1 SAMUELI 16 - Biblía Axweesantá Hhohho' ar Mungú 2004

Daudi kuwa dí/tár iimbalaáx as iwa waawuti'in

¹ AAKOÓ MUNGÚ Samueli guri báy, «Ay xaylá Saulo ku alee/a/amamiin, bar aníng inós ugwa qaroó sií' múk Israeli nguwa sawaawuti'in? Xarmo di/to dalaa/eek, tlaatláw, aníng kuúng u gan'aás ay doó Yese, heé yaamaá Betilehemu. Asma baraá tla/ángw daaqaywose waawutmo ugwa sláw.»

² Samueli iri oó', «Adór nir daqaw? Saulo bar kangwsíng ngwa axaás, aníng i gaas!» Naagáy AAKOÓ MUNGÚ iri oó', «Dama huweek, daqaní ta o', ‹Nina hardáh as AAKOÓ MUNGÚ nguwa ilahhooár gaasárií haniis.›

³ Yese dah'iseek baraá dinku'uumár ilahhooasíng ta gasa, daqaní aníng adór ta tlehh ngi laqaám, heé án ni dirók i laqaam ku iimbaláx ar di/i as aníng.»

⁴ Samueli adoodá' AAKOÓ MUNGÚ aa hara'ayín gari tleéhh, iri tláy amór gixsár Betilehemu. Bariisér aya guri al'eér ar daaraxaay, tari oó', «Gaa ka hhoóe?»

⁵ Samueli iri oó', «Eeít, gár tlaakw i káhh. Nina hardáh as AAKOÓ MUNGÚ nguwa ilahhooárií gaas. Gimsé' ti hhohhoeese', daqaní ilahhooár gár ta gaasaan a dinkwár wa haniisaán.» Samueli Yese guri hhohhoeés nee daaqaywose, giri dahi'ís baraá dinku'uumár ilahhooár muruú ta tsu/i.

⁶ Qoomár tawa hardáh, Samueli Eliabu nguwa ár, ina baraá muunaáwós i oó', «Án ngi slaá', heedaáduú AAKOÓ MUNGÚ ta iimbalaaxi ar di/i an kwí dír geeraawós i dirií'.»

⁷ Ala AAKOÓ MUNGÚ Samueli guri báy, «Gitsee/awós laqaá tlenaangós mi i qaytaar, asma aníng ugwa sií'. AAKOÓ MUNGÚ adór ir xumiisi a adór mukoká, asma muu gár i ga/ay a gitsee/a, ala AAKOÓ MUNGÚ gár i ga/ay a muuná.»

⁸ Yese Abinadabu guri ateét, guri dír geeraá Samuelír waarahhaás. Samueli iri oó', «AAKOÓ MUNGÚ kwí gwa tsawaariiká.»

⁹ Yese Shama guri waarahhaás ar dír geeraá Samueli, Samueli iri male oó', «Tam kwí sleeme AAKOÓ MUNGÚ gwa tsawaariiká.»

¹⁰ Yese daaqaywós faanqwamaawo guri waarahhamaamiís ar dír geeraá Samueli, Samueli Yese guri báy, «Kuká' AAKOÓ MUNGÚ gaa tsawaariiká.»

¹¹ Samueli Yese guri báy, «Daaqaywók sleémeero i diiríhe?» Inós iri oó', «Kudá' niiná dir'ine i kaahh, aa meét baraá de'éngw bee/aangw.» Naagáy Samueli Yese guri báy, «Muu ya/aweek kungu huwi, atén a yaamií iwiitanaaká ay dír garmaasíng ni amoorí hardihi.»

¹² Yese hee guri ya/aaw, garmaadá' kunguri amor'íní huúw. Garmaadá' a heé slaqwa hhoó', ku ila hhohhó', slaqwatós ka tsataari hho'. AAKOÓ MUNGÚ iri oó', «Kwí an kudaádá', gím sihhiít iimbalaxeek di/to.»

¹³ Samueli xarmooduú di/i guri taataáhh, Daudi guri iimbalaáx dír geeraá hhaeewós wa ale, hamtidár kilae /uuruú qeeruú AAKOÓ MUNGÚ Daudi guri hatsiís. Naagáy Samueli iri kií/ Rama.

Daudi iwa baraá doó Saulo

¹⁴ Naagáy Qeeruú AAKOÓ MUNGÚ Saulo guri geexáy, qeeruú tlaákw kuri ya/aamár i haniís nee AAKOÓ MUNGÚ, Saulo nguwa i dahi, guri amoqwaareemiís.

¹⁵ Sagadiyuusér Saulo, Saulo guri beér, «A xuaán hám qeeruudá' tlaákw oo Mungú naa ya/aámárí haniís dirógí ale daxta kuúng u dawiitimiis.

¹⁶ Hám daxta, kuúng aakoorén, sagadiyuuseerók ya/aaweek, hee kungu leeleehhi oo gidaandoori slahhto ga baál, qoomár qeeruudá' tlaákw tinda ya/án nee Mungú bura i hardáh, daqaní heewí daa'aangw ngun slaahh ar gidaandoori kuúng ba/aay kuri sleér.»

¹⁷ Naagáy Saulo sagadiyuuseerós gari báy, «Tlawsé', heesíng daa'ángw gidaandoori gu xuú' slahhto leeleehhare', daqaní ngu dir'eéní hubá'.»

¹⁸ Heé wák baraá tla/ángw mukduú sagadiyuuseerose iri oó', «Án garmaako wák oo doó Yese ugwa ár, oo gixsár Betilehemu. Inós daa'aangw gu xuu' slahhto ar gidaandoori. Garmaawí a pihhusmo, nee a migusmoó slaqwara, axweesanoó sagalooa an gaarós, a heé hhoohhoó', AAKOÓ MUNGÚ nee inós a dinkwa.»

¹⁹ Gawaá adoorihe, Saulo muu guri ya/aáw amór Yese, iri oó', «Garmaawók kudá' ta bay Daudi oo baraá de'éngw bee/aángwí dirií' amor'eé' haniisang.»

²⁰ Yese daqwaay guri amohhe'eés nee mikaáte, nee tlakoó kaahari oo difaáír koóm, nee gurtuú niiná, giri ya/aáw ar garmaawós kwí ta bay Daudi ay amór Saulo.

²¹ Naagáy Daudi iri daqáy amór Saulo, iri sihhiít dír geeraawós, guri sagadiyuús. Saulo guri waatlakweés kángw kilá' wá alé, guri tsawaár tawa heé xooslaarós ar slaqwara ga amohhe'eemiís.

²² Saulo iri ya/abín amór Yese iri oó', «Na'ás Daudi haniisang, i dír dooeé' wa hooti, gadiyér'eé' ngi wa tleehhi. Asma aníng ugwa waatlakweés.»

²³ Umuú qoomaaro qeeruudá' tlaákw oo Mungú aa ya/aámárí haniís Saulo nguwa i dahi, burngwa áy Daudi gidaandoorirós gan oh, gari slaahh, Saulo qeeruudá' tlaákw guri geemáy. Saulo ba/aay guri sláy.