1 QOM'I 9 - Biblía Axweesantá Hhohho' ar Mungú 2004

Múk naa baraá Looháy wa waatl

¹ Umér múk Israeli kana gooín ar tlahhi'i, kaangwí dír kway gooín a baraá kitaábuú waawituú múk Israeli. Nee múk tlahhoó Yuda kuna ar tláy ay yaamaá Babuloni as inkihhimu wasler'ín.

² Múk Israeli kuduú geeraharuuseerooká an múk aa geerií kii/ baraá gixsaduuín, nee kaahamuusér Mungú, nee múk tlahhoó Laáwi, nee sagadiyuusér doó Mungú.

³ Muu bahh'alé oo tlahhoó Yuda, nee oo Benyamini, nee oo Efraimu nee oo Manase Yerusalemu kana hoót. Inooín a kuká':

⁴ Utai garmoó Amihudi, garmoó Omri, garmoó Imri, garmoó Bani, garmoó Peresi, garmoó Yuda.

⁵ Xwaylár Shilo a tí: Asaya garmaawós oo baris nee daaqaywós.

⁶ Xwaylár Sera a tí: Yeueli nee hhaeeín, muu tsiire lahhoó' nee mibeeri gwaleél.

⁷ Nee xwaylár Benyamini a tí: Salu garmoó Meshulamu, garmoó Hodafia, garmoó Hasenua,

⁸ nee Ibeneya garmoó Yerohamu, nee Ela garmoó Usi, garmoó Mikri, nee Meshulamu garmoó Shefatia, garmoó Reueli, garmoó Ibniya.

⁹ Hhaeeín kina alqoomeés ar adoodá' tlahhay'ín i dirii'i, muu sleémeero a tsiire gwaleél nee mibeeri kooán nee lahhoó'. Mukwí sleémeero an múk urén baraá tlahh'aá baabi'ii'ine, nee ar adoodá' tlahhaay i dirii'i.

Kaahamuusér Mungú ar Yerusalemu gaa hot

¹⁰ Kaahamuusér Mungú ar Yerusalemu gaa hot a tí: Yedaya nee Yehoyaribu, nee Yakini,

¹¹ nee Asariya garmoó Hilkia, garmoó Meshulamu, garmoó Sadoki, garmoó Merayoti, garmoó Ahitubu kudá' úr dír doó Munguhe,

¹² nee Adaya garmoó Yerohamu, garmoó Pashuri, garmoó Malkiya, nee Ma'asai garmoó Adieli, garmoó Yasera, garmoó Meshulamu, garmoó Meshilemiti, garmoó Imeri.

¹³ Múk urén baraá tlahh'aá baabi'ii'ine dinkwa nee hhaeeine a muu kumuú wák nee tsiire faanqw nee mibeeri lahhoó'. Mukwí a múk aleesleemuú úr gu koóm baraá gadiyér Doó Munguhe.

Múk Laáwi oo Yerusalemu gaa hoot

¹⁴ Múk tlahhoó Laáwi oo Yerusalemu gaa hoot a kwí: Shemaya garmoó Hashubu, garmoó Asrikamu, garmoó Hashabia, oo wák baraá daaqoó Merariwo.

¹⁵ Nee Bakbakari nee Hereshi, nee Galali, nee Matania garmoó Mika, garmoó Sikri, garmoó Asafu.

¹⁶ Nee Obadia garmoó Shemaya, garmoó Galali, garmoó Yedutuni, nee Berekia, garmoó Asa, garmoó Elkana, kudá' ayeemaá Netofati ngaa hootiye'.

Xuumuusér doó Mungú ar baraá Yerusalemu gaa hot

¹⁷ Xuumuusér Doó Mungú a baraá Yerusalemu gaa hot a tí: Shalumu nee Akubu, nee Talmoni, nee Ahimani, nee hhaeeín, Shalumu an geeraharusmooín.

¹⁸ Inooín aáng afkú doó waawutmo nguna xuné', dír bihhaá da/aáw awa gixsa, sleeme an múk xafayduú múk tlahhoó Lawí gwaa xun.

¹⁹ Shalumu garmoó Kore, garmoó Ebiasafu, dinkwa nee hhaeeín awa hhay Kora. Inooín an xuumuusér afér heémár Mungú, ar adoodá' baabi'ii'ín aáng tawa xuumuusér xafoó AAKOÓ MUNGÚ.

²⁰ Finehasi garmoó Eleasari aáng a geeraharusmooín. AAKOÓ MUNGÚ nee inós a dinkwa.

²¹ Sekaria garmoó Meshelemia an heé afkú heémár Mungú gwaa xun.

