1 SAMUELI 13 - Biblía Axweesantá Hhohho' ar Mungú 2004

Slaqwarár nee múk Filisti

¹ Saulo kureeraá afi qoomarka ngiwa áy, waawuti'iima gana sláy, múk Israeli guri sawaawuti'ín afiqoomár kureeraá tsare.

² Saulo múk kumér tám oo Israeli guna tsawaár, baraá tla/angw'ine múk kumér tsár ta dinkwa nee Saulo, baraadaá Mikmashiro, nee baraá yaamuudaá tlom'i awa Beteli, nee múk kumuú wák ta dinkwa nee Yonatan baraá Gibeár Benyaminiro. Mukdá' aa meet guna watlís, umuúqo heewo iwa ki/i baraá heémarós.

³ Yonatan koo/ír gawit ar slaqwaruusér múk Filisti gana daáhh, baraá Gebaro, múk Filisti kaangwí guri axaás, adór Saulo tarumbeéta ngira ufaáhh baraá yaamuudá' sleémeero iwa kaahi, «Gimsé' múk Ebrania i axaasi.»

⁴ Múk Israeli sleémeero kaangw kuri axaás adór Saulo koo/ír gawit ar múk Filisti ngira daáhh, nee adór múk Israeli ira wakuuse tleehhiít dír múk Filistiro, mukwí tari burumburiít dinkwaárí ale, Saulo kuri eehár ay Gilgali.

⁵ Xoorór Filisti tana burumburiít tawa slaqwi nee xoorór Israeli, slaqwaruusér faras gwa i tsa/aan a kume lahhoó', nee slaqwaruusér gaardaá faras gaa i tsa/aan a kume mibeeri tám, nee slaqwaruusér ya'ár hi'iit yaaremaawo a adór hhasángw afaá tlawi. Tari waatláy gáwtí ale, xafay'ín kuri tleéhh baraá Mikmashi bihhaá da/aáw awa Bet-afeni.

⁶ Múk Israeli ngiwa ár adór tar baraá slahh'amuú úr asma muu kwa /amatseek, tari nahhmiít baraá mar'o nee baraá boh'e, nee baraá tla/u, nee baraá /aantu, nee baraá hhaleeri.

⁷ Qoomár múk Ebrania bahh'ale tawa waaraáhh ay Yordani, tana hardáh ay yaamaá Gadi nee Gileadi, ala Saulo i amoodár Gilgalírí kaahh, mukdá' sleémeero tari eeharín ar daaraxaay.

⁸ Saulo ina dán deelo faanqw har afiqoomaadá' taa axweés nee Samueli, ala Samueli naa hardihiiká Gilgali, nee mukdá' aa burumburiit iri diyaa/amtuú áy.

⁹ Saulo iri oó', «Axáy ilahhooadár da/a huwaare' nee tidár wayduwo.» Ilahhooadár da/a gari haniís.

¹⁰ Ilahhooadár da/a ngiwa sa adoorí wa hhe'eés haniisaro hé! Samueli naxés naa amoorqá' wa ti'iít. Saulo iri ti'iít nguwa al'ay nee nguwa taaqweesi.

¹¹ Samueli iri oó', «Ma /imís?» Saulo iri oó', «Qoomár ngiwa ár muu iwa diyaa/amiiti amór saáwí alé dir'eene, nee kuúng naa hardatká deeloodá' taa axweesani, slám amoorqae múk Filisti aa dinkwárí burumburiít baraá Mikmashi,

¹² niri baraá muunaáeé' oó', ‹Múk Filisti i haratláy amor'eé' dír Gilgali, geeraá aleesleemuú AAKOÓ MUNGÚ ngura firimiiká.› Gawaá adoorihe ilahhooár da/a ngiri kilooeé' hara/akuút haniisaro.»

¹³ Samueli Saulo guri báy, «Adoosá naa tléhh ar barawaslaay, hara'ayár AAKOÓ MUNGÚ, Munguúwók aga otká kudá' ugwa hara'ayin, asma AAKOÓ MUNGÚ geera waawuti'iimarók ga gawdees gawaá daanduú múk Israeliro ay kureerisleém.

¹⁴ Ala hamí waawuti'iimarok i hotká. AAKOÓ MUNGÚ hee gwaa leeleéhh oo muunaáwose aa slaá'. AAKOÓ MUNGÚ heewí gwa tsawaár tawa heé úr baraá mukose. Asma kuúng axweesantadá' AAKOÓ MUNGÚ naa hara'ayín aga otká.»

¹⁵ Naagáy, Samueli iri tláy, iri waatláy Gilgalír wa ale tay Gibeár Benyamini. Saulo mukdá' nee inós dinkwár i diriiá' guri faár naxés a tsiire lahhoó'.

¹⁶ Saulo nee garmaawós Yonatan, nee mukduú dinkwa nee inooín xafay'ín nguna tleehhiyé' amoodár Gebár Benyamini, ala múk Filisti kooín kuna tleéhh baraá Mikmashi.

¹⁷ Inooínadá' haasaánguú leehhá' tindiri ti'iít baraá xafayduú múk Filisti wa alé, slawo tám, slawtá wák tana warqáy amór loohidá' Ofrár kaw ay yaamaá Shuali,

¹⁸ nee slawtá hatlá' ina warqeér amór loohidá' Bet-horonír kaw, nee slawtá hatlá' iri warqeér amór loohidár digimuú xatstá Seboimu amór bartá xaanxaay.

¹⁹ De'emaadae kareeramoó daadáw i kaahh baraá yaamaá Israeli sleémeero, asma múk Filisti tana fuqurín as kahhó' múk Ebrania paangadu nee lawlu mikiwa baloó tleéhh.

²⁰ Asma múk Israeli sleémeero /iisí tan /e/taatín amór múk Filisti as kureemi'ín kiwa duuqár aa'ay, nee tsat'iiwo nee tsabuuwo, nee duqsi'ii'ín kudaá muqslaaro.

²¹ Múk Israeli gár i buaain duuqutuú afér kureemiiwo nee duqusi'iidaá muqslaaro a qoomoó shekeéli ga nakakaá/. Nee bu'utuú duuqutuú tsabu nee laqw'iidaá muqsla a tlaqtá wák baraá shekeéliro.

²² Gawaá adoorihe bál deeloodár slaqwara baraá tla/ángw mukdá' nee Saulo nee Yonatan ti kooma'a, heé gár koóm dako i kaahh, paánga tam lawaala, aqo har Saulo kilós nee garmaawós Yonatan.

²³ Nee slaqwaruuseedár múk Filisti tsirxár Mikmashi gari tsék.