1 SAMUELI 2 - Biblía Axweesantá Hhohho' ar Mungú 2004

Firór Hana

¹ Hana iri firiín, iri ó', «Muunaáeé' i qwalalaa/ dír AAKOÓ MUNGUHE, AAKOÓ MUNGÚ un xirfayeemiís kuduú /uuruueé', aníng wakuuser'eé' ngari waaqaseém. Asma ba/amar'eé' ngiwa saqwalalaa/.

² «Munguú hatlá' oo hhoohhoó' adór AAKOÓ MUNGÚ wa alé i kaahh. Asma oo hatlá' oo adór kuúng i kaakaahh, tam tlaa/ár adór Munguúrén i káhh.

³ Axweesanoó daara/aango ma kumiitaara', axweesanoó taqnaa/i mawaak. Asma AAKOÓ MUNGÚ a Munguú mura' gu xuú', asma inós tlehhma'aá muu gin aldakuut.

⁴ Ga/aldaá mukduú miguuse naa qeqtiné', ala mukdá' taa gee/aásl /uuru gwaa sláy.

⁵ Mukdá' aáng muruú /aymár koóm aa lawaali'iít, as gár /ayma kawa slay, ala kudá' aáng qwariít hamí i aax, /ameenidár kampeeri na/aá faanqw gaa xwayluúr, ala inósadá' na/aá yaariir gi koom ina mét ar pakáy.

⁶ AAKOÓ MUNGÚ i tsu/uut, inós i slafíngw tlehhiit, gin /aytiis baraá gi'i, slám ngi male gáwtí huuw.

⁷ AAKOÓ MUNGÚ hee gun narkwií kwaahh, inós barakarka gari daqaari'itís, inós heeko gu niinawees kooko guri urees.

⁸ Heé narkutmo gun slankwa'aas baraá teerír wa alé, oo gár slaá' gun tsa/aas baraá ufuú xwaansláy wa alé, as ngiwa iwiitisi dinkwa nee múk urén, as tawa aaliitér kiteeridaá ilaiwa/ame. Asma AAKOÓ MUNGÚ yaamu gin gáwtí kón.

⁹ «Inós mukós oo hhohhó' gun de'én, ala tlakuuse gan kwaahh baraá giwti, asma heé /uuruuwo baaliím i kaahh.

¹⁰ Awa AAKOÓ MUNGÚ tlampa'aamisa' ki suwaatsaat, inós gin slaahh adór dooraá kwarara/a hee ngur slahhiyá'. AAKOÓ MUNGÚ yaamu sleémeero gi sakwasleemuut. Inós waawutmoowós gu /uurií haniis, nee waawutmoowós kudá' taa iimbalaáx ar di/i gu iia tleerees.»

¹¹ Aluuwo Elkana iri waátl amór do'ós baraá yaamaá Rama. Na/aydá' AAKOÓ MUNGÚ guri sagadiyuús dír geeraá Eli wa ale, kaahamusmoó Mungú.

Daaqoó Eli

¹² Daaqoó Eli a múk iia waslén, AAKOÓ MUNGÚ ngu gaárií xuiaaká,

¹³ tam daanduú hariimaduudaá muu i hanmiisi dír kaahamusmoó Mungú sleeme. Qoomaadae umuúqo heé ilaahhooár muruú ta tsu/i ngaa huuw, sagadiyusmoó doó kaahamusmo nin hardah ar kiki'ír afér tám koom, gay /aytiis baraá hutloó fu'unaay oo dahhmiím.

¹⁴ Sagadiyusmoodá' kiki'i gan /aytiis ar /uuru baraá hutlaay. Fu'unaydá' sleémeero awa ta gáwtií tleés ar kiki'i, kaahamusmoó Mungú ginar tláy. Adoorí an adór ta tlehhahhiti, dír múk Israeli sleémeero baraá Shiloro.

¹⁵ Slám dír di/i kara kwasasahhaasiiká sagadiyusmoó doó kaahamusmo nin hardah heedaádá' ilahhooár muruú ta tsu/i ga hanmiís guri bay, «Fu'unaá ta garaangari haniiseek dír kaahamusmoó Mungú, asma fu'unaá taa humín gi slaiiká, ala a fu'unaá /eetlá' gin slaa'.»

¹⁶ Heedaádá' burngwa báy, «Lakiída di/ití a ala kwasasahhaasaán, daqaní fu'unaywók kir tleér har afiqoomaadá' ta sla'.» Inós in ooi, «Aasla'áy, an hamír kilá' haniisang, hám birngi haniská, in taataáhh ar /uuru.»

¹⁷ Tlakweemaá daaqoó doó Eli niri harwaraahhiyé' geeraá AAKOÓ MUNGUHE, gawaá adoorihe Mungú iri ló'wa buúhh, asma mukwí ilahhooár AAKOÓ MUNGÚ gana waaqaá'.

Samueli baraá Shilo

¹⁸ Masoomo Samueli AAKOÓ MUNGÚ guna sagadiyuús. Inós tsitoó ta babay naifeéra oo taa tleéhh ar kitaáni gun dahmaamiis.

¹⁹ Umuú kurko aayoorós gun hiyoó niiná i tlehhaahhít, nee ngun haahúp qoomár bar nee hhawaatuuwós ni ilahhooár huwiyá' ar muruú ta tsu/i, tidár umuú kuru.

