1 SAMUELI 17 - Biblía Axweesantá Hhohho' ar Mungú 2004

Goliati xoorór Israeli ngiwa tlampa'aás

¹ Xoorór Filisti slaqwaruuser'ín gana buruumbút baraá yaamaá ta bay Soko, gixsár baraá Yuda, as slaqwara. Xafay'ín kuri siíhh tla/ángw yaamukari ta bay Efes-damimu, tla/ángw Soko nee Aseka.

² Saulo nee múk Israeli tari burumburiít, xafayín kuri siíhh baraá xatstá Ela. Tiri amohhe'eesiyé' tawa slaqwi nee múk Filisti.

³ Múk Filisti ina sihhiít gawaá tlom'aá barti'ín, nee múk Israeli ina sihhiít gawaá tloomár barti'ín, gár tla/angw'ín a tlapa.

⁴ Bartá xafayduú múk Filistiro, heé wák oo migusmoó slaqwara nina ti'iít, umuuwós ku bay Goliati, heé gixsár Gati. Inós a heé tleér, tlenaangós a afiqoomoó miíta tám.

⁵ Gawaá sagose gár i kon a kofiyár muqslír sirdaa/aat, gawaá da/eewawose muqsli ngaa dahaás, iiloeemaawo a kílo mibeeri kooán nee faanqw.

⁶ Inós ya'aawós gaa tuuntuúk ar muqslír sirdaa/aat, nee lawaalár muqslír sirdaa/aat nga geetiís ar gawaá sum'iiwós.

⁷ Harmahoó lawaalarós yangareemaawo a adór xa'anoó ta inqwarúr tlehhaahhiti, nee tsitsihhír lawaaladá' iiloeemawós a kílo faanqw. Gaamboórós heé hatlá' gan loohiis geeraawós wa ale.

⁸ Goliati iri sihhiít, iri tseé' amór slawtá múk Israeli, iri oó', «Ma tlehha' disinge? Xáy, nina hardatí'i tawa slaqwaan? Aníng a heé múk Filistiwokáhe, nee kuungá' a sagadiyuusér Saulowokáhe? Heé wák tsawaaraak bartahunge oo nee aníng ti ará'.

⁹ Barnaxes iga arbaá/, iri gaás, daqaní atén a sagadiyuuserhúng. Ala barnaxes aníng ugwa arbaá/ nguri gaás, daqaní kuungá' a sagadiyuuseerén, atén tiri sagadiyusá'.»

¹⁰ Heedaáduú Filisti iri kumiít axweesanoó dara/aango, «Laarír kilá' slawtá múk Israeli an slaá' heé wák amor'eé' xu'usare', oo nee aníng ti tlampa'aasá'.»

¹¹ Naagáy Saulo nee slawtós tidár slaqwara ar múk Israeli axweesanoó heedaáduú Filisti kuwa axmiís tari ló'wa da'ayuút, tari amoqwaár kángw kilá' wa ale.

Daudi iwa baraá heémár Saulo

¹² Daudi a garmoó Yese, oo hhay Efrati oo baraá Betilehemúr Yuda. Yese daaqaywós a dakaát. Qoomár Saulo tawa waawutmo, Yese a heé aa din, kureeriiwo bariisér ayaawós ga baa/.

¹³ Daaqaywós oo urén tamaawo nee Saulo tina koné' ay baraá slaqwara, umer'ín a tí, Eliabu garmoó baris, oo aluudá' a Abinadabu nee oo tám a Shama.

¹⁴ Daudi a na/oó aluutmo do'o. Daaqaydá' urén tamaawo tana tláy baraá slaqwara nee Saulowo.

¹⁵ Daudi daqtakaro in amór Saulo kaakáy, qoomarkaaro in kaakii/ Betilehemu amór dooín, as bee/ángw baabuúín nguwa de'éngw aa'ay.

