Yonatan guri báy, «Matlo slahhaangw birinda ti'iít a deelór ur dír waawutmoowo, slamí i xu'utít aníng niwa iwiit dír meésár waawutmo tawa al/ayimaan. Ala áx lakiít anaá ala tláw, anaá ala nahhaát baraá qaymo ay bál tám tsiindo.

⁶ Baabuúwók bar aníng iga ariiká dír meésarós tidár muruú /aymarose, kangw'eé' burungwa yaahaás, ku beér, ‹Daudi aníng iga harhheehhe'eés ya/aám ngiwa slay, as iwa amór gixsarós kay tidár Betilehemu, tawa dinku'uusi nee múk dooín, ilahhooar'ín ar muruú ta tsu/i tidár umuúqo kuru kawa haniisi.›

⁷ Bar aa oó', ‹I qoón.› Naagáy ka xú' adór anuú sagadiyusmoowók muruueé' ir qón. Barnaxes aa buúhh, daqaní gár daanduueene aa tsabín ka tlaakw.

⁸ Gawaá adoorihe, sagadiyusmoowók hhooeemií tleehheek, asma kuúng anuú sagadiyusmoowók iga baraá alqadór AAKOÓ MUNGÚ i dahás. Ala bar aníng a tlakweemaá koóm, kuúnguú kilá' án na gaasáng, asma gár is ala hup dír geeraá baabuúwók a milá?»

⁹ Yonatan iri oó', «Inslawaysíng kuúng u wa pa/i! Ar ló', bar geera a xuú', adór baabuúeé' ira tsabín kuúng uwa gár tlaákwí tleehhi, ala ngiqo oóaáke diroge.»

¹⁰ Daudi Yonatan guri báy, «Heé aníng i kángw báw a heemá, bar baabuúwók kuúng una mu/aywaáts ar xarslamaaye?»

¹¹ Yonatan, Daudi guri báy «Qwaláng, tsee/a ay baraá qaymo.» Tsaraawo tari tláy baraá qaymo.

¹² Yonatan Daudi guri báy, «AAKOÓ MUNGÚ, Munguú múk Israeli, masók a lamabu'usmoorén, matlo qoomár adór tihe, laqaá balooqa, qaytsiít án baabuúeé' u yaahaás. Axweesantós barka hho' daanduuwoge aníng ngi qo oó'.

¹³ AAKOÓ MUNGÚ aníng i gaasi, bar qo Saulo aa tsabín kuúng uwa gaasi, aníng kuúng uri gurbuiiká, as tawa gop amór saaw, kahhó' slafiingók kuwa ba/amis. AAKOÓ MUNGÚ nee kuúng ta dinkwa adoodá' tar dinkwa nee baabuúeé'.

¹⁴ Aníng barqo slafafiím, áx sla'aaridár hhooeemaá AAKOÓ MUNGÚ laqaamang, as kahhó' mawa gwaá',

¹⁵ múk dooeé' mu mawaar kuwa hhooeemií tlehh ay kureerisleém. Nee tam bar AAKOÓ MUNGÚ wakuuseerók gaa hhaamiís sleémeero baraakaá yaamuwo,

¹⁶ umuú Yonatan masók ku baloó si'iiká baraá doó Daudiwo. Nee AAKOÓ MUNGÚ li/oó wakuusér Daudi ngu bui.»

¹⁷ Wa'aá hatlae Yonatan Daudi guri báy, «Lo'o /ayeek kuúng bar aníng iqo ló'wa slá'.» Asma inós guna slaá' adór hhiintluwósuú kilá'.

¹⁸ Yonatan Daudi guri báy, «As matlo tawa baalár ur ar slahhángw /abén niwa ti'iiti, muu gari ar tawa kahh, asma kitaangók heé gwaa i iwiit iwa kahhi.

¹⁹ Slám ay balooqa kuúng bar káhh, daqaní kuúng ta nahhaata hhe'és didár aáng ti nahhát qoomár kangwsíng kuwa /abén, kuúng ta nahhát alaá ufuduú tlaa/eedá'.

²⁰ Aníng maheraá tám ngi tsaxaár dír bihhadií ale, adór heé garkaá tlaquút.

²¹ Aníng sagadiyusmooeé' ngu ya/aáw, maheeriiká' ngiwa didií leeleehhár ay. Barnaxes ugwa báw, ‹Qaytsiít maheeri hanoos bihhiiwók taataahheek.› Ooarí gár i laqaqaan a kuúng tu amohhoó', daqaní kuúng ni ti'ít baraá nahhaataro, asma AAKOÓ MUNGÚ iwa daadeér, adoorí gár i laqaqaan, a tsaxwaá kuúng u slawá' in kahhiyá'.

²² Ala bar garmaadá' aníng ugwa báw, ‹Qaytsiít maheeri hanoos amór geeraawók.› Daqaní ta tleér didae, ta góp amór saaw. Asma AAKOÓ MUNGÚ ugwa tleés amór saaw.

²³ Ala gawaá daanduú adoodá' án nee kuúng tara al'axweesani, AAKOÓ MUNGÚ a lamabu'usmo tla/angwrene ay kureerisleém.»

