1 SAMUELI 12 - Biblía Axweesantá Hhohho' ar Mungú 2004

Samueli iwa amór mukwí kwasleemuti

¹ Samueli múk Israeli sleémero guri báy, «Qayté', aníng aforhúng aga iiárií qaás baraá muruudá' sleémeero naa án beeri'i, aníng waawutmoohúng nguri qaás.

² Hám daxta qaytsité', waawutmo kuungá' nun geeraharahaar, aníng aga diím, saga al/awtani gwaa gás, qaytsité', kuungá' nee daaqay'eé' a dinkwa, aníng kuungá' nuna geeraharahaár iimír masombi'iimar'eene, tay laarí.

³ Aníng a diirí, gimsé', lamabu'uumaré' geeraá AAKOÓ MUNGUHE, nee geeraá waawutmoowo, awuú naa hayóh i deéro? Laqaá daqoó hee oo naa hayóh i deéro? Laqaá a heemá oo naa malguús? A heemá oo naa hara/uuntsiím? Laqaá slukmár naa /aáy ar hee, sakwasleemár hee ar naa paslís i deéro? Bir deer ooare', aníng a ki/ís.»

⁴ Inooín tari oó', «Taa malguská, slám taa hara/uuntsindiiká, slám tam gár taa dákw heéwaá ilaót i káhh.»

⁵ Inós inooín giri báy, «AAKOÓ MUNGÚ nee waawutmoowo a lamabu'uuse laarí, adór kuungá' gár tlaakw taa sleeré' dir'eene ir káhh.» Inooín tari oó', «AAKO a lamabu'usmo.»

⁶ Samueli muu guri báy, «AAKOÓ MUNGUÚDÁ' Mose nee Aroni gaa tsawaar, inósuudá' baabi'iihúng ngaa tuu/ baraá yaamaá Misrír wa alé, an lamabu'usmo.

⁷ Gimsé', sihhiité' diisír kilá', as kahhó' AAKOÓ MUNGÚ sakwasleema ngiwa tleehhi tla/ángw aníng nee kuungae, nee aníng tlehhma'aá ba/ama awa AAKOÓ MUNGÚ ngi dirhúngí alki/iít kudá' aa tleéhh dírhúng nee dír baabi'iihúng.

⁸ Qoomár Yakobo iwa dáh baraá yaamaá Misri, baabi'iihúng AAKOÓ MUNGÚ nguna i /aa/aminé', AAKOÓ MUNGÚ Mose nee Aroni giri ya/aáw, asma inooín kina slahh'eemiís nee múk Misri, inooín baabi'iihúng kingiri duúx baraá Misrír wa alé, kingiri qaás baraá yaamuuká'.

⁹ Ala inooín AAKOÓ MUNGÚ Munguúín nguri gunqareesiyé', Mungú inooín giri weeriís baraá dabaá Sisera, geeraharusmoó slaqwaruusér Yabini, waawutmoó yaamaá Hasori, nee baraá dabaá múk Filisti, nee baraá dabaá waawutmoó múk Moabu, inooín nee waawitaáwí tari slaáqw.

¹⁰ Inooín AAKOÓ MUNGÚ kway i /aa/amín tari oó', ‹Aga tlakweesaán, asma AAKOÓ MUNGÚ ugwa geexawaán, munguaá ta babay Ba'ali nee Ashtaroti kiri sagadiyusaán, ala hamí ti tu/ baraá dabaá wakuuseerene, daqaní atén kuúng u sagadiyuusaán.›

¹¹ AAKOÓ MUNGÚ Yeruba'ali, nee Baraka nee Yefta, nee Samueli gina ya/aáw, kuungá' nuri tu/iyé' baraá dabaá wakuuserhúng wa ale bihhe sleémeero, kuungá' tari hoté' ar amohhooa.