¹⁶ Deelo mibeeri tsiyáhh umuúqo matlaatle nee tsiindoowo migusmooduú múk Filisti, geehho' gun aa'áy slaqwaruusér múk Israeli gan /oslaaslín.

¹⁷ Looarka wake, Yese garmaawós Daudi guna báy, «/Ayto'ór pu/áy ar kílo mibaangw nee mikaáte mibaangw huweek ar gaanslaay amór xafayduú hhaeewók.

¹⁸ Nee geeraharusmooduú slaqwaruusér múk kumuú wák di/tá /awak ti hup. Hhaeewók ngi aán adór i diri'iya', áx ki amohhoóe, kangwsíng daqaní ngu ar kí/ amor'eé'.»

¹⁹ Qoomaadae waawutmo Saulo, nee hhaeedaá Daudiwo nee slawtidá' sleémeero ar múk Israeliro ta baraá xatstadár Ela, ta slaaqw nee múk Filisti.

²⁰ Looaytleérose Daudi ina matlaatlér boo/ ti'iít, bee/aangw guna geexáy dír de'eemo. Muruú /aymaadá' taa oó' nee baabuúwós Yese guri huúw. Iwa hardáh dír xafayduú múk Israeli, gina harati'iít naxés ta slaaqw dír yaamuudaá slaqwarár wa ale ta uu'umín.

²¹ Slawtá múk Israeli nee ar múk Filisti tiri amohhe'eesiyé' tawa slaqwi, slawtá wák bartós, tiqá' bartós tina haraganaiyé'.

²² Daudi muruudaá huúw guna adaá saayín dír heedaádá' xooslár xuúm, iri adaá ta'aa'ín amór slawtá múk Israeli, hhaeewós giri taaqweés.

²³ Qoomár Daudi nee hhaeewós tawa axweesi, migusmooduú múk Filisti ta bay Goliati, kuduú Gati, nina ti'iít amór geeraá slawtá múk Israeli adoodá' /iisí aa intsaáhh. /Aymi'iidá' giri iimu/ún kaahaango, Daudi giri axaás sleeme.

²⁴ Slaqwaruusér Israeli sleémeero Goliati kuwa ár tari goów, asma kuna kángw kilá' wa da'ayuút.

²⁵ Múk Israeli tari axweés, tari káh, «Xáy ugwa aandí'i, heé aáng naa ti'iít dír geeraá múk Israeli, ar ló' gár i slai a muu nguwa slahh'eemisi ar /ooslisliingw. Heé heewí gaasaro ngwa aslay waawutmo Saulo gu daqaari'iimár yaariíriír haniis, nee slám gun dasiirósí haniis. Slám múk tlahhoó doó baabuúín guri wangexwaar, gurtleemuú koódi kuri sláy baraá tla/ángw Israeliro.»

²⁶ Daudi mukdá' dír bihhiwósií tseéw guri yaahaás, «Xáy, heé heewuú múk Filisti ngwa gaas, nee oo múk Israeli ngwa tuu/ baraá murekesoó adór kwihe, heewí gár kwi tleehhi? Heewuú Filisti inós a heemá, bar sleeme an heé ta al/utliiká, iwa qiitli slawtá múk hhohhó' oo Mungú kudá' slaáf ngiwa adoorír niqin.»

²⁷ Muu tari oó', «Gawaá daanduú heedaádá' Goliati gu asláw gaasaro ado aqo tidá' taa geerií ooaán.»

²⁸ Ala Eliabu, hhiyaadá' úr oo Daudi, ngiwa axaás Daudi iwa axweesi nee muu, iri ló'wa qa/iít as Daudi, iri oó', «Waáy gár nisa amoorí keér? Xáy bee/angwdá' niiná dír heé kwi geexeér baraá sla/ato? Aníng a xuú' iia wasleerók nee da/tá ta koon. Gár nisa baraakií /ét a slaqwara ngina qaytár eér.»

²⁹ Daudi axweesantá aáng gari tlaáxw, «Hám daxta gár naa tlakweés? Gaa sleeme a yaahasaakáhe?»