²⁴ Naagáy Daudi iri nahhaát baraá qaymo, nee qoomár slahhaangw niwa ti'iít, waawutmo Saulo iri iwiít dír meésaarós iwa /ayin.

²⁵ Waawutmo ina iwiít gawaá kitaangós, adoódá' i /imaamisi, kitaangós ku dír koo/ír dó' i tseéw, Yonatan ina iwiít amór geeraá waawutmo, nee Abneri ina iwiít bihhaá waawutmo, ala heé gawaá kitángw Daudi i kaahh.

²⁶ Baalaadae, Saulo gár aa oó' i káhh, ina baraawósí oó', «Doóqa gár gwaa ila/ i deer, dooqa laarí i harinká /aymarí ngiwa ay, ala looeemaawo kuqo tsuwa hhoohhoeeká.»

²⁷ Bál tsár alaá dinku'uumaadár muruú /aymár slahhaangw niwa ti'iít, naxés tam heé gawaá kitángw Daudi i male kaahh. Saulo garmaawós Yonatan guri yaahaás, «Ahaá Daudi, garmoó Yese mis naa hardihiiká dír muruú /aymaro, /isá nee laarihe?»

²⁸ Yonatan guri báy, «Aníng ina harhheehhe'eés kángw kilá' wa ale nguwa geemaw iwa Betilehemúr kay.

²⁹ Aníng ina báy, ‹Xaa aníng a tláw, asma múk doorén ilahhooár muruú ta tsu/i ka haniisár áy baraá gixsár Betilehemu, nee hhiyaaeé' aníng iga harakeés niwa amor'íní haragwaa'. Adoorí bir qoón, gím kuúng geemawáng aníng niwa amór hhaee'eé' kaw. Bar aga ya/aán, aníng a tlaw hhaee'eé' i artá áw.› An gár is kahhi dír muruú /aymarír waawutmoowo.»

³⁰ Saulo kaangwí nguwa axaás ina daa/atúy buhhtaawo amór Yonatan, guri báy, «Garmoó /ameenír barawasl nee iawasl, án kuúng un xúaáke adór garmoó Yese kura tsawát, as mure waslaywók nee aayoorók kawa murekes?

³¹ Bar garmoó Yese iqo slafafín barakaá yaamuwo kuúng pa/ángw waawuti'iima u sleeraaká baraá yaamuukae, hamír kilá' tláw amor'eé' tí huwang, gár kus hhoó' aqo tsuwa gaasa.»

³² Yonatan baabuúwós guri báy, «Asma waáy mukuhar gaas? Gár aa tlakweés a milá?»

³³ Ala Saulo, Yonatan guri duquús ar lawaala, as nguwa gaasi. Yonatan gari tsaáhh adór baabuúwós ir tsuwa Daudi gaasár wa slai.

³⁴ Hamtidár kilá' Yonatan dír meésa gana gaanslár geexáy, asma aa buúhh, bál tsare muruú /ayma gwaa kwatitiiká /aymaro. Yonatan ina kángw kilá' wa gurhamuút as daanduú Daudi, asma baabuúwós inós gwaa mureekeés.

³⁵ Looaytleér matlaatleero, Yonatan ina tláy baraá qaymo as nee Daudi tiwa doogiya' adoodá' tara al'axweés, tina koné' nee garmoó niiná.

³⁶ Iwa baraá qaymoórí hardáh garmaadá' guna báy, «Áx ta'aaím mahaangwí án ni tsaxaar leeleehhang.» Qoomár garmoó aáng iwa ta'aaín Yonatan mahaangw guna tsaxaár amór geeraá garma.

³⁷ Garmaadá' iwa hardáh didá' mahaangw i huú', Yonatan garma guri ateét, guri báy, «Mahaangw hanoos dír geeraawók.

³⁸ Gaansluút i diisír kilá' ma hhawahhawaar.» Garmaadá' maheeriwós gina burumbuúr iri kií/ amór aakoowós.

³⁹ Ala garmaadá' gár i xui i káhh gawaá tlehhmuú adór kwihe. Heé kaangwí gu xuú' aqo har Yonatan nee Daudi kilooín.

⁴⁰ Yonatan garmaawós kudá' guna xooslarós i haniís, guri báy, «Tláw kií/ baraá gixsa.»

⁴¹ Qoomár garmaadá' iwa tláy, Daudi niri ti'iít baraá alaá tlaa/eedá' i nahhaati, iri gitsee/ár huú' yaamií ale, iri xupuú' sagaáwa tám, tiri ma'amiisiyé', tari /aa/amín, qoomár Daudi iri ak harwaaraáhh.

⁴² Aluuwo Yonatan Daudi guri báy, «Tláw ar wayda. Aníng nee kuúng al'axweesani aga qaroó qaasaán ar umuú AAKOÓ MUNGÚ, kari lo'ór wa /ayaán, AAKOÓ MUNGÚ a lamabu'usmo tla/angwrene ay kureerisleém, nee tam baraá xwaylár nangw'eé' nee xwaylár naangoge sleeme, ay kureeraá kureér,» Daudi iri sihhiít iri tláy, Yonatan iri kií/ baraá gixsa.