¹² Tam Nahashi waawutmoó múk Amoni kuwa aandé' niwa haratláy, kuungá' aníng iri beeré', ‹Atén waawutmoó ti sawaawuti'iím un sla'aán.› Kuungá' AAKOÓ MUNGÚ, Munguúhúng kuri sié'.

¹³ «Ala hamí ga/aawaak waawutmoó taa tsawdé' nee oo taa slaé' ga/aawaak, AAKOÓ MUNGÚ waawutmohúng ngwa qaás.

¹⁴ Barnaxés AAKOÓ MUNGÚ ugwa ilaiwa/é', nee kuri sagadiyusé', nee afoorós kari iiárií qasé', nee bar hara'ayár AAKOÓ MUNGÚ aga si'i'iiká, barnaxes kuungá' nee waawutmoó kuungá' nu sawaawuti'iím AAKOÓ MUNGÚ ugwa eehadé', daqaní kuungá' amohhooa a sleerá'.

¹⁵ Ala barnaxes afór AAKOÓ MUNGÚ aga iiárií qasi'iiká, ala aqo hara'ayár AAKOÓ MUNGÚ ana sié', daqaní dákw AAKOÓ MUNGÚ i gawaahúng, kuungá' nee waawutmohunge.

¹⁶ Gimsé', sihhité' ti amohhe'ese', gaarí ur AAKOÓ MUNGÚ i tleehhi dír ilahúng wa alé, araak.

¹⁷ Laarí ahaá a baalaadár bu'úngw angaánoówóke? Án AAKOÓ MUNGÚ un firiím, as kahhó' kwarara/a nee tluwaay ngiwa huwi, daqaní kari tsahhá' adór tlakweemaahúng kudá' ta tlehhé' dír ilaá AAKOÓ MUNGÚ wa alé, nira tlahhiyé' kángw kilá' wa alé as waawutmo kuwa gurií ba/é'.»

¹⁸ Naagáy Samueli AAKOÓ MUNGÚ guri firín, AAKOÓ MUNGÚ baalaadae kwarara/a nee tluwaay ngiri huúw, muu sleémeero AAKOÓ MUNGÚ nee Samueli kiri da'ayuút kángw kilá' wa ale.

¹⁹ Muu sleémeero Samueli kuri báy, «Ti aleefiriin, ataá lawaaleerók dír AAKOÓ MUNGUHE, Munguúwók, as mawa qatlaán, asma tlakweemaarén iga doogaán, sleémeero ar tlaákwarí waawutmo kuwa gurií ba/aán.»

²⁰ Samueli giri báy, «Ma da'ayumiitaara', a ló' tlaákwarí sleémeero aga tlehhé', ala ma warqawaara' AAKOÓ MUNGÚ kuri meerá' eeharto, i hariín AAKOÓ MUNGÚ kuwa sagadiyusa' ar munerhúng sleémeero.

²¹ Ma bihhií warqawaara', asma muruú gaa wásl oo slaasláwár koomaaká kuwa sagadiyusa' oo alee/isoó huwaaká sleeme i ba/amisiká, asma gár iwa harin i káhh.

²² AAKOÓ MUNGÚ mukós gu geexayká as ilaiwa/amér umuuwós kudá' iia tleér, asma AAKOÓ MUNGÚ adoorí guna sla'atís ar kuungá' nuwa mukósuú kilá' tleehhi.

²³ Tam adoorihe amór bartá aninge, aníng AAKOÓ MUNGÚ muwa tlakweemií tleéhh ar kuungá' nuwa maw aleefirooro, ala nun intsaahhatís baraá lohaá hhoe nee awa ganaa'ae.

²⁴ AAKOÓ MUNGÚ kilós na ilaiwa/aak kuwa sagadiyusa' ar inkihhimu, nee ar munerhúng sleémeero, inslawimé', adór nura muruú urén i tleéhh.

²⁵ Ala bar kumitá' tlehhma'aá tlakwe, a hhaandá' kuungá' nee waawutmoohunge.»