³⁰ Daudi tidá' gari male yaahaás dír heé hatlá', mu/aywatstá hatlá' naxés aqo male tidá'.

³¹ Axweesantadár Daudi muu ngiwa axaás, kangwdá' kuna ooár áy amór Saulo, Saulo Daudi guri ateét.

³² Daudi iri oó', «Hee tumu wák ló' mukuwa de'e tsaát, nee migitá migusmoó múk Filisti. Anuú sagadiyusmoowók, heeqá' nee aníng ti araán.»

³³ Saulo Daudi guri báy, «Kuúng nee heeqaáquú Filisti tawa slaqwa' a aleesleeraaká. Kuúng a garmoó niiná nee Goliati a heé slaqwara gaa qaroó intsaahh, iimír baraá masoombi'iimarose.»

³⁴ Daudi iri oó', «Anuú sagadiyusmoowók aga qaroó intsahhaám bee/ángw baabuúeé' de'eengo. Umuúqo siiwaro bar diraangw naa hardáh, laqaá makiito'ór ta bay duúbu bee/i birnga ót,

³⁵ aníng an eehár, nee ngari hara/akuút, deelmoó bee/i oo aa ót, nguri gawaá afkós wa tuú/. Laqaá tam diraangw bar aníng iga hara/akuút aníng taqesamawós in óh nguri gáwtá wa daáhh, nguri gaás.

³⁶ Anuú sagadiyusmoowók aga intsahhaám direeraá yaariir nee makaydá' ta bay duúbu tsu/utaaro. Hamí tam heeqaáquú Filisti oo taa al/utliiká, aníng aqo un adoorí laáq. Ga/aaweek inós slawtá múk Munguúdá' slaáf gan /oosliislín.»

³⁷ Daudi iri oó', «AAKOÓ MUNGÚ kudá' aníng iga ba/amis gawaá afér direerí wa ale, nee afér makaydá' ta bay duúbuuwo, inós aníng i tuu/ gawaá dabaá heequú Filistiro.» Saulo guri báy, «Tláw, AAKOÓ MUNGÚ masók a dinkwa nee kuúng.»

³⁸ Saulo Daudi guri xosluudaá slaqwaraárár tsiitiís, saga guna kofiyár muqslírií dahaás, gaambór muqsli gana da/eewií dahaás.

³⁹ Daudi paángadár Saulo gana dahaás, hi'iitano gari iiár, ala naxés hi'iitano ga aslayká, asma xooslár adór tidá' gaa intsaahhiiká. Daudi Saulo guri báy, «Xooslaarí ngiwa ar slaqwarár aw a aleeslawaaká, asma aga intsaahhiiká.» Gawaá adoorihe xosluudá' giri duúx.

⁴⁰ Daudi hhartós gari taataáhh, tlaa/aá hhohho' awa kooán giri afaá yaaér wa sleés, giri qaás baraá tlakwaywós kudá' ir de'éngwár aa'ay. Kuukumaayorós gari taataáhh, iri hi'iít amór heeduú múk Filisti ta bay Goliati.

Daudi Goliati nguwa baál

⁴¹ Heeduú Filisti ta bay Goliati iri hi'iít amór Daudi nee heedaádá' gaamboórós koóm i geeraawós wa hi'iit.

⁴² Heedaáduú Filisti iwa qaytsiít, Daudi nguwa ár guna waaqaá', asma a masoomoó niiná slám ku hhoohhoó'.

⁴³ Heewuú Filisti Daudi guri báy, «Ahaá hhartisíng ta koon ar milá? Kawa xu' aníng a seeáywo niwa amor'eé' keer ar hhara.» Heewuú Filisti, Daudi guri lu'ús ar umuú munguaá múk Filisti.

⁴⁴ Migusmooduú Filisti Daudi guri báy, «Qwaláng amoorií surukang, slaqwtók laarí a gwaresuú gawaá doorií haniís nee makaá sla/a.»

