1 QOM'I 29 - Biblía Axweesantá Hhohho' ar Mungú 2004

Ohmér doó Mungú tleehhamo

¹ Waawutmo Daudi mukdá' sleémeero aa burumburiit guri báy, «Garmaaeé' Solomon an heé taa tsawaár nee Mungú, ala inós ku niiná, aa kwa/iiká baraá gadiyeérihe. Gadiyeérí ka ló'wa ur, asma doó ta tlehhitaan a doó heewooká, ala a Doó AAKOÓ MUNGÚ.

² Aníng umuú gaaro aga iiár burumburto as tleehhamór doó Munguúeé', muruú naa burumbuúr a kwí: Sahaábu as muruú ta sahaábúr tleehhi, nee muqslár peésa ar ta muruú muqslár peésár ar tleehhi, nee muqsla sirda/aten ar ta muruú muqslár sirda/atén ar tleehhi, nee muqsla ar ta xoslár muqslár ar tleehhi, nee xaai awa ta xooslár xaaír tleehhi. Sleeme tlaa/aá kal'i iga amohhe'eés nee tlaa/aá tar tipin, tlaa/aá ta bay njumu, tlaa/eedá' kal'i nee awa tlaxo uren awa da'aweemaá dimbadiimbé, nee awa ta bay marumarúr yaariir.

³ Dinkwa nee tí sleémeero naa haniisi as do'owí hhoohhoó', aníng sahaábu u koóm nee muqslár peesaaro. As doó Munguúeé' nguwa slaa', muruuwí an kwe'eé' nu kilá', aníng un haniisi as doó Munguúeé'.

⁴ Aníng talaántár kume tám ar sahaábuú Ofirír daáhh aga haniís, nee talaántár tsiire tám ar muqslár peésa ar ta koo/ír ar ninkiriitsi ana haniís.

⁵ Sahaábu una amohhe'eés as xooslár sahaábu, nee muqslár peésa as xooslaá peésa, nee muruú ta qoo tleehhi ar daba' nee heé gadiyeé ga xuú'. Xáy, a heemá heé ti kilós haniís laarí as tawa oo AAKOÓ MUNGÚ?»

⁶ Naagáy, múk urén oo maraá baabi'i, nee geeraharuusér tlahhi'i, nee geeraharuusér slaqwaruusér kume nee ar tsiire, nee kudaá geeraharuusér sagadiyuusér doó waawutmoó sagesihhmiitá', muruuín ngway haniisiyé' ar sla'aari.

⁷ Muruú taa haniís as gadiyér doó Mungú a gunyadaá sahaábu awa kumuú wák nee tsiire tsiyáhh, nee muqslár sirda/aten a guniyadu kume lahhoó' nee tsiire tsár, muqsla a guniyadu kume mibeeri tám nee tsiyáhh.

⁸ Mukdá' tlaa/aá tlaxo uren gi koóm kiri hanmiís dír heedaádá' ohmér babaáts ar doó Mungú, kudá' ta bay Yehieli, heé tlahhoó Gershoni.

⁹ Aluuwo muu iri ló'wa qwalalaá/ as adoodá' muruuín nguwa hanmisiyé' ar muunuú /awaák, asma muruuín sleémeero nguna dír AAKOÓ MUNGÚ i hanisiyé' ar muner'ín sleémeero ar muunuú /awaák. Waawutmo Daudi sleeme iri ló'wa qwalaá/.

Daudi iwa Munguú xirfayeemisi

¹⁰ Aluuwo Daudi AAKOÓ MUNGÚ gway diidi'iís dír geeraá muu sleémeero wa ale, iwa kaahi, «Aá AAKOÓ MUNGÚ, Munguú taati'iirén awa Israeli, kuúng tu diidi'iimaamisi ay alhhe'eesay wasle.

¹¹ Aá AAKOÓ MUNGÚ, uraay a kók nee /uuru nee xirif nee baaliro nee aleesleemuuwo. Asma umuú gaaro ar gawaá dooriwo, laqaá ar baraá yaamu a tók. Waawuti'iima a tók, kuúng taa xirfayeés nee tu úr dír umuú gaaro.

¹² Daqaari'iima nee ilaiwa/ame amór i dahh a amoorók, kuúng umuú gaaro an sawaawuti'iín, aleesleemu nee /uuru i gawaá dabaawók, kuúng aleesleemu u koón oo umuú heewo kuwa ures nee kuwa /uurií dok.

¹³ Daxta Munguúrén, atén kuúng u sluufisaán nee umuuwók u xirfayeemisaán.

¹⁴ «Ala aníng a gár milá, nee tam muk'eé' sleeme a gár milá, tam atén muruuwí nguri aleeslawaán haniisaro ar muunuú /awaák, asma umuú gaaro amoorók ngin dáhh, baraá muruuwí amoorók dahha, atén kuúng una muruuwí hanisaán.

