1 SAMUELI 10 - Biblía Axweesantá Hhohho' ar Mungú 2004

¹ Naagáy Samueli chupiito'ór di/i gari óh, gari tsiririxiís gawaá ságw Saulo, guri ma'aás, iri oó', «AAKOÓ MUNGÚ ugwa iimbalaáx ar di/i, as tawa geeraharusmoó mukós oo Israeli, nee kuwa ba/amis baraá dabaá wakuuser'ín wa ale. Layár kuúng kar tsahh adór AAKOÓ MUNGÚ ura di/tár iimbalaáx tawa geeraharusmo daanduú aalirose a tí,

² hamí bara diirí wa tleér, ti dogá' nee hhawaataá tsár dír iisaapoó /aantár Raheli, didár Selsa baraá yaamaá Benyamini. Inooín turi bay, daqwaayeedá' taa leelehhtuú eeré' kaa sláy. Hamí baabuúwók guruuwós in hamiis as kuúng, i kaahi, ‹Adór ni laaq daanduú garmaaeene?›

³ Didae bara geerií kumít ay ti'ituú Tabori, nee didae nee múk tám ti dogá' oo amór Mungú káw amdár Beteli, oo wák i deeloó tám kón oo aara, nee oo hatlá' i mikaátér tám kón, nee oo hatlá' i tlakoó kaahartá kón oo difaái.

⁴ Inooín kuúng uri taaqweesiyá', mikaátér tsár ngiri haniisiyá', kuúng kari dabaaín wa ót.

⁵ Alaá tihe tari hardát Gibea-elohim, dír koo/ír gawit ar slaqwaruusér múk Filisti i diri', tari hardát baraá gixsa, tiri dogá' nee daqtá aaruuse ar naa gáwtá wa awet, i mariímbár muxiyá' nee oowiro, nee fililimbiro, nee gidaandoriro, inooín ta aariirín.

⁶ Nee Qeeruú AAKOÓ MUNGÚ un hatsiis, kuúng tari aaririín dinkwa nee inooín, kuúng turi warqees tari heé dimbé.

⁷ Qoomár slaqsi'iiká' bira aán, adór ta aleesleer ka tléhh ar ta sla', asma Mungú i dinkwa nee kuúng.

⁸ Kuúng tari geeraaeé' wa giiriín, ta /ét ay Gilgali, ga/aaweek án niqo amoorógí /eét, asma ilahhooár da/a ngiwa haniis nee ilahhooár wayda ar muruú ta tsu/i. Deelo faanqwe án daamáng ay dír ni hardah, daqaní gár uwa hariim tleehhamooro ngi laqaám.»

⁹ Saulo dír Samueli ngiwa sa geexáy Mungú muunaáwós guri /abeés, naxés slaqsi'iidá' sleémeero niri geehhoouyé' baalaadár kilae.

¹⁰ Naagáy tawa hardáh Gibea, qaytsiít inós nee daqtá aaruuse tina doogiyé', naxés Qeeruú Mungú guri hatsiisa hhe'eés, inós iri aariirín baraá tla/ángw aaruuseedá' wa ale.

¹¹ Mukdá' sleémeero Saulo gu geerií xuú' qoomár adoorí kawa ár, tari oó', «Qaytsité', kwí i aariirín dinkwa nee aaruuse, gaarí a milá ar garmoó Kishi gwa sleer? Xáy Saulo sleeme a aarusmoówo baraá aaruuseero?»

¹² Heé wák oo yaamuudá' iri oó', «Mukwí baabuúín a heemá?» Gawaá adoorihe kan axweesantá bó/ ar aaín, «Xáy Saulo sleeme a aarusmoówo baraá aaruuseero.»

¹³ Inós aariringo iwa hhe'eés, iri hardáh amoodár gongoamo ar ilahhooa.

¹⁴ Baabuú niinaáwós Saulo nee sagadiyusmoowós giri yaahaás, «Xáy aga keeré'?» Inós iri oó', «Ana daqwaayér leelehhtuú awaán, nee kawa araán daqwaaye iwa kahh, ana tlawaán amór Samueli.»

¹⁵ Baabuú niinuú Saulo iri oó', «Na'amaamís kangwsíng ooang, Samueli munda báy?»

¹⁶ Ala Saulo baabuú niináwós guri báy, «Ngina oó' ar adór gwa/aat, adór daqwaayeedá' kara sláy» Ala kángw waawuti'iima kudá' Samueli aa inós báy ngwa ooiiká.

Saulo kuwa waáhh tawa waawutmo

¹⁷ Naagáy Samueli muu guri burumbuúr geeraá AAKOÓ MUNGÚ baraá Misparí ale.

¹⁸ Xoorór Israeli gari báy, «AAKOÓ MUNGÚ, Munguú Israeli adór i kaahi a tí, ‹Nuna baraá Misrír wa duúx, aníng kuungá' nuna ba/amís baraá dabaá múk Misrír wa ale, nee dír dabaá waawitaádá' naa slahh'eemamiis.›

¹⁹ Ala laarí Munguúhúng ugwa sié', inós an kudá' naa tuu/ baraá /aa/eehúng awa slahh'amaaye sleémeero, kuungá' aga oi'iíke, ‹Aasla'áy waawutmoorén qaasang.› Ala hám daxta burumburiité' dír geeraá AAKOÓ MUNGÚ, ar gur'ér marayhúng.»

²⁰ Samueli tlahh'aá múk Israeli sleémeero giri saapiís, nee tlahhoó Benyamini kuri tsawaár.

²¹ Tlahhoó Benyamini guri saapiís dír múk dooín, múk guruú Matri kuri tsawaár. Múk guruú doó Matri guri saapiís, gina waketaatín umuúqo heewo alaá kuqá', aluuwo Saulo garmoó Kishi kuri tsawaár, ala kuwa leelehhiti kwa ariiká.

²² Tari kumiít AAKOÓ MUNGÚ yaahamisuuwo, «Heé aa meet i deéro oo naa amoorií hardihiiká?» AAKOÓ MUNGÚ giri mu/aywaáts, «Qaytsiít aa nahhaát baraá tla/eeraá xooslár taa burumbuúr.»

²³ Naagáy tari gaanslár ta'aaín kunguri amoodá' wa huúw, inós iwa sihhiít tla/ángw muu, ku tlerantleér múk hatlá' ba/a sleémeero, asma muu sleémeero dír suumarós gan i qwaqwadín.

²⁴ Samueli muu sleémeero guri báy, «Heewí taa tsawaár nee AAKOÓ MUNGÚ u ga/eerá'a, inós nee heé slaqmís i kaahh baraá muu sleémeero.» Naxés muu sleémeero kuri ilaaóh ar afór tsimaahhi, ta kaahi, «Waawutmo sagós fur'a ngu laaleer.»

²⁵ Kár Samueli daharemaá waawutmo giri alki/iít dír muu, giri gooín baraá kitaábu, giri qaás didá' hhoohhoo' ar AAKOÓ MUNGÚ. Samueli iri ya/án muu sleémeero iwa watli amór maray'ín.

²⁶ Saulo iri waátl Gibea amoodár do'ós dinkwa nee slawtá slaqwaruuse, tidá' Mungú aa mune kwatiít.

²⁷ Ala mukko amoowásl tari káh, «Xáy, kwí adór tir ba/amisi?» Inooín kuri waaqaá' tam qeemuú kway huúw i kaahh. Ala inós gaa gaárí xuiiká.