⁴⁵ Daudi heewuú Filisti guri báy, «Kuúng nin amor'eé' keér ar paánga nee lawaala nee gaamboót, ala aníng kuúng un i daqáw ar umuú AAKOÓ MUNGÚ Aleesleemusmo, Munguú slawoodaá slaqwaruusér Israeli, kudá' kuúng taa /oosliín.

⁴⁶ Laarí AAKOÓ MUNGÚ kuúng u baraá dabaaeé' qaas. Laarír kilae un yaamií daáhh, uri isa tsaát, tuaá slawtá slaqwara ar xoorór Filisti gwarsuú doori gari /aay, nee makaá sla/a, as kahhó' xoordu sleémeero ngiwa tsaahhiya' adór Munguú múk Israeli ir deér.

⁴⁷ Muu sleémeero laarí oo aa burumburiit gari tsaahh adór AAKOÓ MUNGÚ muu ngur ba/amisiiká ar lawlu nee paangadu. Asma slaqwara ar AAKOÓ MUNGÚ, inós kuungá' sleémeero nun dabaarénií qaas.»

⁴⁸ Qoomár Goliati iwa sihhiít iri hi'iít amór Daudi. Daudi ina ta'aaín ar gaanslaay ay baraá hhayuú slaqwara, as kahhó' tiwa ariya' nee migusmooduú Filisti.

⁴⁹ Daudi dawa guri dahaás baraá tlakwaywós, tlaa/anoó wák guri duúx, guri qaás baraá kuukumayi, Goliati kuri gitsee/a tsaxaár ar tlaa/anoodá', tlaa/anoodá' iri dáh baraá /atuú saga. Goliati iri yaamií huú' ar gura'.

⁵⁰ Adoorí an adoodá' Daudi Goliati ngura arbaá/ ar tlaa/ano nee kuukumayi. Daudi Goliati guna tsaxaár guri gaás, ala slám Daudi i paángár konká gawaá dakose.

⁵¹ Daudi iri ta'aaín, iri sihhiít gawaá daanduú Goliati, paángár Goliati gari tuuntsiís, guri isa tsaát iri gwaá'. Múk Filisti kawa ár adór migusmooín kura gaás, tana /akumiít, tari tlatlaáhh.

⁵² Múk Israeli nee oo Yudawo, tsimahhiro yaamu kiri gaamiís, múk Filisti kuri almaahhaát ay Gati, ay afkú gixsár Ekroni. Múk Filisti oo ta tlaaqaaqán baraá slaqwara wa ale, lohu gina tsataát, iimír Sha'arimu ay Gati nee Ekroni.

⁵³ Múk Israeli niwa kií/ baraá slaktuú múk Filistiro, xafayduú múk Filisti nguri haasaáng wa hayohiyé'.

⁵⁴ Daudi ságw Goliati guri huúw, ay baraá gixsár Yerusalemu. Ala xosluudaá slaqwara gina qaás baraá xaftós.

Daudi kuwa huúw amór Saulo

⁵⁵ Saulo Daudi nguwa ár iwa amór Goliati kay, Abneri geeraharusmooduú slaqwaruuseerós guna yaahaás, «Garmaawí oo heemá?» Abneri guri báy, «Ar adoodá' kuúng tar hotatiinda aníng u xuaaká.»

⁵⁶ Waawutmo Saulo iri oó', «Áx yaahaseek, inós a garmoó heemá?»

⁵⁷ Daudi, Goliati gaasaro nguwa hhe'eés ina kií/ baraá xafaay, Abneri Daudi guri huúw geeraá Saulo. Qoomaarihe Daudi ságw Goliati gu kón ar dabaawós.

⁵⁸ Saulo Daudi guri yaahaás, «Gárma, kuúng a garmoó heemá?» Daudi iri oó', «Aníng a garmoó sagadiyusmoowók Yese, kuduú baraá gixsár Betilehemu.»