1 SAMUELI 11 - Biblía Axweesantá Hhohho' ar Mungú 2004

Saulo múk Amoni guna baál

¹ Nahashi heé Amoni, iri waatláy amór Yabesh-gileadi, gixsadá' kari harweér nee mukose, muu sleémeero oo Yabeshi Nahashi guri báy, «Al'axweesani dirén i ooang, daqaní atén kuúng u sagadiyuusaán.»

² Ala Nahashi heedaáduú Amoni iri oó', «Dakw'eé' a kwí, ‹Aníng nee kuungá' al'axweesani bar tleehhaán, umuúqo heewo iltós ar doó /iyáy an tuú/, kahhó' ar tlehhmuuwihe múk Israeli sleémeero ku mureekees.› »

³ Naagáy bariisér Yabeshi guri beér, «Deelo faanqw haniisang, as ya/abuuse kawa ya/aawaan baraá yaamu sleémeero awa Israeli, barnaxes heé ti ba/amís i kaahh, daqaní ni amoorógí ki/aan.»

⁴ Ya/abuusér aáng iri hardát ay Gibeár Saulo, axweesanaywí kuri oó' baraá iaá muu sleémeero, tari tsuunquumiís ar /aa/aá yaariir.

⁵ Qoomaarihe Saulo i baraá qaymór daahh nee aweerose, Saulo iri yaahaás, «Gár mukwí gwaa sleer, masta /aa/amín?» Kangwduú múk Yabeshi kuri alki/iít.

⁶ Qoomár Saulo axweesanaydá' nguwa axmiís, iri buúhh, /uuruú Qeeruú Mungú Saulí guri hatsiís.

⁷ Inós awér tsár gana óh, gari tlaáq baraá kaeemo, kaeemoodá' giri huúw baraá yaamaá Israeli sleémeero, ar dabaá mukduú ya/abuuse, tari oó', «Umuúqo heewo oo Saulo nee Samueli gaa eehariiká baraá slaqwaraaro aweerós adór ka laqi a tír kilá'.» Naagáy AAKOÓ MUNGÚ mukdá' guri dae tsaát tindiri ti'iít adór heé wákár ale.

⁸ Inós amoodár Besekiro muu guri faár, naxés múk Israeli a kume tsiire tám, nee múk tlahhoó Yuda a kume mibeeri tám.

⁹ Inooín ya/abuuseedá' naa hardat kari báy, «Múk Yabeshi-gileadi ku beera', ‹Matlo qoomár tsee/amá bira uú', ba/ama a sleerá'.› » Naagáy ya/abuuseedá' iri tleér, múk Yabeshi kuri ádbáy, inooín tari qwalaá/.

¹⁰ Gawaá adoorihe múk Yabeshi múk Amoni guri báy, «Matlo atén ti amorhúngí haniisaán, daqaní tidá' sleémeero ta tleehhamór wa sla'a' dirénií ale ka tlehhá'.»

¹¹ Naxés matloowose Saulo muu guna qasiís baraá daqooroó tám i ale. Looaytleér matlaatleero múk Amoni kuri gaanslár tsitsiíhh muxtaaro baraá xafay'íní ale ay qoomár /ameetleemu, aluuwo múk aa meet iri tsiyaayaxaát, tam múk afi tsár sleeme kwaa dinkwárí mayká.

¹² Aluuwo muu Samueli guri báy, «A heemá heé aa oo', ‹Xáy Saulowí tin sawaawuti'ína?› Muksíng huwang, as kuwa tsu/aan.»

¹³ Ala Saulo iri oó', «Heé laarí ta gaasi i kaahh, asma laarí AAKOÓ MUNGÚ múk Israeli ngwaa tuú/.»

¹⁴ Samueli muu guri báy, «Xaysé' a tlawaán ay Gilgali as waawuti'iima kawa male /abesaan.»

¹⁵ Múk aáng sleémeero tari tláy ay Gilgali, Saulo kuri waawutmoó wa qaás dír geeraá AAKOÓ MUNGÚ baraá Gilgali. Ilahhooár wayda ar muruú ta tsu/i kari haniís dír AAKOÓ MUNGÚ. Saulo nee muu sleémeero oo Israeli tari qwalalaá/ kángw kilá' wa ale.