1 SAMUELI 14 - Biblía Axweesantá Hhohho' ar Mungú 2004

Pihhu'uumár Yonatan

¹ Looarka wake Yonatan garmoó Saulo, garmaadá' xooslarós koóm guri báy, «Gimáy qwaláng múk Filisti u harawarahhaán baraá koo/ir'ín tidá' gawit.» Ala Yonatan baabuúwós gwa ádbayká.

² Saulo nee mukós xafay'ín kuna tleéhh alhhe'eesoó da/aáw oo Gibea, dír yaamaá ta bay Migroni baraá guruú xa'anoó ta bay komamaánga. Mukdá' nee inós dinkwárí diriiá' a tsiire lahhoó'.

³ Ahiya garmoó Ahitubu, hhiyoó Ikabodi, garmoó Finehasi, garmoó Eli kaahamusmoó AAKOÓ MUNGÚ, oo baraá gixsár Shilo, hiyoó saaliingw guna dahaás. Slám mukwí gaa xuiiká adór Yonatan ira tláy.

⁴ Yonatan ina waaraáhh ar baraá tsirxaduudá', as slumodaá' múk Filisti ngiwa i hardihi, nee mar'ór tlaa/e i deer bihhedae, ar wák umuuwós a Bosesi ar tsár a Sene.

⁵ Tlaa/e kina sihhtís bihhaá /iya geeraá Mikmashi, nee awa hatlá' bihhaá basa, amór geeraá Geba.

⁶ Naagáy Yonatan garmaadá' xooslaarós koóm guri báy, «Gimáy qwaláng mukwí taa al/utlinká u harawarahhaán baraá koo/ir'ínií ale, dooqa AAKOÓ MUNGÚ atén ti alee/iis, asma muu bar ku yaariír laqaá bar ku niiná, AAKOÓ MUNGÚ gu baqiiká mukós ba/amisaro.»

⁷ Garmaadá' xooslár koóm iri oó', «Adoodá' sleémeero baraá muunaáwók i dirii' tleehheek, ga/aaweek, aníng nee kuúng a dinkwárí diriaán, muunaáeé' a adór kók.»

⁸ Yonatan iri oó', «Ga/aaweek, atén mukwí un harawarahhaán, nee atén tiri laqaamaán dir'íní ale.

⁹ Barnaxes taa oó', ‹Lakiité' atén ti daande'.› Daqaní tari dirén tidár kilá' i sihhitaán, i haratsa/amanaaká.

¹⁰ Ala barnaxes taa oó', ‹Gimsé'! Kuungá' atén ti haratsa/aande',› daqaní atén tari amor'íní tsa/amán, asma daqaní AAKOÓ MUNGÚ inooín ngaa dabaaréní qaás, nee tí iri laya tleehhít direne.»

¹¹ Naagáy inooínaaká' tsaraawo tari ti'iít geeraá koo/idár múk Filisti, múk Filisti tari oó', «Qaytsité' mukduú Ebrania ni ti'imiit baraá boh'eedá' ni nahhati'i.»

¹² Mukuú baraá guruú koo/idá' gawit Yonatan nee garmaadá' xooslarós kooma kiri báy, «Gimsé' qwalaas amoorén tí, daqaní atén garka ngi laqaamaán.» Yonatan garmaadá' xooslár koóm guri báy, «Gimáy án eeharáng, asma AAKOÓ MUNGÚ mukwí ngwa qaroó qaás baraá dabaá xoorór Israeli.»

¹³ Yonatan iri tla/afameérár tsa/án nee garmaadá' xooslarós koóm i aluuwós. Múk aáng iri huuhu'ún geeraá Yonatan, nee garmaadá' xooslarós koóm giri aluúwaá tsu/aa/ín.

¹⁴ Qoomár hargeeraawo tawa haratláy, Yonatan nee garmaadá' xooslarós koóm, múk afi mibeeri tsár kuna tsuú/, baraá yaamaá tlaqtá eékaaro.

¹⁵ Baraá yaamuudaá múk Filistiro, muu sleémeero iri amooqwaár, slaqwaruusér baraá xafaay nee múk baraá qamuuwo, nee xuumuusér baraá koo/ír gawit sleeme, nee kudá' naa haratlay'i, sleémeero gur'e ma'aay ngiri dala/iyé', tam yaamu sleeme nina daraxaatiyé', nee muu sleémeero iri kángw kilá' wa da'ayuút.

Múk Filisti kuwa baál

¹⁶ Xuumuusér Saulo tidár amór Gibeár Benyamini, boo/oó múk yaariír oo ti'ii'iím amooqá' nee taqane nguna ariyé'.

¹⁷ Saulo mukdá' dinkwárí dirií' nee inós guri báy, «Gimsé' hamí ti fade', axáy múk kaáhh baraá tla/angwrene i deéro?» Inooín tiwa hhe'eesiyé' faarooro, naxés Yonatan nee garmaadá' xooslarós koóm i kahhiyá'.

