1 SAMUELI 15 - Biblía Axweesantá Hhohho' ar Mungú 2004

Slaqwara nee múk Amaleki

¹ Samueli Saulo guri báy, «AAKOÓ MUNGÚ aníng ina amoorógí ya/aáw uwa iimbalaax ar di/i as kahhó' kuúng tawa waawutmoó múk Israeli, gimáy, daxta afór AAKOÓ MUNGÚ iiárií qaaseek.

² AAKOÓ MUNGÚ Aleesleemusmo i kaahi, ‹Múk Amaleki u slaáhh asma inooín múk Israeli iwa Misrír dahhi nguna saga'ayé' loohírií ale.

³ Tláw múk Amaleki tsu/eek, nee muruuín sleémeero oo taqo kona hhaamiiseek, tam panmo sleeme miwa meét, /ameena nee hhawaateewo tsu/eek, mindiwa meetiyé', nee sleeme tam na/ii nee qaweerowo, hikwa nee bee/aango, angamía nee daqwaayeero sleémeero qororo'ooseek.› »

⁴ Saulo muu guri ateét baraá Telaimu, guri faár, hhawaataá slaqwara awa ya'ár hi'iitá' awa Israeli a kume tsiire tsár, nee awa Yuda a kume mibaangw.

⁵ Saulo gixsár Amaleki gari haradáh, iri baraá xatstá wa giír.

⁶ Saulo múk Keni guri báy, «Gimsé', tlawé' ti paratle' dír múk Amalekiro, aníng kuungá' munduwa dinkwaárí hhaamiís nee inooín, asma kuungá' múk Israeli una hhoeemáy tlehhé' qoomár niwa ti'iitiyé' Misrír wa ale.» Naagáy múk Keni tari tláy, tiri paraatliyé' dír múk Amalekiro.

⁷ Saulo múk Amaleki guri baál iimír yaamaá Hafilár wa ale ay awa Shuri, ti'inángw da/aáw oo Misri.

⁸ Agagi waawutmoó múk Amaleki guna slafi óh, ala múk hatlá' sleémeero guna hhaamiís ar paánga.

⁹ Ala Saulo nee mukós Agagi kunguri slafi huúw, kwa gaasiiká, nee bee/ángw slaqo hhó', nee hikwaá slaqo hho' nee muruú wahhaara, nee deeloó bee/aango nee umuúqo gár slaqwahhooe, aa ya/aniká ngiwa hhaamisi. Ala muruuduú kangaa/a nee muruú slaqo tlákw, an kudá' taa hhaamiís.

Waawuti'iimár Saulo kawa sií'

¹⁰ AAKOÓ MUNGÚ Samueli guri báy,

¹¹ «Aga gwadidiím, asma Saulo nguwa waawutmoó wa qaás, asma inós aníng iga máy eeharto nee hara'ayar'eé' gaa boo/eesiiká.» Samueli iri buúhh, iri /aa/aá áy dír AAKOÓ MUNGÚ xweera sleémeero.

¹² Samueli matlaatlér boo/e iri ti'iít amór Saulo. Samueli kuri báy, «Saulo i Karmelír daahh, ga/aaweek, gár iinslaslaangw gaa sihhtís, iri waaraáhh Gilgali.»

¹³ Samueli iri daqáy amór Saulo, Saulo iri oó', «AAKOÓ MUNGÚ u tsuuqi daxta aníng hara'ayár AAKOÓ MUNGÚ aga boo/eés.»

¹⁴ Samueli iri oó', «Kár /aa/eekaá bee/aangw nee aahhoorír hikwa iaaeene ni axamiis ar milá?»

¹⁵ Saulo iri oó', «Kingina huúw amór múk Amalekír wa alé, asma muu bee/aangw nee hikwawo kingina slafi huúw as kiwa ilahhooár wa tsu/i dír AAKOÓ MUNGÚ, Munguúwók, nee awa naa meetiye' ina kángw kilá' wa hhaamisaán.»

¹⁶ Samueli Saulo guri báy, «Lakiít, aníng ngi oó' gár AAKOÓ MUNGÚ naa aníng báy xweerakae.» Inós guri báy, «Ooang.»

¹⁷ Samueli iri oó', «Tam geera kuúng tiwa ga/eer tu niinawe, xáy, taa ureésiíke tawa geeraharusmoó tlahh'aá múk Israeli. Nee AAKOÓ MUNGÚ uri iimbalaáx ar di/i tawa waawutmoó múk Israeli.