²² Kuká' sleémeero an kudá' taa tsawaár as tawa xuumuusér afkú do', inooín dinkwaaro a tsiire tsár nee mibaá nee tsár. Inooín kina faár ar adoodá' tlahhi'ii'ín i dirii'iya' baraá ayeemooine. Daudi nee iigu'utusmo Samueli inooín ngina qaminé' baraá gadiyeérí inkihhimuú slaa'.

²³ Naagáy inooín nee xwaylar'ine tana kumiít gadiyér xuumár afér doó AAKOÓ MUNGUHE.

²⁴ Inooín kina qaás afér gixsa ngiwa xuna' bihhe tsiyahhaawo, kuqá' bihhaá da/aáw, nee kooko a bihhaá /uwa, oo hatlá' a bihhaá /iya nee kuqá' a bihhaá basa.

²⁵ Inooín tina ale/iimisiyé' nee hhaeeín kudá' baraá ayeemooín hootá', tina baalaqaminé' gadiyér xuumaro umuú muko deelo faanqw.

²⁶ Mukdá' tsiyáhh a geeraharuusér xuumuuse an múk tlahhoó Laáwi, inooín an sagesihhtuusér doó Mungú nee daqaari'iimarose.

²⁷ Inooín dír iwa hootiya' an iisaapoó doó Mungú, asma do' nguwa xuna', nee umuú matlaatleero afkú do' nguwa gweeriya'.

Múk hatlá' oo tlahhoó Laáwi

²⁸ Baraá tla/angw'ine bahh'alé gadiyér'ín a xuumár xooslár gadiyeé, asma barka duux aqo kan faar, nee barka ki/imis aqo kan faar sleeme.

²⁹ Nee bahh'ale baraá tla/angw'ine kina qaás sagesihhtuusér xooslár doó Mungú wa ale, as xosluudá' hhohho' ngiwa ga/aya', nee puuruúdá' hhohhó' nguwa ga/ay, nee difaái nee di/i nee mooyángw tsuú' nee muruudá' ta mooyángw tsuú' ar tlehhiiti.

³⁰ Bahh'alé baraá daaqoó kaahamuuseero mooyángw tsuú' nguna amohhe'eemisiyé'.

³¹ Matitia, heé wák oo tlahhoó múk Laáwi, garmoó baris oo Shalumu, oo guruú doó Kora, inós mikaáteedá' tlaambarahhayen gana tlehhiít.

³² Hhaeeín bahh'ale awa guruú doó Kohati gadiyér'ín a mikaáteedá' ta qamin as Mungú ngiwa tlehhitiya' nee ngiwa amohhe'eemisiya' umuúqo deelór Sabaátooro.

³³ Slamí kudá' uren baraá tlahhoó Laáwiwo a daauuse, nina hootiyé' baraá kutuwoó doó Mungú wa ale, inooín gadiyér hatlá' ngi kon'aaká, ala inooín tin baalaqaminá' tlatla/aangw nee xweeraawo.

³⁴ Kuká' an kudá' uren baraá tlahh'aá baabi'ii'ine oo tlahhoó Laáwi ar adoodá' xwaylar'ín i diri'. Inooín Yerusalemu ngina hootiyé'.

Xwayliitér waawutmo Saulo nee múk guruú do'ós

³⁵ Yeieli an heé yaamaá Gibea gaa iimu/un, umuú harerós ku bay Ma'aka.

³⁶ Garmaawós oo baris a Abdoni, nee awa aluudá' ngaa hariyé' a kuká': Suri, nee Kishi, nee Ba'ali, nee Neri, nee Nadabu,

³⁷ nee Gedori, nee Ahio, nee Sekaria nee Mikloti.

³⁸ Mikloti ina laqwaál Shimeamu. Xwaylarós sleémeero ina hót baraá Yerusalemu wa alé inslaawoó múk guruú dooín.

³⁹ Neri ina laqwaál Kishi, Kishi ina laqwaál Saulo, Saulo ina laqwaál Yonatan, Malkishua, Abinadabu nee Eshba'ali.

⁴⁰ Yonatan ina laqwaál Merib-ba'ali, Merib-ba'ali ina laqwaál Mika.

⁴¹ Daaqoó Mika a kwí: Pitoni nee Meleki, nee Tarea, nee Ahasi.

⁴² Ahasi ina laqwaál Yara, nee Yara ina laqwaál Alemeti, nee Asmaweti nee Simri. Simri ina laqwaál Mosa.

⁴³ Mosa ina laqwaál Binea, Binea ina laqwaál Refaya, nee Refaya ina laqwaál Eleasa, nee Eleasa ina laqwaál Aseli.

⁴⁴ Aseli daaqaay ngu kon a lahhoó', a kwí: Asrikamu, nee Bokeru, nee Ishmaeli, nee Shearia, nee Obadia nee Hanani. Kuká' sleémeero a daaqoó Aseli.