¹⁸ Naagáy Saulo Ahiya guri báy, «Sandakmooduú alqadór Mungú diirií huwang.» Asma sandakmooduú Mungú qoomaadae i dír múk Israelirí dirii'.

¹⁹ Qoomár Saulo iwa baraá axweesántí kahhi nee kaahamusmoó Mungú, tsimaahhi iri ak búhh baraá xafayduú múk Filistiro. Saulo kaahamusmoó Mungú guri báy, «Dakók har'ooheek.»

²⁰ Saulo nee mukós kudá' sleémeero dinkwárí diriá' tana burumburiít, slaqwara kari iimu/ún nee múk Filisti. Naxés múk Filisti tiri kilooín haraawarqayé' muxtaaro ar paangadu, tlaahhi iri ló'wa búhh.

²¹ Naagáy mukduú Ebrania dinkwaárí dirií' nee múk Filisti iimír bál geeraawo, kudá' naa waatlaye' dinkwa nee inooín, ay amór xafaydá' aya gwa harweer, tari haragwaá' dír múk Israeli kuduú dinkwa nee Saulo nee Yonatan.

²² Qoomár múk Israeli kudaá nahhaát baraá tlom'aá Efraimu, kawa axaás adór múk Filisti ira goów, inooín sleeme ngina aluú wa alfuuruuiyé' ti'iingo baraá slaqwara.

²³ Adoorí an adór baalaadae AAKOÓ MUNGÚ múk Israeli ngura tuú/. Baalaadae slaqwara ina kumít, iri waaráhh Bet-afeniro.

Kángw aa tleehharuut alaá slaqwaraaro

²⁴ Múk Israeli tana dawimiít kángw kilá' wa ale, Saulo baalaadae muu guna lo'ór /aymiís, iri oó', «Umuúqo heewo laarí muruú /ayma munguwa gwaá afkwár káy ay tsiindo, ay dír wakuuser'eé' tí ngay li/áy buu'. Heé gwaa qo áfkwár kayi i tsarere'eeti.» Gawaá adoorihe heé muruú /ayma gwa tsaaq i kaahh baraá tla/ángw muko.

²⁵ Mukdá' sleémeero tari dáh baraá gara, nee baraadae umuú diiro danú i deer.

²⁶ Nee muu iwa dáh gártí ale, gár taa ár danú in tawo taxán ala tam heé wák i kaahh oo dakós gwa qaás baraá afa, asma ta lo'oodá' da'ayumiit.

²⁷ Ala Yonatan gaa axasiiká adór baabuúwós muu ngura lo'ór /aymiís, inós hhayshaá hhartadá' dakose i kón gina looloqoós, giri tikiís baraá xaramtá danú, dakós guri qaás baraá afa nee ilaawós niri qaytsitiyé'.

²⁸ Heeko wák guri báy, «Baabuúwók muu guna lo'ór /aymiís iwa kaahi, ‹Heé muruú /ayma laarí gwaa /aay i tsarere'eeti.› » Qoomaadae muu qwari gwaa slaaqatimís.

²⁹ Yonatan iri oó', «Baabuúeé' muu gwaa slahh'amuúr faák. Qaytsité' adór ilaaeé' nira qaytsitiyé', asma danú niiná nguwa maáhh.

³⁰ Ahaá geera a tsiníheéke bar muu haasaánguudá' tinda dír wakuuser'ín wa hayóh guna /aáy? Asma hamí baraá tla/ángw múk Filistiro múk taa tsuú/ ku ureeká.»

³¹ Inooín baalaadae múk Filisti kuna tsuú/ bahh'ale iimír Mikmashír wa ale ay Ayaloni, qoomaarihe múk Israeli qwari gwaa slaaqatimís.

³² Naagáy muu haasaángudá' guri hara/akuút, bee/aangw kuna uhín nee awe, nee damaay kina tsuu/ didár yaamuudaá kilá', kiri /aáy dinkwa nee tseereero.

³³ Muu Saulo guri báy, «Qaytsiít, mukwí aa dakuús dír geeraá AAKOÓ MUNGUHE, as adoodá' fu'unaay kiwa tseerér al/aáy.» Saulo iri oó', «Kuungaá fooluuse, gimsé' tlaa/ár ur diirí gwangwara'araare'.»

³⁴ Saulo iri oó', «Gimsé' tsiyayaxaté' baraá tla/eeraá muu, ku beera', ‹Umuúqo heewo awuuwós ngu dir'eétí huwi, nee bee/irose, diirí tiwa tsu/e' nee ki /agá'.› AAKOÓ MUNGÚ mu sadakuusara' as fu'unaay kiwa tseerér al/aga'.» Ala xweeraadae umuú heewo awuwós nguri huúw, kiri tsuú/ didá' wa ale.

³⁵ Saulo kitángw ilahhooár AAKOÓ MUNGÚ ngiwa haniisi guna tleéhh ar tlaa/e, kitaangwí oo geera, oo aa tleéhh as AAKOÓ MUNGÚ.