²⁰ Eli, Elkana nee hareerose giri tsuúq, iri oó', «AAKOÓ MUNGÚ /ameenirí ngi na/aá hatlá' i haniisi, kitángw na/aywí taa hanisi'i dír AAKOÓ MUNGÚ i ale.» Inooín tari waátl amór dooín.

²¹ AAKOÓ MUNGÚ Hana gari gurtláy, inós iri tsít, na/ii giri laqwál, awa daaqaay tám, nee awa dasu tsár. Na/aywí ta bay Samueli iri uráy dír geeraá AAKOÓ MUNGÚ wa ale.

Eli nee daaqaywós

²² Qoomaadae Eli a aakoó aa din, inós kangwdá' sleémeero na/iiwós naa tlehhiitiyé' dír múk Israeli guna axaás, nee adoodá' /ameenadá' gadiyumamiis dír afkú heémadár Mungú wa ale ngir haraqatuú aa'aya'.

²³ Giri báy, «Waáy, adoorí mara tlehhé'? Asma tlehhmi'iihúng awa tlakw i dír mukwí sleémeero wa axamiís.

²⁴ Aasla'áy daaqay'eé', kangwsíng ni axmiís dír múk AAKOÓ MUNGÚ wa ale daanduuhunge i tsuuiiká.

²⁵ Asma hee bar kuqá' ngwa sadakuús, Mungú gu aleekalaa/, ala hee bar AAKOÓ MUNGÚ ngwa sadakuús, heé gu alefiriím a heemá?» Ala afór baabuúín ngaa axaasi'iiká, asma AAKOÓ MUNGÚ gina wa tsabín ngiwa tsu/i.

²⁶ Samueli iri kumiít urarango, AAKOÓ MUNGÚ guri sla'atís nee muko.

Aarír daanduú doó Eli

²⁷ Looár wake heeko Mungú iri amór doó Eli káy, guri báy, «AAKOÓ MUNGÚ i kaahi, ‹Aníng tina xu'utís dír doó baabuúwók Aroni, qoomár tawa baraá Misrírí dirii'i, tawa lawaalér Farao.

²⁸ Múk do'ós una tsawaár baraá tlahh'aá Israeli sleémeero tawa kaahamuuser'eé', iwa tsa/ana' didár kitángw ilahhooa kawa hanmamisi, nee mooyágw tsuú' nguwa tleesiyá' nee hiyaydá' ta bay naifeéra nguwa dahamisiya, dír geeraaeé' wa ale. Ahaá aníng ilahhooa sleémeero ar xoorór Israeli naa hanís dir'eéní ale ar loohír da/a/aangw aga hanisikáhe dír múk doó baabuúwók?

²⁹ Ahaá waáy gur'e munda har ohiín as ilahhooar'eé' ar muruú ta tsu/i, nee ilahhooadá' án naa hara'ayiím, kuúng na/iiwók kiri ilaiwá/ ta aninge, slaqoohúng kiri tlehhé' ar wa/aameedá' hho' ar ilahhooar'eé' sleémeero tidá' tinda huúw nee muk'eé' oo Israeli.›

³⁰ Gawaá adoorihe AAKOÓ MUNGÚ, Munguú Israeli i kaahi, ‹Tam án geeraawo aga ooi do'ók nee doó baabuúwoge i geeraaeé' wa kumaamitiiyá' kureerisleém.› Ala hamí AAKOÓ MUNGÚ i kaahi, ‹Kangwsíng i amór saáw pa/i dir'eene.› Asma mukdá' aníng i ilaiwawaá/ án u ilaiwawaá/ sleeme. Ala kudá' i waqaaqa'á' aníng i gaárí xuaaká.

³¹ Ga/aaweek, deelo ni xeér, ar aníng /uuruuwók nguwa hingees nee /uuruú doó baabuúwoge, tam dír do'oge hee i baloó dinka.

³² Kuúng daqaari'iima sleémeero ar ta hanisi dír Israeli, an mak da/tá wa aán, ala baraá do'oge heé diím i kaahh kureerisleém.

³³ Heé wák do'oge bira meét tawa kaahamusmoó Mungú, ina meét as nguwa ila' tampúw, gurhaami guri gás, nee xwaylarók sleémeero kay tsuu/ ar paánga.

³⁴ Layár ta aan a tí, daaqaywók tsaraawo Hofni nee Finehasiwo ni qatliyá' baraá baalár wákí alé.

³⁵ Aníng kaahamusmoó inkihhím nguri sihhtís, oo mura' sleémeero gu tleéhh ar adór ni slaa' baraá muunaáeene, nee baraá inslaway'eene. Aníng tlahhaywós u tlahhás, inós iri gadiyuus dír geeraá waawutmooeé' kudá' taa iimbalaáx ar di/i kureerisleém.

³⁶ Umuúqo heé aa meeti dír do'oge in tláy iri tumbarara'aat dír geeraá kaahamusmooeé', guri firín peésár niinawe, nee muruú /aymaaro iwa ooi, ‹Na'ás qaasáng baraá pa/ángw wák oo gadiyér kaahamusi'iima as muruú /aymár niiná nguwa slaw.› »