¹⁵ Asma atén a adór dahaaye nee múk waaraáhh geeraawoge ar adoodár baabi'iirén sleémeero. Deelór hotaarén baraakaá yaamuwo a adór mahhtuú waaraáhh, harahhifór hota i káhh baraakae.

¹⁶ Aá AAKOÓ MUNGÚ, Munguúrén, atén daqaari'iimarén ar yaariir ngaa dinkwár i huwaán as Do'ók kuwa tleehhaan as ilaiwa/amér umuuwók kudá' hhoohhoó', ala tí sleémeero amór i dahh a amoorók, nee sleémeero a tók.

¹⁷ Aníng aga xuú' adór kuúng Munguúeé' muu kur mune tsee/aariín, nee an qwalaalá/ as múk ganaá'. Aníng baraá gan'amuú muunaáeene muruuwí sleémeero nguna haniís ar muunuú /awaák, nee aníng daxta aga ár adór mukwí diirí dirií' kuúng tura ilahhooárí haniís ar muunuú /awaák nee ar qwala/.

¹⁸ AAKOÓ MUNGÚ, Munguú baabi'iirén, Abrahamu nee Isaka nee Yakobo, adoorí mukók aa tleéhh tsuuqeek, nee munér inkihhimuú koom i kumaamit, nee munér mukók amoorók xu'usek.

¹⁹ Garmaaeé' Solomon tsuuqeek, as kahhó' hara'ayarók ngiwa oohi ar muunaáwós sleémeero, nee dabeeroge nee kaahiroge, sleémeero ngi boo/eesi, as do'owí aníng naa xoslu amohhe'eés nguwa aleeslay tleehhamooro.»

²⁰ Daudi muu sleémeero gway báy, «Gimsé', AAKOÓ MUNGÚ, Munguúhúng diidi'iisaak.» Mukdaádá' AAKOÓ MUNGÚ Munguú baabi'ii'ín ngway diidi'iisiyé', sager'ín ngiri xupu'usiyé', Mungú nguri sluufisiyé', AAKOÓ MUNGÚ nguri ilaiwawa/iyé' nee waawutmoowo.

²¹ Bál tsare ilahhooár muruú ta tsu/i ngay haniisár ayé' dír AAKOÓ MUNGÚ. Awér kumuú wák kari tsuú/ as ilahhooa nee gwaandawér kumuú wák nee deeloó bee/aangw oo kumuú wák, kuká' sleémeero kina daá/ baraá kitangwdá' ilahhooa kawa hanmamiisi, sleeme ilahhooár muruú wahaangw oo difaái nguna huwiyé', nee ilahhooár muruú ta tsu/i ar yaariir kay haniís as múk Israeli sleémeero.

²² Baalarihe tana /ayín nee tari wahán ar qwal/aamaye dír geeraá AAKOÓ MUNGÚ wa ale. Solomon ngway iimbalaaxiyé' ar di/i sagá wa tsare ar umuú AAKOÓ MUNGÚ as tawa waawutmooín, nee Sadoki tawa kaahamusmoó Mungú.

²³ Aluuwo Solomon kitangwduú waawuti'iima oo AAKOÓ MUNGÚ gway óh daanduú baabuúwós Daudi wa alé. Inós an waawutmoó ado gaa aleeslay nee múk Israeli sleémeero iri iialooeés dirose.

²⁴ Geeraharuuse sleémeero nee miguuseero nee daaqoó Daudi sleémeero al'axweesani ngiri ooiyé' dír waawutmo Solomon ar nguwa ilaiwawa/iya'.

²⁵ AAKOÓ MUNGÚ Solomon gway iia tleereés ta waawituú hatlá' aa giirin ba/a baraá yaamaá Israeliro, gway diihhooárií haniís waawituú hatlá' ba/a kudá' tlahh'aá Israeli gaa sawaawuti'ini.

Adór Daudi waawuti'iima ngira /aáy

²⁶ Naagáy Daudi garmoó Yese múk Israeli sleémeero guna sawaawuti'ín.

²⁷ Inós múk Israeli guna sawaawuti'ín kureeri mibeeri tsiyáhh, baraá yaamaá Hebroniro kureeri ngaa /aáy faanqw, baraá yaamaá Yerusalemuro kureeri ngaa /aáy mibeeri tám nee tám.

²⁸ Inós iwa gwaá' a aakoó aa dimaay hhe'ees, a daqaarmo nee a heé ta ilaiwawa/i. Garmaawós Solomon kitaangós oo waawuti'iima guna óh.

²⁹ Kwaynaá daanduú waawutmo Daudi imiír iimu/úngw wa tleemu ay alhhe'eesáy kaa gooín baraá kitaábuú inslaslaangw oo iigu'utusmo Samueli nee oo aarusmo Natani nee oo iigu'utusmo Gadi.

³⁰ Kitaabi'iidá' kángw waawuti'iimarós ngu kaahiyá' nee /uuruuwose, nee muruú inós gwaa slayi nee xoorór Israeliro, nee waawuti'iima sleémeero baraá yaamuwo.