³⁶ Saulo iri oó', «Gimsé' múk Filisti u haramamahhataán qoomár xweeraawo kay /awa/awimaán ay dír iimí i /awakuur, tam panmoó wák masók u geexawanaaká.» Inooín kuri báy, «Adór ta sla' tleehheek.» Kaahamusmoó Mungú iri oó', «Gaarihe Mungú u ala firiimaán.»

³⁷ Saulo Mungú guri yaahaás, «Xáy a aweéra múk Filisti nguwa eehar? Xáy ngu dabaá múk Israeli qása?» Ala Mungú tam /aymuú wák gwa mu/aywatsiiká baalaadae.

³⁸ Saulo iri oó', «Diirí tseewuware', kuungaásingaá geeraharuusér muu sleémeero, adór tlakweemaaká' nira tleehharuutiyé' laarí kawa aanda' nee kawa xua'.

³⁹ Ar adoodá' AAKOÓ MUNGÚ ir daadeér, kudá' múk Israeli gu ba/amaamís, tlakweemaká' bir baraá garmaaeé' Yonatan looeemaawo aqo in gwaa'.» Ala baraá tla/ángw muu sleémeero, heé gaa mu/aywaats i kaahh.

⁴⁰ Saulo múk Israeli sleémeero guri báy, «Kuungá' bartá wák na awaak, aníng nee garmaaeé' Yonatan a bartá hatlá' an awaán.» Naagáy Saulo kuri báy, «Adór ta sla' na tleehheek.»

⁴¹ Gawaá adoorihe Saulo iri oó', «Aá, AAKOÓ MUNGÚ, Munguú Israeli, a milá laarí sagadiyusmoowók mus mu/aywatská? Barnaxes tlakweema i baraaeé' laqaá i baraá garmaaeé' Yonatan, aá AAKOÓ MUNGÚ, Munguú Israeli laqaamang ar loohír tsawdo ar ta bay Urimu. Barnaxes tlakweema i baraá mukók oo Israeli laqaamang ar loohír tsawdo tidá' ta bay Tumimu.» Yonatan nee Saulo kiri uhín, ala muu iri /úy.

⁴² Saulo iri oó', «Hamí tsawdimé' baraá tla/ángw án nee garmaaeene.» Tsawdo Yonatan guri sleér.

⁴³ Saulo Yonatan guri báy, «Gár taa tléhh ooang.» Naagáy Yonatan iri oó', «Ar looeemaawo, aníng danú niiná una tsaáq ar ságw hhartidá' ni dakw'ér koom, nee qayteek, aníng gár tiwa hariím a gwa'ara.»

⁴⁴ Saulo iri oó', «Mungú adoorí ngi aníngí tleehhi, tam ar tí ba/a. Yonatán, kuúng aqo tsuwa gaasa.»

⁴⁵ Muu Saulo guri báy, «Xáy, Yonatan aqo in gwaái, kudá' arba/atír ur ngaa huuw baraá Israeliro? Tisíng i amoosií pa/ ar adoodá' AAKOÓ MUNGÚ ir daadeér, tam se'eemír wák ar sagós i baloó hu'ká yaamií ale, asma gadiyeérí gana tleéhh ar alee/isoó Mungú.» Gawaá adoriihe mukdá' Yonatan guri tuú/ baraá gwa'araro.

⁴⁶ Aluuwo Saulo múk Filisti guri máy eeharahaduwo, múk Filisti tari waátl ayaaín.

Waawuti'iimár Saulo nee múk do'ós

⁴⁷ Qoomár Saulo waawuti'iimár múk Israeli ngiwa óh, nee wakuuseerós ar bihhe sleémeero tana slaáqw nee múk Moabu, nee oo Amoni, nee oo Edomu, tam nee waawituú Soba nee múk Filisti sleeme. Umuúqo slaqwarár taa slaqwi, inós aqo ina baalín.

⁴⁸ Inós ina slaáqw ar migi, múk Amaleki guri baál, nee múk Israeli guri tuú/ baraá dabaá mukdá' sleémeerowo nee inooín slaqwa'a.

⁴⁹ Daaqoó Saulo a kwí: Yonatan, nee Ishfi, nee Malkishua, nee umér dasuuwós kudá' tsár a tí, umuú tidár baris ku bay Merabu, nee umuú dasír niina ku bay Mikali.

⁵⁰ Umuú harér Saulo ku bay Ahinoamu, dasír Ahima'asi. Umuú slaqwarusmoodá' úr oo slaqwaruuse a Abneri, garmoó Neri, baabuú niinuú Saulo.

⁵¹ Umuú baabuú Saulo a Kishi, nee Neri baabuú Abneri, a garmoó Abieli.

⁵² Deelo sleémeero ar Saulo tawa waawutmo, slaqwarár hhamhhám kángw kilá' wa ale i daadeer dír múk Filisti nee inose. Umuú qoomaaro Saulo heé /uuruú koóm, laqaá oo migusmo burungwa sláy, gun bartá slaqwaruuseerósií ohaahín.