¹⁸ AAKOÓ MUNGÚ uri ya/aáw as gadiyeérós iwa oó', ‹Tláw mukduú Amaleki oo tlakuuse tsu/a/imeek ay dír kway hhaamis.›

¹⁹ Ahaá a milá ala afór AAKOÓ MUNGÚ masa ilaiwa/iká? Waáy gár taa hara/akút mas haasaáng, tlakweema kiri tléhh dír geeraá AAKOÓ MUNGUHE?»

²⁰ Saulo Samueli guri báy, «Kángw loe aníng afór AAKOÓ MUNGÚ aga ilaiwaá/, gár naa tleéhh aqo tidá' tiwa ya/aáw nee AAKOÓ MUNGÚ. Agagi waawutmoó múk Amaleki nguna huúw, múk Amaleki ugwa hhamiís kángw kilae.

²¹ Ala muu haasaáng nguna huúw, bee/aangw nee aweedá' hhoe nee muruudá' hhohhó', taa amaasli as kuwa ilahhooár wa tsu/i dír AAKOÓ MUNGÚ, Munguúwók, amoodár Gilgalír wa ale.»

²² Samueli iri oó', «Xáy, AAKOÓ MUNGÚ ilahhooár da/a nee ilahhooár muruú ta tsu/i gan ak ló'wa slái, ta ilaiwa/amér afór AAKOÓ MUNGUHE? Qaytsiít ilaiwa/ame ka hhoo' ta ilahhooár muruú taa tsu/i, nee iialoeesa i waaráhh ta di/tá gwaandaaweero.

²³ Asma dee/aana a adór tlakweemaá da/ari, nee saga gawdeema a adór tlakweemaá munguaá hatlá' kiwa haratlintati'i, hám daxta asma axweesantá AAKOÓ MUNGÚ kawa qo si'i, inós kuúng sleeme ugwa sií' tawa waawutmo.»

²⁴ Saulo Samueli guri báy, «Tlakweema iga tleéhh, asma hara'ayár AAKOÓ MUNGÚ aga sii', tam axweesantók sleeme aga ilaiwa/iiká, asma muu una da'ayuút, afor'ín ngiri ilaiwaá/.

²⁵ Ala hamí un firiím tlakweemaaeé' gurtlaweek, qwaláng a alki/aán, as kahhó' aleesleemu nguwa slaw, oo AAKOÓ MUNGÚ nguwa sluufmiis.»

²⁶ Samueli Saulo guri báy, «Án nee kuúng a baloó alki/anaaká, asma axweesantá AAKOÓ MUNGÚ aga sí', AAKOÓ MUNGÚ kuúng ugwa sií' tawa waawutmoó múk Israeli.»

²⁷ Qoomár Samueli iwa warqáy as iwa tlay, Saulo guna pasltá inqwaari óh, iri feehhít.

²⁸ Samueli guri báy, «Laarí AAKOÓ MUNGÚ waawuti'iimarók dír múk Israeliro gaa feehhamiís, gari haniís dír inslaawmoowók, kudá' hhoó' ta kuunge.

²⁹ Slám Munguúduú xirfuú Israeli, lama ga ooiiká, tam i gwadidinká asma inós a heewooká.»

³⁰ Saulo iri male oó', «Aga tlakweés, ala hamí u firiím, ilaiwa/áng geeraá bariiseedár muk'eene nee dír geeraá múk Israeliro ya/aamáng, nee kuúng niwa alki/aan, as AAKOÓ MUNGÚ, Munguúwók nguwa sluufiis.»

³¹ Naagáy Samueli nee Saulo tari alkií/ ay Gilgali. Saulo AAKOÓ MUNGÚ guri sluufmiís.

³² Aluuwo Samueli iri oó', «Agagi waawutmoó múk Amaleki diirí huwaare'.» Agagi iri amór Samueli káy ar qwala/, asma ngiwa xui slahh'amkuduú gwa'ara aa waaraáhh.

³³ Ala Samueli iri oó', «Adoodá' paángarók na/aá /ameena ngira hhaamís, adoorí an adór panmoó aayoorók ir meetiiká tla/ángw /ameenaaro.» Naagáy Samueli Agagi guri sikín geeraá AAKOÓ MUNGÚ wa alé baraá Gilgali.

³⁴ Alaá tihe Samueli iri tláy ay Rama, nee Saulo iri waatláy amór do'ós baraá Gibea.

³⁵ Samueli nee Saulo tay baloó ari'iiká ay gwa'ararós, ala Samueli Saulo guna ale/aa/amaamín. AAKOÓ MUNGÚ iri gwadidín, asma adoodá' Saulo nguwa waawutmoó múk Israeli wa qaás.